“Mam yeti ya la yele aŋa wa, la wan eŋɛ se’em ti ya ta’an doose mam poan tara suma’asum. Tingɔŋɔ la poan, mɛlesegɔ wan paɛ ya ge tari ya sukpe’ene! Mam nyaŋɛ tingɔŋɔ la mɛ.”​—Yon 16:33, New World Translation.

 ‘N yeti ya dena wa, ti bala ti ya wan tara suma’asum yɛsera la yan boi la mam la. Tiŋa wa zuo wan namesɛ ya. Ge tara ya putɛsonɛ, ti mam puɣum nyaŋɛ ba.’​—Yon 16:33, New King James Version.

 Yele aŋa ti Yezu yuun tɔɣɛ la, a yuun buɣelɛ a podɔleba la suure ti ba baŋɛ ti bamam me wan ta’an basɛ ti Naayinɛ puurɛ pee, hali yeledaaŋɔ la yaarɛ san puɣum paara ba.

 “Mam yeti ya la yele aŋa wa, la wan eŋɛ se’em ti ya ta’an doose mam poan a tara suma’asum.” Kaalegɔ zɛ’an wa ka tɔɣeri suma’asum sebo n pa’alɛ ti zaberɛ ka boi yele. Ge la dela suma’asum sebo n boi to suuren. “Doose” la Yezu poan, to wan ta’an tara suma’asum buna wa se’ere n sɔi la, a yeti a wan bo to zilam vo’osum la. Paŋa wa n de “soŋera” la wan basɛ ti Yezu podɔleba ta’an ŋmibe yelese’a woo n paari ba la poan.​—Yon 14:16, 26, 27.

 “Tingɔŋɔ la poan, mɛlesegɔ wan paɛ ya ge tari ya sukpe’ene!” Yezu yuun tɔɣɛ la yelemɛŋɛrɛ ti yeledaaŋɔ n de wuu ŋmɛlema tuuma la yaarɛ wan paɛ a podɔleba la. (Matu 24:9; 2 Timoti 3:12) Bala la, yɛm boi bim ti ba ‘tara sukpe’ene’ bii ba ‘basɛ ti ba sunya ana mama.’​—Yon 16:33, New International Version.

 “Mam nyaŋɛ tingɔŋɔ la mɛ.” Yelesum la n de “tingɔŋɔ” la pa’alɛ la nɛresɛba n daɣɛ tontɔɔdoma ge welege bamea Naayinɛ zɛ’an la. b 1 Yon 5:19 yeti: “Tingɔŋɔ wa za’a boi la be’emdaana la [bii Sitaana] nu’usin. Bala pa’alɛ ti tingɔŋɔ wa nɛreba itigɔ la ba puti’irɛ ka peeri Naayinɛ puurɛ.​—1 Yon 2:15-17.

 Sitaana la a tingɔŋɔ la yuun kɔ’ɔn tiregera mɛ ti ba gu Yezu ti a da tum Naayinɛ puti’irɛ n boti sɛla, bɔta ti ba pã’asɛ en ti a da pa’alɛ nɛreba Naayinɛ yɛla ge me da dekɛ a vom la n ani kasi la ki faaɛ nɛreba basɛ. (Matu 20:28; Luke 4:13; Yon 18:37) Ge Yezu yuun ka bo yɔ’ɔ ti tingɔŋɔ la sa’am a puti’irɛ ti a buri poore basɛ Naayinɛ. A yuun kɔ’ɔn tara la sakerɛ ta paɛ a kum. Bala n sɔi ti Yezu yuun yeti eŋa nyaŋɛ tingɔŋɔ la mɛ ge ti Sitaana, se’em n sɔi ‘tiŋa wa zuo bisera’ la ‘ka tari paŋa’ la en.​—Yon 14:30.

 Yezu yuun eŋɛ makesonɛ bo a podɔleba ti ba baŋɛ ti bamam me wan kelum ta’an tara sakerɛ bɔ’ɔra Naayinɛ hali Sitaana san puɣum tiregera ti a sa’am ba sakerɛ la. Bala la, Yezu yuun boti a yeti: “Mam san nyaŋɛ tingɔŋɔ la, yamam me wan ta’an nyaŋɛ.”

 Yu’unseko ti Yezu yeti a ki la ti a tɔɣɛ yele ana wa. A yuun mi ti la kan yue a wan ki, bala la a yuun dekɛ yɔ’ɔ la ka’am a tuuntuneba la mɛ. A yuun tɔɣɛ la ninmɔ’ɔrɛ yɛla pa’asɛ n de: Ba kan le nyɛ en. Ba wan yaɛ ba hali ta ku ba. (Yon 15:20; 16:2, 10) Yezu n yuun mi ti a yelesum la ta’an basɛ ti a tuuntuneba la paleŋa ɛ̃ɣera la, a yuun ki’ilum a yetɔɣum la, la yelese’a n boi Yon 16:33 ti la kpemese ba giila ti la ana ba mama.

 Bala mea nɔɔ ti Yezu yetɔɣum la a makesonɛ ta’an kpemese a podɔleba giila zina beere wa. Kristakɔma za’a wan ta’an kelum tara yelemɛŋɛrɛ bɔ’ɔra Naayinɛ hali la mɛlesegɔ poan.