Ɛɛ, a teeri. A ni tee a puti’irɛ mɛ se’em ma’a ti nɛreba ni tee ba halɛ. Makerɛ, se’em ma’a ti Naayinɛ yuun tɔɣɛ gãkerɛ yele bo diimi Israeldoma n yuun de a nɛreba la, a yuun yeti: ‘Daanse’ere ba wan kelese ge ti nɛra woo ŋmɛregɛ yese a be’em sarɔɔ la poan. Ba san eŋɛ bala, n wan tee n puti’irɛ, n kan basɛ ti too seko n ye ni ti bo sige ba zuo ba tubekpa’a la zuo la, sige ba zuo na.’​​—Yeremia 26:3.

 Baabula zo’e zo’e lerege kaalegɔ zɛ’an wa ti Naayinɛ wan “basɛ” too sebo ti a tari ye’a nɛreba zuo na la ti la pa’alɛ ti a tue mɛ la eŋa n kɔ’ɛ a puti’irɛ se’em ni la. Ge Hebru yelebire la vuurɛ ta’an dɛna la nɛra n tee a puti’irɛ bii tee eŋa n boti a eŋɛ sɛla. Gɔnmi’ila ayima gulesɛ yeti: “Asaala san tee a halɛ, la ni basɛ ti Naayinɛ tee a gãkerɛ mɛ.”

 La boi bim ti Naayinɛ ta’an tee a puti’irɛ ge bala ka pa’alɛ ti la nari ti a tee a puti’irɛ. Geele yelese’a ti Baabule la yeti Naayinɛ ka tee a puti’irɛ a poan:

•   Naayinɛ yuun ka bo yɔ’ɔ ti Balak tee eŋa Naayinɛ puti’irɛ ti A yaalɛ Israeldoma la.​​—Kanlɛ 23:18-​20.

•   Se’em ma’a ti Naba Saul yuun kɔ’ɔn tuna tuunfɛ’ɛsa la, Naayinɛ yuun ka tee a puti’irɛ la Eŋa n zaɣesɛ en ti a kan le dɛna naba la.​​—1 Samuel 15:28, 29.

•   Naayinɛ n pu’ulumbiŋe ti a wan basɛ ti a Dayɔa dɛna malemadaana wuusa la wan sirum tum tuuma. A kan tee a puti’irɛ yele dena wa poan.​​—Yooma 110:4.

 Ɛɛ, Naayinɛ tɔɣɛ ti la bɔna Baabule la poan ti: ‘Mam dela Yehowa; Mam ka teeri.’ (Malaki 3:6) Bala mea nɔɔ ti Baabule la yeti Naayinɛ ‘daɣɛ nyinyiligo tɛɛra.’ (Yames 1:​17) Ge wana ka pa’alɛ ti Baabule la tɔɣɛ tue mɛ la lan yeti Naayinɛ ka teeri a puti’irɛ la. Naayinɛ n ka teeri la vuurɛ dela, a nɔŋerɛ la a tontɔɔ gãkerɛ la ka makɛ tɛɛra. (Tɛɛnhegɔ 32:4; 1 Yon 4:8) Ge a ta’an dekɛ pa’alegɔ to’ore to’ore bo nɛra saŋa to’ore to’ore poan. Naayinɛ yuun dekɛ la pa’alegɔ to’ore to’ore bo Naba David doose la eŋa n wan zabɛ se’em, zaberɛ sugumnɔɔrɛ buyi poan. Pa’alegɔ wa yuun soŋɛ David mɛ ti a kelum zabɛ nyaŋɛ.​​—2 Samuel 5:​18-​25.

 Aayi, la daani en mɛ la nɛreba zo’e zo’e n ka doli a pa’alegɔ la. Baabule la pa’alɛ la yuun ani se’em ge ti Kokemɔ la yuun wa’an Noah dabesa la poan yele yeti: ‘Ti Yehowa suure sa’am la eŋa n naam asaala basɛ tinparɛ zuo la. Ti la daam A suure.’ (Pin’ileŋɔ 6:6) Kaalegɔ zɛ’an wa poan, yelebire la n de ‘suure sa’am’ mɛ la ze’ele la Hebru yelebire poan ti la vuurɛ dɛna hon “tee ho puti’irɛ.” Naayinɛ yuun tee a puti’irɛ mɛ la nɛreba zo’e zo’e n yuun boi ge ti Kokemɔ la nyaa wa’ana la se’ere n sɔi la ba yuun dela putɔpa. (Pin’ileŋɔ 6:​5, 11) La boi bim ti la yuun daam Naayinɛ mɛ la nɛreba la n yuun tum beem la ge a yuun ka tee eŋa n tari ni putɛsonɛ sɛka bɔ’ɔra asaaleba la. Yelemɛŋɛrɛ la dela, a doose la Noah buuri la poan faaɛ asaaleba za’a Kokemɔ la poan.​​—Pin’ileŋɔ 8:​21; 2 Peter 2:​5, 9.