Aayi. Yehowa Sɛɛradoma ka zaɣeseri a deŋɛ gu bã’a pania lua. A deŋɛ gu bã’a pania lua dela Kristabia woo loe a loore. Yehowa Sɛɛradoma zo’e zo’e loe mɛ ti ba lu a deŋɛ gu bã’a pania.

 To ni ɛɛra la tibegɔ n ani soŋa ge ti to puurɛ me ni pee la dɔɣetadoma n muuri ita viisegɔ ti ba ta’an gu bã’asi ti la da lamesa nɛreba la. To puurɛ pee mɛ la imma’asum bisegadoma n kuuri bamesi se’em la, yele yele woo daaŋɔ saŋa.

 Yehowa Sɛɛradoma ni kɔ’ɔn dɔla la imma’asum bisegadoma n pa’alɛ se’em la. Makerɛ, COVID-19 bã’a la n kɔ’ɔn pɔsɛ wi’ira la, Yehowa Sɛɛradoma gulesɛ yɛla eŋɛ ba intanɛt tuuma zɛ’an ti la bɔna yetɔɣum zo’e zo’e poan. Ba kpemeseri nɛreba giila ti ba kɔ’ɔn dɔla pa’alegɔ seto n wan gu ba ti bã’a la kan laŋɛ ba. Pa’alegɔ wa ase’a dela, la de ninmɔ’ɔrɛ se’em ti to futa to nyɔ̃ la to nɔɔrɛ, to da lɛna taaba, to pɛɛra to nu’usi, nɛreba se’em n nari ti ba laɣesɛ taaba bɔna zɛ’an, nɛra n wan bɔna a ma’a la yelese’a woo n nari ti to eŋɛ ti tiŋa la kpɛ’ɛndoma pa’alɛ.​—Arom 13:1, 2.

 Yuuma zo’e zo’e n wana ti Yehowa Sɛɛradoma gɔnɔ tɔɣera pa’ala ninmɔ’ɔrɛ naresum yɛla wa:

•   Imma’asum yɛla dela nɛra woo kɔ’ɛ a puti’irɛ de poan.​—Galatia 6:5.

   “[Magazine wa] ka pa’alɛ ti tiim bii tibegɔ ayima gani ayima. Ku me ka pa’ali nɛreba n wan tibɛ bamesi se’em. Ku tuɣum ita sɛla dela, ku pa’ali la yɛla la n ani se’em ge nyaa ni basɛ ti se’em n kaali la kɔ’ɛ a puti’irɛ loe eŋa n boti sɛla.”​—Awake!, February 8, 1987.

   “La dela homea zugbere yele ti ho bisɛ nyaa hon la ho kɔma wan lu a deŋɛ gu bã’a pania bii ya kan lu.”​—Awake!, August 22, 1965.

•   To geele vom ti la dɛna tuulum n sɔi ti to tibera tomesi.​—Tooma 17:28.

   “Yehowa Sɛɛradoma ni kɔ’ɔn bɔta la ba baŋɛ tibegɔ yelese’a n boi, la wan eŋɛ se’em ti ba ta’an tibɛ bamesi. Ba nɔŋɛ vom la zuo, ba ni tiregɛ mɛ doose sarɔseko n nari ge me makɛ la Baabule la, ta’an tibɛ bamesi kelum vɔna.”​—The Watchtower, July 1, 1975.

   “Yehowa Sɛɛradoma ni sakɛ to’e tiim la asibitin tibegɔ mɛ. Ba boti la ba tara imma’asum ge me vɔi yue. Yelemɛŋɛrɛ, wuu yuun kɔbesɛka n deŋɛ nɛŋa Kristabia Luke la, Yehowa Sɛɛradoma basɛba dela imma’asum tuuntuneba. . . . Yehowa Sɛɛradoma puurɛ pee mɛ la imma’asum bisegadoma n kuuri bamesi se’em soŋera nɛreba tibegɔ yɛla poan la. Ba puurɛ me ni pee mɛ la imma’asum tuuntuneba n ni soŋɛ ba ti ba ta’an tibɛ bamesi la.”​—The Watchtower, February 1, 2011.