Bani n nari ti ba pa’alɛ kɔma gã’aregɔ yɛla? Baabule la pa’alɛ ti la dela dɔɣereba zugbere yele ti ba pa’alɛ ba kɔma gã’aregɔ yɛla. Dɔɣereba zo’e zo’e baŋɛ ti yele ana n soŋeri ba:

•   Da basɛ ti valum tara hɔ. Baabule la kɔ’ɔn tɔɣɛ buraasi buraanɛ la pɔɣesi pɔɣenɛ yɛla mɛ. Naayinɛ me yuun yele Israeldoma la ti ba pa’ala ba ‘kɔma’ yele ana wa. (Tɛɛnhegɔ 31:12; Malema 15:2, 16-19) To ta’an dekɛ yelebɛa n tari gilema tum tuuma se’em ma’a ti to tɔɣera gã’aregɔ yɛla, ti valum da bɔna bim.

•   Kɔ’ɔn pa’ala ba saŋa woo. La wan de ni ti ho yibesa pa’ala ho kɔma gã’aregɔ yɛla ba san ta paɛ ba sulega saŋa ma’a la, kɔ’ɔn pa’ala ba saŋa woo ba san pɔsɛ bɔkera yɛla.​​—1 Korint 13:11.

•   Pa’alɛ ba, ban wan tara bamea se’em. Ba sukuu tikiyadoma me ta’an pa’ala ba gã’aregɔ yɛla. Ge Baabule la kpemese dɔɣereba giila ti ba yeen da pa’ala ba kɔma ba buraanɛ la ba pɔɣenɛ yɛla ma’a ge ba me pa’ala ba, ban wan tara halisoma ge tara sarum soŋɔ se’em gã’aregɔ yɛla poan.​​—Magaha 5:1-23.

•   Kɛlesa ho kɔma la. Ho bia san soke ho sɛla gã’aregɔ yɛla poan, da basɛ ti ho sunsɔa nyie bii ho tãsɛ en. Ge sɛla n tuɣum nara dela ho ‘kɛlesa yetɔɣum kalam ge da zɛɛra yetɔɣum.’​​—Yames 1:​19.

Hon wan eŋɛ se’em ta’an gu ho bia yalumdoma zɛ’an

•   Pa’ala homea. Zamesɛ baŋɛ yalumdoma n pã’aseri kɔma se’em.​​​—Magaha 18:15; bisɛ Questions Young People Ask​​—Answers That Work gɔŋɔ la Volume 1, a

  zuo 32.

•   Mina ho bia vom poan yɛla. Da dekɛ en bo mina ti ho ka mina soŋa ge da bo ho bia la yɔ’ɔ ti a ‘ita sɛla ti a bɔta.’​​​—Magaha 29:15.

•   Pa’ala en eŋa n wan nana nɛreba se’em. Kɔma nari ti ba mina ba wan nana ba dɔɣereba se’em. (Kolose 3:​20) Ge ho san pa’ala ho bia ti a nana bunkutɛ woo, a pã’asegɔ ka tɔi. Dɔɣereba n de Kristakɔma ta’an pa’alɛ ba kɔma ti, “Nɛra san yele ho ti eŋɛ sɛla n ka makɛ la Naayinɛ puti’irɛ, da tum dɛ.”​​​—Tooma 5:29.

•   Pa’alɛ en eŋa n wan gu’ura amea se’em. Soŋɛ ho bia la ti a bɔkɛ eŋa n wan tara amea se’em, sansɛka ti nɛra bɔta ti a pã’asɛ en ge ti ho ka bɔna bim la. Eŋɛ itipa’alegɔ pa’alɛ ho bia la ti a ta’an dekɛ sukpe’ene yeti, “Basɛ hon iti sɛla la! N yeti n ta yele mɛ!” ge zɔ yese bim kalam. La wan nara ti ho ‘tiisa ho kɔma la saŋa woo,’ se’ere n sɔi la ba ka yuuri ge tameni yɛla.​​​—Tɛɛnhegɔ 6:7, Contemporary English Version.