Yehowa Sɛɛradoma ka diti dɔɣum daarɛ se’ere n sɔi la, la dela de’eŋo sɛka n ka peeri Naayinɛ puurɛ. La boi bim ti Baabule la ka tɔɣɛ vɛ̃ki giisɛ dɔɣum daarɛ de’eŋo yɛla ge la soŋɛ to mɛ ti to ta’an ti’isɛ baŋɛ de’eŋo wa yɛla n ani se’em ge bɔkɛ Naayinɛ n geele a se’em. Geele yɛla anaasi wa la Baabule naresum yɛla bisɛ.

1.   Dɔɣum daarɛ de’eŋo ze’ele la baɣa kaabegɔ yɛla poan. Gɔŋɔ n tɔɣeri dɔɣum daarɛ yɛla yuun pa’ali ti, sɛla n sɔi ti nɛreba yuun pɔsɛ dita dɔɣum daarɛ dela ba yuun ti’isɛ ti, kolekpabɛ’ɛsi ta’an daam nɛra a dɔɣum daarɛ. Funk & Wagnalls Standard Dictionary of Folklore, Mythology, and Legend me pa’ali ti “nɛra la n diti a dɔɣum daarɛ zɔdoma n ni kã’ara som bɔ’ɔra en la ta’an tɛ’ɛla en.” The Lore of Birthdays gɔŋɔ la yeti diimi sa la, la yuun dela ninmɔ’ɔrɛ ti ba gulesɛ yelese’a n yuun eŋɛ bia la dɔɣum daarɛ saŋa la biŋe se’ere n sɔi la “ba ni ita wana dɔla nyalema poan ŋmarebɛa bisera” ta’an “dekɛ horoscope bisɛ bia la beere sa’am n wan ana se’em.” Gɔŋɔ wa le yeti “dɔɣum daarɛ candels la ti ba ni nyɔ̃’ɔra la ta’an pa’alɛ hon boti ho beere sa’am ana se’em.”

    Baabule la puɣum tɔɣɛ zɛregɛ tiim tuuma, nɛra n biseri bɔ’ɔra, kolekpatuuma bii “sɛla n wɔni bala.” (Tɛɛnhegɔ 18:14; Galatia 5:19-21) Yelemɛnɛrɛ, yele deyima zuo ti Naayinɛ yuun sa’am Babilondoma la dela nɛreba la yuun doli la ŋmarebɛa poan bisera bɔ’ɔra. (Isaiah 47:11-15) Yehowa Sɛɛradoma ka tɔɣeri giisa malema de’eŋo woo ge Baabule la san bo pa’alegɔ ti la niɛ peelum, tomam doli la bala.

2.   Kristakɔma sɛba n deŋɛ nɛŋa la yuun ka diti dɔɣum daarɛ de’eŋo. The World Book Encyclopedia yeti “ba yuun bisɛ ti dɔɣum daarɛ de’eŋo ze’ele la baɣa malema poan na.” Baabule la pa’ali ti Kristakɔma woo nara ti ba dɔla tuuntuneba la, la nɛresɛba ti Yezu yuun pa’alɛ ba la n yuun vɔi ba vom sore sɛka poan la.​—2 Tesalonika 3:6.

3.   Yelese’ere ma’a ti Baabule la pa’alɛ Kristakɔma ti ba ita dela ba tiisa Yezu kum la. (Luke 22:17-20) Yele wa ka nari ti la eŋɛ to pakerɛ se’ere n sɔi la, Baabule la yeti ‘kum daarɛ nyani dɔɣum daarɛ.’ (Pa’ala 7:1) Se’em ma’a ti Yezu yuun ki tingɔŋɔ wa zuo la, a yuun tari la yusonɛ la Naayinɛ bala yuun basɛ ti a kum daarɛ yele pakɛ gana a dɔɣum daarɛ mɛ.​—Hebru 1:4.

4.   Baabule la ka makɛ tɔɣɛ pa’alɛ ti Naayinɛ yameŋa di a dɔɣum daarɛ de’eŋo mɛ. La daɣɛ ti sɛba n yuun gulesɛ Baabule la tamɛ mɛ ka gulesɛ yele wa se’ere n sɔi la ba gulesɛ nɛreba bayi n yuun ka pu’useri Naayinɛ dɔɣum daarɛ de’eŋo yɛla mɛ. Ba me gulesɛ pa’alɛ de’eŋo wa n yuun ka ani soŋa se’em mɛ.​—Pin’ileŋɔ 40:20-22; Mark 6:21-29.

 Dɔɣereba n de Yehowa Sɛradoma ni basɛ ti ba kɔma baŋɛ ti ba nɔŋɛ ba mɛ saŋa woo yuunɛ la poan. Ba ni bɔ’ɔra ba kɔma wa lɔɣɔrɔ mɛ ge naɛ la ba sɔsa la pupeelum. Ba tɔɣeseri la Naayinɛ n ni kɔ’ɔn ita som bɔ’ɔra a kɔma se’em la. (Matu 7:11) Yehowa Sɛradoma kɔma ka bisɛ ti bamam ka tari pupeelum, bisɛ basɛba n yele sɛla:

•   “La ni ana soŋa mɛ ti ho toe lɔkɔ se’em ma’a ti ho puɣum ka ti’isɛ de yele.”​—Tammy, n de yuun 12.

•   “La boi bim ti mam dɔɣereba ka bo’ori mam lɔɣɔrɔ n dɔɣum daarɛ ge ba ni makɛ mɛ da lɔɣɔrɔ bo mam. Mam boti la bala se’ere n sɔi la mam dɔɣereba ta’an ni da lɔkɔ di’ɛ mam ti la eŋɛ mam pakerɛ.”​—Gregory, n de yuun 11.

•   “Yamam ti’isɛ ti yamam n zi’iri sɔsɛ mita pia obe cake fii wa ge yuun yuunɛ ma’a n de paati? Ya nari ti ya wa’an tomam yire na sirum baŋɛ paati n de sɛla!”​—Eric, n de yuun 6.