Yehowa Sɛɛradoma tari la Baabule to’ore to’ore ita Baabule zamesegɔ. Ge to puurɛ ni pee mɛ to san tara New World Translation of the Holy Scriptures la to yetɔɣum poan se’ere n sɔi la ku tari la Naayinɛ yu’urɛ la tuna tuuma, makɛ ma’a ge ti ku bɔkerɛ me ka kpe’em.

•   Naayinɛ yu’urɛ la boi bim mɛ. Baabule maalegɔdoma basɛba ka na’asɛ mina n sɔi Baabule la. Makerɛ, Baabule kuyima poan, ba purɛ la nɛreba n gaŋɛ 70 n laɣum lerege ku la yu’ura. Ge Baabule kaŋa mea nɔɔ n gulesɛ nɛreba yu’ura la, tuɣum yese Baabule la Daana, Yehowa Naayinɛ yu’urɛ la mɛ!

   Ge New World Translation la lebese gulesɛ Naayinɛ yu’urɛ la eŋɛ zɛ’ɛsi tusa tusa ti yu’urɛ la yuun puɣum bɔna bim la mɛ. Nɛresɛba n yuun laɣum lerege Baabule kuna wa la ka basɛ ti nɛreba baŋɛ ba yu’ura.

•   Makɛ Ma’a. La daɣɛ Baabule woo n lerege yelesum la ma’a wuu ba yuun gulesɛ de se’em la. Baabule kuyima lerege Matu 7:​13 la wana: “Doohe ya zanɔɔrɛ mika la poan kɛn. Se’ere n sɔe la, namehegɔ zen’an zanɔɔrɛ la dela zanɔɔrɛ yaleŋa, te sodene me yalegɛ.” Ge Greek gulesegɔ la yeti “sa’aŋɔ” ge daɣɛ “namehegɔ zen’an.” Daanse’ere sɛla n sɔi ti leregeredoma la yeti “namehegɔ zen’an” la dela ba sakɛ ti nɛrebe’ero wan ta nyɔ bugum poan daarewoo la. Ge Baabule la ka pa’alɛ bala. Bala zuo la, New World Translation la lerege de ma’a yeti: “Doose ya zanɔɔrɛ mika la poan kɛ̃ se’ere n sɔi la zanɔɔrɛ yaleŋa la ye la sa’aŋɔ poan ge ti sɔrɔɔ la me yalegɛ.”

•   Ku bɔkerɛ ka kpe’em. Baabule la nari ti la dɛna ma’a ge me niɛ peelum ti nɛreba ta’an bɔkɛ dɛ soŋa soŋa. Geele makerɛ wa bisɛ. Arom 12:11 poan, tuuntuna Paul dekɛ la Greek yelesum ti ho san lerege de bala mea nɔɔ, la vuurɛ wan dɛna la “vo’osum n kɔ̃ti.” To ka tari yelesum wa tuna tuuma daarewoo yetɔɣum poan la zuo, New World Translation la lerege de mɛ ti la niɛ peelum. Ku yeti, la nari ti Kristakɔma “mɔ’ɛ nini la vo’osum poan yɛla.”

 New World Translation la boi la de to’ore la ku tari Naayinɛ yu’urɛ la tuna tuuma, makɛ ma’a ti ku bɔkerɛ ka kpe’em se’em la. To me ka kooseri ku. Wana wa soŋɛ mɛ ti nɛreba zo’e zo’e ta’an kaala Baabule la bamea yetɔɣum poan hali la sɛba n kan ta’an da Baabule la.