Yehowa Sɛɛradoma biseri ba deodoma soŋa mɛ ge me soŋera ba yikpɛ’ɛsi ti ba me ita bala. To sakɛ ti Naayinɛ n de Mina n naam yizuo la. (Pin’ileŋɔ 2:21-24; Epesus 3:​14, 15) Baabule la poan, a pa’alɛ to la naresum yɛla n soŋeri nɛreba ti ba tara pupeelum ba pɔɣedire poan.

 To tiregɛ dɔla la Baabule ka’aŋɔ se’ere n sɔi la, bala n soŋeri sireba, pɔɣeba la dɔɣereba ti ba ta’an tuna ba tuuma soŋa. (Magaha 31:10-31; Epesus 5:22–6:4; 1 Timoti 5:8) Yɛm sebo n boi Baabule la poan soŋeri deodoma n boi pu’usegɔ yima yima poan mɛ. (1 Peter 3:​1, 2) Bisɛ sɛba n daɣɛ Yehowa Sɛɛradoma n tɔɣɛ ba luɣerɛ kpɛ’ɛsi n de Yehowa Sɛɛradoma yele se’em:

•   “To yuuma ayoobe poan yuun kɔ’ɔn dɛna la nɔkpe’ene la susa’aŋɔ ma’a. Ge Ivete n yuun ta dɛna Yehowa Sɛɛradoma ayima la, a yuun nyaa tari la nɔŋerɛ ge mi di’isa suure. Eŋa n yuun eŋɛ teere se’a la n soŋɛ to pɔɣedire la.”​​—Clauir n ze’ele Brazil.

•   “Mam sunsua n yuun nyie la mam sira Chansa n yuun pɔsɛ zamesa Baabule la Yehowa Sɛɛradoma la. Mam yuun ti’isɛ ti ba gbi’iri la yɛa. Kɔ’ɔn pɔsɛ sankaŋa mam nyɛ ti Baabule la sirum soŋɛ to pɔɣedire la mɛ.”​—Agness n ze’ele Zambia.

 To Na’am mɔɔlegɔ la poan, to pa’alɛ to yikpɛ’ɛsi la yɛm sebo n boi Baabule la poan n wan ta’an soŋɛ se’em ti ba

•   Loe ba luɣerɛ kpɛ’ɛsi soŋa

•   Maalɛ yelese’a n wan paɛ ba pɔɣedire yia yuunɛ la poan

•   Tara suma’asum la ba dɛɛndoma

•   Bisera ligiri soŋa

•   Basɛ nɔkpe’ene ŋmɛa

•   Tiregɛ dita sugeri

•   Kumesa ba kɔma

 Yelemɛŋɛrɛ, saŋa ase’a bala ta’an eŋɛ. Makerɛ, 1998 poan, company kayima yu’urɛ n de Sofres yuun eŋɛ la viiseŋɔ. Ba yuun baŋɛ ti, ho san dekɛ pɔɣedire 20 ti luɣerɛ kpɛa ayima dɛna Sɛɛradaana, ba poan ayima n yuun tari yeledaaŋɔ zo’e zo’e se’em ma’a ti ayima tee pu’usegɔ la.

 Yezu yuun tɔɣɛ biŋe ti a podɔleba deodoma ta’an giisa ba. (Matu 10:32-​36) Daami yɛla zamesegɔdaana Will Durant pa’alɛ ti Arom Sɔ’ɔlum la poan, “Nɛreba yuun siisum bo Kristakɔma la mɛ ti ba gbi’iri la yɛa,” a nɛreba mɛ siisum la bala bɔ’ɔra Yehowa Sɛɛradoma basɛba zina beere wa. Ge bala pa’alɛ ti Yehowa Sɛɛradoma n ni ta’asɛ yele la?

 European Court of Human Right n daa boi bim gãkera nɛreba n yeti Yehowa Sɛɛradoma gbi’iri la yɛa la, ba daa yeti, saŋa zo’e zo’e nɛresɛba n daɣɛ Sɛɛradoma la n ni ta’asɛ zaberɛ la, la ba zaɣesɛ ti ba kan “nam ba soe la n loe pu’usa seko la.” Kootin la yuun le yeti: “Pɔɣedire zo’e zo’e ti nɛreba la bɔna pu’usegɔ yima yima poan kɔ’ɔn ana la bala daɣɛ Yehowa Sɛɛradoma ma’a.” b Hali la san dɛna pu’usegɔ la zuo ti nɛreba yaɛ ba, Yehowa Sɛɛradoma tiregeri mɛ dɔla Baabule ka’aŋɔ wa: “Nɛra han eŋɛ sɛla n de be’em bo ya, eŋɛ ya sɛla n de som bo en. . . . Ge han de’a la yamam tɔka, eŋɛ ya sɛla te ya wan ta’an eŋɛ la ya tare ya sunma’ahom la nɛra woo.”​​—Arom 12:17, 18.

 Yehowa Sɛɛradoma doli la Baabule la n pa’ali ti ba di bii ele “se’em n dole Yesu sore.” Bala pa’alɛ ti ba wan di bii ele mina la dɛna ba pu’usegɔ nɛreba. (1 Korint 7:​39) Nɔɔrɛ wa n boi Baabule la poan la dela yelesonɛ. Makerɛ, 2010 poan Journal of Marriage and Family la yuun yeti, “sireba la ba pɔɣeba pu’usegɔ, itigɔ la sakerɛ yɛla san dɛna buyina, ba tiŋasoka bɔŋa la ni ana la soŋa. c

 Ge Yehowa Sɛɛradoma ka kpemeseri ba tadaadoma giila ti ba basɛ ba luɣerɛ kpɛ’ɛsi n daɣɛ Sɛɛradoma. Baabule la yeti: “se’em n dole Yesu sore han tara a pɔga se’em n ka dole Yesu sore, ge te a pɔga la sakɛ te a wan bɔna la en, la ka nare te a lebehe ka. Ge te pɔgɔsɛka n dole Yesu sore me han tara a sera se’em n ka dole Yesu sore, ge te a sera la sakɛ te a wan bɔna la en, la ka nare te a yehe a zen’en.” (1 Korint 7:​12, 13) Yehowa Sɛɛradoma nani nɔɔri wa mɛ.