Yezu Yuun Ki La Pumpuuredɔɔ Zuo?
Baabule la lebesego
Nɛreba zo’e zo’e bisɛ ti pumpuuredɔɔ dela Kristakɔma dãalesum. Ge Baabule la ka pa’alɛ dɔsɛka ti Yezu yuun ki ka zuo. Bala la, nɛnɛra kan ta’an pa’alɛ dɔɔ la n yuun ani se’em wana mɔpi. Baabule la basɛ ti to baŋɛ ti Yezu yuun ka ki pumpuuredɔɔ zuo ge a yuun ki la dɔwoko zuo.
Baabule la pa’alɛ ti dɔsɛka ti Yezu yuun ki ka zuo la, ba yi’iri ku Greek poan la stau·rosʹ. (Matu 27:40; Yon 19:17) La boi bim ti Baabule leregere zo’e zo’e lerege yelebire wa la “pumpuuredɔɔ” ge gɔnmi’ileba sakɛ ti la vuurɛ n kɔ’ɔn dɛna sɛla dela “dɔwoko.” a A Critical Lexicon and Concordance to the English and Greek New Testament la pa’alɛ ti stau·rosʹ “ka makɛ dɛna dɔɔrɔ bayi n ta taaba.”
Baabule la le dekɛ la Greek yelebire n de xyʹlon tum tuuma ti la wɔ̃na la stau·rosʹ. (Tooma 5:30; 1 Peter 2:24) Yelebire wa vuurɛ dela “dɔɔ” bii “tia.” b The Companion Bible la pa’alɛ ti: ‘Sɛsɛla ka boi New Testament n boi Greek poan la n tɔɣɛ dɔɔrɔ bayi yele.’
Naayinɛ puurɛ wan pee ti to tara pumpuuredɔɔ pu’usa en?
Crux simplex dela Latin yelebire n pa’alɛ dɔɔ ayina ti ba ni kpa putodaana de zuo
La ka pakɛ la dɔsɛka ti Yezu yuun ki ka zuo la n yuun ani se’em, Baabule la, la yele ana wa basɛ ti to baŋɛ ti la ka nari ti to tara pumpuuredɔɔ pu’usa Naayinɛ.
Naayinɛ ka boti to dekɛ wɔ̃nɛ bii dãalesum n de wuu pumpuuredɔɔ la pu’usa en. Naayinɛ yuun bo Israeldoma la nɔɔrɛ ti ba da tara wɔ̃sum lɔɣɔrɔ pu’usa en. Bala mea nɔɔ ti Kristakɔma me nara ti ba ‘yese bamea baɣa kaabegɔ poan.’—Tɛɛnhegɔ 4:15-19; 1 Korint 10:14.
Yuun kɔbesɛka n deŋɛ nɛŋa Kristakɔma yuun ka tari pumpuuredɔɔ pu’usa. c Tuuntuneba la pa’alegɔ, la ba itigɔ dela makerɛ ti la nara ti Kristakɔma za’a tɔɣesa.—2 Tesalonika 2:15.
Ban tari pumpuuredɔɔ pu’usa la ze’ele la baɣa kaabegɔ poan. d Yezu n yuun ki la, yuuma zo’e zo’e pooren, pu’usegɔdoma yuun ka le tara a pa’alegɔ la tuna tuuma. Ba yuun bo pu’usegɔdoma wa “yɔ’ɔ ti ba tara baɣa lɔɣɔrɔ la dãalesum” n de wuu pumpuuredɔɔ la pu’usa. (The Expanded Vine’s Expository Dictionary of New Testament Words) Ge Baabule la ka sakɛ ti to tara baɣa kaabegɔ yɛla pu’usa, ti to ta’an nyɛ nɛreba zo’e.—2 Korint 6:17.
a Bisɛ New Bible Dictionary, Third Edition, edited by D. R. W. Wood, gɔnlaka 245; Theological Dictionary of the New Testament, Volume VII, gɔnlaka 572; The International Standard Bible Encyclopedia, Revised Edition, Volume 1, gɔnlaka 825; la The Imperial Bible-Dictionary, Volume II, gɔnlaka 84.
b Bisɛ The Expanded Vine’s Expository Dictionary of New Testament Words, gɔnlaka 1165; A Greek-English Lexicon, by Liddell and Scott, Ninth Edition, gɔnlaɣesi 1191-1192; la Theological Dictionary of the New Testament, Volume V, gɔnlaka 37.
c Bisɛ Encyclopædia Britannica, 2003, entry “Cross”; The Cross—Its History and Symbolism, gɔnlaka 40; la The Companion Bible, Oxford University Press, appendix 162, gɔnlaka 186.
d Bisɛ The Encyclopedia of Religion, Volume 4, gɔnlaka 165; The Encyclopedia Americana, Volume 8, gɔnlaka 246; la Symbols Around Us, gɔnlaɣesi 205-207.
Ho Me Ta'an Bɔta Yele Ana
SOKESE’A TI NƐREBA SƆKERA
Beni N Sɔi Ti Yehowa Sɛɛradoma Ka Tara Pumpuuredɔɔ Pu’usa?
La boi bim ti to dela Kristakɔma ge to ka tari pumpuuredɔɔ pu’usa. Beni n sɔi?
ESSENTIAL BIBLE TEACHINGS
Beni N Sɔi Ti Yezu Yuun Ki?
Daanse’ere ho tabelɛ wum ti a ki la tomam be’em zuo. Ge nɛreyiŋa kum wa wan ta’an tara nyuurɔ bɔ’ɔra nɛreba zo’e zo’e?
