Aayi, ba kan makɛ nyɔ̃ bii sa’am tingɔŋɔ wa za’a za’a. Baabule la pa’ali ti Naayinɛ yuun naam tingɔŋɔ wa mɛ ti nɛresaaleba bɔna ka poan wuusa.

•   “Tontɔɔdoma la n wan to’e teŋa la bɔna ka poan yɛ’ɛha.”​—Yooma 37:29.

•   “[Naayinɛ] n sɛ teŋparɛ wa yagelɛ ka ɛnberɛ zuo te ka kan malom miim.”​—Yooma 104:5.

•   “Teŋparɛ wa gan la bala yɛ’ɛha.”​—Pa’ala 1:4.

•   “Na’ayenɛ . . . n naam saazuo la teŋparɛ wa te nɛreba wan ta’an bɔna ka poan. A ka maalɛ ka te ka dɛna pɔgɔtia.”​—Isaiah 45:18.

 Naayinɛ kan basɛ ti zaberɛ, nɛreba dɛ̃ɣerɔ tuuma bii yelese’ere sa’am tingɔŋɔ wa. Ge a tuɣum wan ‘sa’am la sɛba n sa’ani tingɔŋɔ wa la.’ (Liligere 11:18) Bala wan tum tuuma la wani?

 Naayinɛ wan dekɛ a saazuo Na’am la tee soe asaala gɔmɛt n koŋe ti ba bisera tingɔŋɔ wa soŋa la. (Daniel 2:44; Matu 6:​9, 10) Naayinɛ Dayɔa Yezu Krista n wan bisera Na’am la. (Isaiah 9:​6, 7) Yezu n yuun boi tingɔŋɔ wa zuo la, a yuun eŋɛ pa’alɛ ti a tari naaŋɔ lɔɣɔrɔ paŋa mɛ. (Mark 4:​35-​41) Yezu n de Naayinɛ Na’am la Naba la, wan sɔna tingɔŋɔ wa la ka lɔɣɔrɔ bisera. A wan malum maalɛ tingɔŋɔ wa ti ku ana wuu ku yuun ani se’em Eden gaadin la poan la.​—Matu 19:28; Luke 23:43.

 Aayi, ku ka pa’ali bala. Nɛreba n ka bɔkɛ 2 Peter 3:7 soŋa la n sɔi ti ba ti’isa bala. La yeti: “A maahom na sɛla woo nya boe teŋa wa zuo la saazuo te a ta sagom la bugum.” Geele ninmɔ’ɔrɛ yɛla ayi n wan soŋɛ tɔ ti to bɔkɛ gulesegɔ wa vuurɛ:

1.   Baabule la tari yelebɛa la n de “saazuo,” “teŋa” la “bugum” tuna tuuma la sarɔtɔ zo’e zo’e poan. Makerɛ, Pin’ileŋɔ 11:1 yeti: “Teŋparɛ wa zuo zan’an pɔhɛ na lagom tɔgɔra la yetɔgom boyena.” Kalam, “teŋparɛ” la ze’ele bo la nɛresaaleba.

2.   Sɛla n boi 2 Peter 3:7 la n pa’alɛ saazuo, tiŋa la bugum n ze’ele bo sɛla. Kaalegɔ zɛ’ɛsi 5 la 6 dekɛ la Noah Kokemɔ la eŋɛ makerɛ. Sankaŋa la ba yuun sa’am la daami tingɔŋɔ ge tingɔŋɔ wa yuun kelum zɛ’a mɛ. Kokemɔ la yuun sa’am la “teŋparɛ” la n ze’ele bo nɛrebe’ero la. (Pin’ileŋɔ 6:​11) “Saazuo” la ti ku me yuun sa’am la ze’ele bo la tingɔŋɔ wa bisegadoma. Bala, ku yuun sa’am la nɛrebe’ero la ge daɣɛ tingɔŋɔ la mea. Noah la a deodoma yuun piɛ sa’aŋɔ la mɛ. Kokemɔ la pooren, ba yuun kelum bɔna la tingɔŋɔ wa zuo.​—Pin’ileŋɔ 8:​15-​18.

 Wuu kokemɔ la, sa’aŋɔ bii “bugum” la ti 2 Peter 3:7 tɔɣɛ bu yele la wan sa’am la putɔpa la ge la kan sa’am tingɔŋɔ la mea. Naayinɛ pu’ulumbiŋe ti a wan “naam la saazuo paalega la teŋa wa zuo paalega” ti “tontɔɔ bɔŋa wan bɔna” bim. (2 Peter 3:​13) “Saazuo paalega” la bii Naayinɛ Na’am la n wan ta bisera “teŋa wa zuo paalega” la bii nɛresomdoma la. Naayinɛ Na’am la poan, tingɔŋɔ wa wan ta dɛna la paradiisi ti suma’asum bɔna bim.​—Liligere 21:​1-4.