NUXEWUTU SÍSÍ NINÁ MƐÐÉTITI DO NYÍ NUJƆNU

• Dodinnanu ɖé dóxya ɖɔ mɛxe nɔ mɔ ovɔ́ mɛ ná yeɖe lɛ gǎn nɔ yawu kpò ná lɛnkpɔ́n kpó akpɔcimɛ kpó, kpóɖɔ yé gǎn nɔma ɖùnú ganji kavǐ gǎn nɔ ɖùnú zɛjlɛgo. É gǎn sɔ́ nɔ bɔawuna yé nadó cì ahàn sínsínnyɛ kpó amasin aɖínɔ kpó zán.

• Mɛxe nɔ ná sísí yeɖetiti lɛ ma nɔ yí yeɖe jlɛdó mɛɖévo lɛ go. Enɛwutu, yé gǎn nɔ wanu dókpɔ́ xɛ́ mɛxe lɛdó yé lɛ bɔ xɔ́ntɔn xe yé ná jí lɛ ná nɔ nyí xɔ́ntɔn alɔmayiemɛ lɛ. Amɔ́, mɛxe ma nɔ ná sísí yeɖe sɔmɔ lɛ gǎn nɔ yawu mɔxoɖɔdómɛgo, exe gǎn zɔ́n bɔ nuwadókpɔ́ xɛ́ mɛɖévo lɛ ná vɛawu.

• Enyí adán tlɛ gbò mɛxe nɔ ná sísí yeɖetiti lɛ, yé ma nɔ jogbe. Yé ma nɔ ɖike ná nuxahun lɛ ni glɔnalina yé ma nadó jɛ nyawle yětɔn kɔ̀n. Amɔ́, mɛxe ma nɔ ná sísí yeɖetiti sɔmɔ lɛ nɔ saba yí nuxahun flinflin lɛ dó mɔ nuxahun sínsínnyɛ. Kpó enɛ kpó, yé gǎn nɔ yawu xònúkpla.

 NǓXE A GǍN WÀ

Nɔ ɖè xɔ́ntɔn xe gǎn jlɔ we dote lɛ. Nɔ dógbɛ́ xɛ́ mɛxe nɔ símɛ, bɔ onǔ towe nɔ ɖuahunmɛna nǔgbónǔgbó, bɔ yé gǎn ná we tuli lɛ.

Nɔ gɔ́alɔnamɛ. A ná ɖó ayǎjɛ jɔ ayǎjɛ xe nunamɛ nɔ hɛnwa enyí a nɔ jɔmɛ bo nɔ wà ɖagbe namɛ, etlɛ nyí ná mɛxe ma gǎn wá sú axɔ́ etɔn we lɛ. A ná ɖó ayǎjɛ, enyí mɛlɛ ma tlɛ ɖoayi ɖagbe xe a wà lɔ go.

Kplɔ́n ovi towe lɛ nadó nɔ ná sísí yeɖetiti. Alixo ɖé xe mɛ a gǎn wàmɔ te wɛ nadó nɔ ɖike yelɔsu ni dǐn kpɔ́ngbɔ ná nuxahun yětɔn lɛ, jɛ obá xe mɛ yé gǎn hɛn jɛ. Kpó enɛ kpó, ovi lɛ nɔ kplɔ́n nadó kpéxɛ́ nuxahun lɛ bosɔ ɖuto yé jí. Exe nɔ gɔ́alɔna ovi lɛ nadó nɔ ná sísí yeɖetiti bɔ yé sɔ́ nɔ ɖuale etɔn enyí yé hwɛ́n mɛxo.