“Mam san puɣum bɔna lika n ani gbareti poan, mam ka zoti dabeem se’ere n sɔi la, hon boi mɛ la mam; ho dibiga la ho doore n buɣelɛ mam suure.”—Yooma 23:4, New World Translation.

 “Mam san puɣum wuna kum nyuuŋo, mam kan zɔta dabeem: hon boi me la mam; ho dibiga la ho doore n buɣelɛ mam suure.“​—Yooma 23:4, King James Version.

 Naayinɛ gu’uri ge fabela a nɛreba yele mɛ hali ba san ŋmibera yeledaaŋɔ poan. Kaalegɔ zɛ’an wa dekɛ la dunkeeŋa n biseri a piisi se’em la makɛ la Naayinɛ n biseri a nɛreba se’em. b Ba ka boi ba ma’a ba san puɣum ka tara ŋmɛregerɛ zɛ’an ti la ana wuu ba boi la lika n ani gbareti bii nyɔpɔ̃sega poan wuu kaalegɔ zɛ’an la n pa’alɛ se’em la. Ba boi la fai ti la ana wuu Naayinɛ kɔ’ɔn bɔna mɛ la ba.

 Baabule saŋa la, dunkeeŋa ni dekɛ la dibiga gu a piisi ti goo dusi ase’a da daam ba. A me ni dekɛ la a doore la n wɔɣɛ ge goŋe la pe’e a piisi la bii yese ba dɛŋa poan. Bala mea nɔɔ ti Yehowa Naayinɛ me ana wuu Dunkeeŋa n tari nɔŋerɛ gu’ura ge pa’ala nɛresɛba n pu’useri en la. Hali la san puɣum kpe’em la se’em me Yehowa soŋeri ba mɛ sɔrɔtɔ zo’e zo’e poan.

•   A doli la Baabule la poan pa’ala ge buɣela ba suure.—Arom 15:4.

•   A keleseri ba zusega mɛ ge basɛ ti ba tara putɛsonɛ la suma’asum.​—Filipi 4:6, 7.

•   A doli la ba pu’usegɔ tadaandoma poan kpɛmesa ba giila.​—Hebru 10:24, 25.

•   A basɛ ti ba tara la beere sa’am puti’irɛ ti a wan yese yeledaaŋɔ se’a n paari ba zina beere wa la.​—Yooma 37:29; Liligere 21:3-5.

 David n yuun de dunkeeŋa a bunbilimen ti pooren ti a nyaa dɛna Israeldoma Naba la n yuun gulese Yooma 23. (1 Samuel 17:34, 35; 2 Samuel 7:8) Yuunɛ wa pɔsɛ dekɛ Yehowa makɛ me la Dunkeeŋa n boi a nɛreba nɛŋa, diisa ba ti la ana ba buɣa buɣa wuu dunkeeŋa n bisera a piisi se’em la.—Yooma 23:1-3.

 Yooma 23:4 la poan, David n yuun pa’alɛ Naayinɛ n gu’uri en se’em la yuun ka tɔɣɛ Naayinɛ yele ti (eŋa) ge a tuɣum yeti (hon). David n tee sɔsega la se’em la pa’alɛ la eŋa ani tapilapi la Yehowa se’em. David yuun mi ti Naayinɛ fabeli a yele mɛ ge ti A me mina gurebisɛ se’a woo n paari en la. Bala zuo, David yuun ka zoti dabeem.

 Yooma 23, a kaalegɔ zɛ’an 5 la 6 la poan, a nyaa dekɛ la yidaana la a saana makerɛ tee soe dunkeeŋa la a piisi makerɛ la. Wuu yidaana n bo’ori yɛri yɛri la, Yehowa me bisɛ ti David dela a saana n tari tuulum. Hali David dinedoma ka tari paŋa n wan gu ti Naayinɛ kan bisera en. Yuunɛ la ba’asegɔ la, David pa’alɛ la eŋa n tari sakerɛ se’em ti Naayinɛ wan ita en som ge nɔŋɛ en a vom dabesa za’a.

 Pa’alegɔ yɛla la n boi Yooma 23 la pa’ali la Naayinɛ n nɔŋɛ ge kelum soŋera a nɛreba se’em.—1 Peter 2:25.