“Mì gbɔ ewɔ ni nɔ wazɔ́n sínsínnyɛ bo nɔ yí alɔ etɔn lɛ dó wà azɔ̌n ɖagbe lɛ, ná ewɔ nidó sɔgǎn tindó nuɖé nadó má xɛ́ mɛxe to nuhudó mɛ.”—EFESUNU LƐ 4:28.

Mɛdatɔ lɔ jlo ɖɔ mǐ ni nɔ ɖó linlɛn ɖagbe gandó azɔ̌n go. Etɛ́wutu? Mɛxe nɔ wazɔ́n ganji nɔ ɖó nǔxe é ná dó kpénukúndó eɖe kpó hwɛndó etɔn kpó go bo nɔ ɖó ayǎjɛ. É tlɛ gán sɔ́ gɔ́alɔna mɛxe to nuhudó mɛ. Onǔ etɔn nɔ jɛeji ná ogán etɔn. Kpó enɛ kpó, é ná vɛawu ɖɔ azɔ̌n ni yawu gbledó mɛxe nɔ ylɔ azɔ̌n etɔn ɖɔ nǔjɔnǔ. Owě-wíwé lɛ dóxya ɖɔ onǔ ɖagbe wɛ azɔ̌n nyí, é tlɛ ɖɔ ɖɔ “nunina Jixwéyɛxwe tɔn wɛ.”—Yɛhwexoɖɔtɔ 3:13.

“Mǐ ɖeji ɖɔ mǐ tindó ayihadahwɛnamɛnu ɖagbe ɖé, bɔ mǐ jlo nadó nɔ yinuwa kpó ahunɖokpó kpó to nulɛkpó mɛ.”—HEBLU LƐ 13:18.

Mɛxe nɔ ɖɔ nǔgbó nɔ ɖó owì to ota, é nɔ vò to eɖe mɛ bo nɔ damlɔn ganji to zánmɛ. Mɛlɛ nɔ ɖejidego bosɔ nɔ ná ɛn sísí. Amɔ́, é ma nɔ yì ɖomɔ ná mɛxe ma nɔ ɖɔ nǔgbó lɛ. Gbɔnvona enɛ, ayixa yětɔn mɛ ma nɔ vò bɔ yé nɔ to buɖi ɖɔ awò emitɔn ná gbà to gbèɖokpó.

“Mì gbɔ alixo gbɛninɔ tɔn mìtɔn ni tíin matin wǎnyina akwɛ́, ná mì ni tindó kpékɔ kpó nǔxe mì tindó lɛ kpó.”—HEBLU LƐ 13:5.

Nǔgbó wɛ ɖɔ mǐ ɖó hudó akwɛ́ tɔn nadó hɔ̀ núɖùɖù kpó dandannu gbɛ̀mɛ tɔn ɖevo lɛ kpó. Amɔ́, é ma nyɔ́ kpaali nadó nɔ ‘yiwǎnna akwɛ́.’ É gán zɔ́n bɔ mɛlɔ ná wá kpò ná azɔ̌n bo ná nɔ zán eɖe vún dó to akwɛ́ dǐn makpote. É gán hɛn nuxahun wá alɔwle etɔn mɛ, é ma ná nɔ mɔ hwenu ná ovi etɔn lɛ bo tlɛ gán dóazɔ̀n eɖe. (1 Timoti 6:9, 10) Ðevo wɛ sɔ́ nyiɖɔ, é bɔawu tawun ɖɔ mɛxe yiwǎnna akwɛ́ ni wà nǔxe ma sɔgbe nadó mɔ akwɛ́. Abajɔ dǎwe nunywɛtɔ ɖé dó ɖɔ ɖɔ: “Nǔgbónɔ ná mɔ ɖóná susu yí, cigbǎ, mɛxe to hwlɛndó jí nadó jɛ adɔkun ma ná to xomɛvɔnɔ nyí zɔnmii.”—Xóhwinhwɛ́n lɛ 28:20.

“Hwlá nǔnywɛ nyɔ́-ná-yizan kpó nugokpíkpé nulɛnkpɔ́n tɔn kpó.”—XÓHWINHWƐ́N LƐ 3:21.

Wekpínkplɔ́n ɖagbe nɔ gɔ́alɔna mǐ nadó lɛzun mɛxo kavǐ mɛjitɔ xe go yè gán ɖejidó. Amɔ́, mǐ kplɔ́nwe ganji ma ko dóxya ɖɔ mǐ ná vò kavǐ dó ayǎjɛ to gbɛ̀mɛ. Ná nulɛ nidó kpà mǐ nǔgbónǔgbó, mǐ ɖó hudó okplɔ́n xe Jixwéyɛxwe nɔ namɛ tɔn. Owě-wíwé lɛ dóxya ɖɔ “nuɖékpókpé xe” mɛxe nɔ ɖotoaina Jixwéyɛxwe nɔ “wà ná nɔ tindó kɔɖetɔn ɖagbe.”—Salmu lɛ 1:1-3.