Pu’usegɔdoma basɛba yi’iri Mikael la “Saint Michael.” Yezu yu’urɛ n bala se’em ma’a ti a bɔna saazuo. a Moses n yuun ki ba’asɛ la, Mikael la Sitaana yuun nyɛ la nɔkpe’ene ge ti Mikael yuun le soŋɛ maleka kayima ti a tari sɔɔleŋa ta bo nɔdɛ’ɛsa Daniel. (Daniel 10:13, 21; Yude 9) Mikael yuun kɔ’ɔn tuna dɔla la a yu’urɛ la vuurɛ n de “Ani N Wɔm Naayinɛ?” A yuun kɔ’ɔn pɔ’ɔra la Naayinɛ bisega la ge me zaberɛ Naayinɛ dinedoma.​​—Daniel 12:1; Liligere 12:7.

 Geele bisɛ sɛla n sɔi ti la nara ti to sakɛ yeti Yezu n de Mikael.

•   Mikael n de malesi la “nɛŋadaana.” (Yude 9) A na’asegɔ yu’urɛ la n de “malesi nɛŋadaana la” bo la zɛ’ɛsi siyi Baabule la poan. Yu’urɛ la n boi zɛsɛka woo ba tɔɣeri la nɛra ayima yele ti la pa’alɛ ti maleka ayima ma’a n tari na’asegɔ yu’urɛ wa. Kaalegɔ zɛ’ɛsi wa kayima yeti to Daana Yezu n isige kum poan la, n de malesi la “zuodaana la me wan mɔɔla na.” (1 Tesalonika 4:​16) Yezu dela malesi la “zuodaana la mɔɔla”, Mikael.

•   Mikael n boi malesi la nɛŋa. “Te Yenɛ soŋora Mikael la [a] soŋoreba zabera la bonsɛ’kantɛ la,” Sitaana. (Liligere 12:7) Mikael tari kpe’eŋo mɛ paa saazuo se’ere n sɔi la eŋa n de “Yenɛ soŋoreba nɛŋadaana ayema” la “nabia kãtɛ.” (Daniel 10:13, 21; 12:1) Mikael na’asegɔ yu’ura wa pa’alɛ ti eŋa n de “saazuo soogɛpa la nɛŋadaana” wuu David E. Aune n zamesɛ New Testament yɛla la n yele se’em la.

   Baabule la yi la nɛra ayina ma’a yele n tari paŋa malesi la za’a poan. Ku pa’alɛ ti ‘Daana Yezu wan ta niɛ saazuo sa sigera na la a malesi n tari paŋa la bugum ti a sa’am nɛresɛba n zaɣesɛ Naayinɛ la.’ (2 Tesalonika 1:7, 8; Matu 16:27) Yezu “n keŋɛ saazuo ha ta . . . sɔna Na’ayenɛ soŋoreba woo la sɛla woo n boe saazuo ha la paŋa behera.” (1 Peter 3:​21, 22) Yɛm kan bɔna bim ti Naayinɛ loe Yezu la Mikael ti ba dɛna nɛŋadoma n boi to’ore to’ore ti ba sɔna malesi bisera. Ge la tuɣum nara ti to sakɛ ti Yezu la Mikael dela nɛrayiŋa.

•   Mikael “wan ihege na” “sunsagaŋɔ” saŋa poan n nan ka tabelɛ eŋɛ. (Daniel 12:1) Daniel gɔŋɔ la n boi Baabule la poan, yetɔɣebɛa la n de “ihege na” la vuurɛ dela naba n ni isige saazuo ti a tum tuunɛ n boi de to’ore. (Daniel 11:​2-4, 21) Yezu Krista n de “Yenɛ Yelehom” ge kelum dɛna “nadoma Naba” la wan isige saazuo sa’am Naayinɛ dinedoma la za’a ge faaɛ Naayinɛ nɛreba la basɛ. (Liligere 19:11-​16) A wan eŋɛ bala la ‘mɛlesekãtɛ n ka tabelɛ eŋɛ tingɔŋɔ wa zuo kurum’ la poan.​​—Matu 24:21, 42.