Sugeri dia dela hon basɛ nɛra be’em bo en. Baabule la poan, Greek yelebire ti ba pa’alɛ de vuurɛ ‘sugeri dia’ la vuurɛ dela ‘ho basɛ ti la tole,’ ti la ana wuu nɛra n basɛ sanɛ bo la. Yezu yuun dekɛ makerɛ wa tum tuuma la eŋa n yuun pa’alɛ a podɔleba ti ba zusɛ yeti: ‘Basɛ to be’em bo to wuu tomam me n basɛ nɛreba be’em bo ba se’em la.’ (Luke 11:4) Bala mea nɔɔ ti yameŋa la n yuun ka zɔ nimbɔ̃’ɔ makerɛ la poan la, Yezu yuun dekɛ la sugeri dia makɛ hon basɛ sanɛ bo nɛra.​—Matu 18:23-​35.

 Tomam me diti sugeri bɔ’ɔra nɛreba mɛ to san ka ugera yɛla bii to san ka eŋɛ sunsɔa ti to lerege sanɛ. Baabule la pa’alɛ ti yelemɛŋɛrɛ nɔŋerɛ n basɛ ti to dita sugeri se’ere n sɔi la nɔŋerɛ ‘ka kaali be’em.’​—1 Korint 13:​4, 5.

Sugeri dia vuurɛ n daɣɛ sɛla

•   Be’em la daɣɛ sɛla. Baabule la tɔɣɛ giisɛ sɛba n ti’isɛ ti be’em daɣɛ tuure la.​—Isaiah 5:​20.

•   Ho eŋɛ wuu ba ka tum ho be’em la. Naayinɛ yuun di sugeri bo Naba David mɛ la a tuure kãtɛ la ge a yuun ka gu en la yeledaaŋɔ se’a ti a be’em la yuun ta’asɛ la poan. Hali Naayinɛ yuun basɛ ti ba gulesɛ David tuure yɛla la mɛ Baabule la poan, la wan eŋɛ se’em ti to da tamɛ.​—2 Samuel 12:​9-​13.

•   Ho basɛ ti nɛreba bisɛ ho yoo. To makɛ yeti ho dekɛ la laɣehɔ peŋe nɛra, ti a dekɛ laɣehɔ la tum yoo yoo ge ka ta’an yɔ ho wuu eŋa n yele ni ho se’em la. A wa’ana yele ho yeti eŋa tue mɛ. Ho ta’an di sugeri bo en ge kan ugera yɛla bii kan tabegɛ en kankaŋi bii ho ta’an puɣum saalum sanɛ la za’a basɛ. Ge ho ta’an le yeti ho kan le peŋe en laɣehɔ.​—Yooma 37:21; Magaha 14:15; 22:3; Galatia 6:7.

•   Ho ka mi sɛla n sɔi ti ho di sugeri. Naayinɛ ka diti sugeri bɔ’ɔra sɛba n mi fii ge tuna be’em ge ka sakɛ ti ba tue ya, tee ba vom bii zaɣesɛ ti ba kan belum se’em ti ba tue la. (Magaha 28:13; Tooma 26:20; Hebru 10:26) Nɛreba n ani bala ni lebege la Naayinɛ dindoma. Bala la, a kan bɔta ti to di sugeri bo sɛba ti eŋa ka di sugeri bo ba la.​—Yooma 139:21, 22.

   Ge la san dɛna la hon ti nɛra tum ho putotuuma ge ka sakɛ ti a tue ya, hon wan eŋɛ la wani? Baabule la kaɣɛ tɔ ti: ‘Yese homea sunsɔyiisum poan ge zaɣesɛ nyabega.’ (Yooma 37:8) Ho ta’an gu homea ti ho sunsɔa kan nyie ge bala ka pa’alɛ ti nɛra la ka tue ho. Tara suure lua ti Naayinɛ wan gãkɛ nɛra la. (Hebru 10:30, 31) Tara subuɣelegɔ la hon mi ti saŋa keni na ti Naayinɛ wan basɛ ti wuŋerɛ la yeledaaŋɔ n paari tɔ nananawa la kan le bɔna.​—Isaiah 65:17; Liligere 21:4.

•   ‘Di sugeri’ la sɛla woo n eŋɛ la. Saŋa ase’a, ton wan di ni sugeri bo be’emdaana la, sɛla n wan ana soŋa dela to sakɛ ti, la puɣum ka nari ni ti to eŋɛ sunsɔa. Baabule la yeti: ‘Da ita sunsɔa kalam kalam se’ere n sɔi la, gbeto n ni kɔ’ɔn ita sunsɔa.’​—Pa’ala 7:9.

Hon wan di sugeri bo nɛra se’em

1.   Tɛ̃ra sɛla n pa’alɛ ti ho di sugeri bo nɛra. Da yeti la daɣɛ be’em bii daaŋɔ ka boi nɛra la n eŋɛ sɛla la poan—la dela ho yeen di sugeri.

2.   Baŋɛ nyuurɔ n boi bim se’em ho san di sugeri bo nɛra. Ho san basɛ sunsɔa ge ka ugera yɛla, la wan basɛ ti ho suure ana mama, ho tara imma’asum ge ti ho malum tara pupeelum zo’e zo’e. (Magaha 14:30; Matu 5:9) Sɛla n gani bala dela, ho san di sugeri bo nɛra, Naayinɛ me wan di sugeri bo ho.​—Matu 6:​14, 15.

3.   Tara giile. To za’a waabi ka di mi’a. (Yames 3:2) Wuu nɛreba n ni di sugeri bo to ti to puurɛ pee se’em la, bala mea nɔɔ ti la nara ti tomam me di sugeri bo nɛreba.​—Matu 7:​12.

4.   Dekɛ yɛm tum tuuma. Nɛra san eŋɛ to sɛla ti la daam tɔ, to ta’an dekɛ Baabule ka’aŋɔ wa tum tuuma: ‘Kɔ’ɔn ŋmiberi ya bɔna la taaba bala.’​—Kolose 3:​13.

5.   Da gu’um. Ho san dita sugeri kalam kalam, la ani soŋa gana hon basɛ ti yele la yuura ti ho sunsɔa isigera pa’asa.​—Epesus 4:​26, 27.