Sísí Nina Mɛɖévo Lɛ
NUXEWUTU SÍSÍ NINÁ MƐÐÉVO LƐ DO NYÍ NUJƆNU
Enyí mǐ nɔ sí mɛɖévo lɛ, é nɔ zɔ́n bɔ mǐ ma nɔ hɛn ninɔmɛ ɖé vantan dógɔ́.
-
Oló Biblu tɔn ɖé ɖɔ ɖɔ: “Gblɔndó xe nyí nina kpó ogbè dɛɛdɛ kpó nɔ lilɛ́ aɖi sɛ̀, cigbǎ, xogbe kàunkàun nɔ fɔ́n xomɛgble dote.” (Xóhwinhwɛ́n lɛ 15:1) Oxó kpó walɔ mɛmasí tɔn lɛ kpó ma nɔ wà ɖagbe ɖé, é nɔ hɛn nulɛ vantan kpoun wɛ.
-
Jesu ɖɔ ɖɔ: “Sɔ́n susugégé nǔxe tíin to ahun mɛ lɛ tɔn mɛ wɛ onù nɔ ɖɔtɔ́n.” (Matiu 12:34) Oxó mɛmasí tɔn lɛ ɖiɖɔ nɔ dó nǔxe mǐ nɔ lɛn gandó mɛxe akɔ̀, hɛnnu kavǐ ninɔmɛ gbɛ̀mɛ tɔn yětɔn gbɔnvo ná mǐtɔn go lɛ xya.
Yè basí dódinnanu ɖé to agɔe bo kanxose gbɛtɔ́ 32 000 linlán to otò 28 mɛ. Húgán odaa mɛlɔ lɛ tɔn wɛ ɖɔ ɖɔ yé ma ko mɔ mɛmasí xe to ayihɔ́n lɔ mɛ todin nkɔ kpɔ́n.
NǓXE A GǍN WÀ
Nɔ ná sísí mɛlɛkpó to wexɔmɛ kavǐ azɔ́nmɛ, enyí linlɛn mìtɔn lɛ ma tlɛ nɔ nyí nuɖokpólɔ. Nɔ dǐn nǔxe jí mì gǎn ɖó linlɛn ɖokpólɔ́ ɖó lɛ. Enɛ ná zɔ́n bɔ a ma ná nɔ mɔxoɖɔdómɛgo kavǐ dahwɛnamɛ.
Nue a jlo ɖɔ yè ni nɔ wà ná we wɛ a ni nɔ wà ná mɛɖévo lɛ. Enyí a nɔ jɔmɛ xɛ́ mɛɖévo lɛ bo ma nɔ yinuwa xɛ́ yé to alixo agɔ̀ mɛ, é nyɔbasí tawun ɖɔ yelɔsu ni wà nuɖokpólɔ ná we.
Nɔ jonamɛ. Enyí mɛɖé cì xoɖɔna we kavǐ cinuwa dó we, nɔ miɔnnukúndó bo nɔ ɖɔna ɖewe ɖɔ mɛlɔ ma ɖesɔn ojlǒ mɛ dó wàmɔ.
NǓXE MǏ TO WIWÀ
To fie Kunnuɖetɔ Jehovah tɔn lɛ nɔ nɔ̀ bosɔ nɔ wazɔ́n te lɛ, yé nɔ ná sísí gbɛtɔ́ lɛ.
Mǐ nɔ dó nǔxe Biblu ɖɔ xya mɛlɛkpó vɔ̌nu amɔ́, mǐ ma nɔ zín nuyise kpó linlɛn mǐtɔn lɛ kpó dó mɛɖévo lɛ jí. Mǐ nɔ tɛnkpɔ́n bo nɔ xodó ayinamɛ Biblu tɔn bo nɔ yí “walɔmimiɔn kpó sísí sǐsosǐso kpó” dó ɖɔ nǔxe to Biblu mɛ ná yé.—1 Pita 3:15; 2 Timoti 2:24.
Mǐ ma nɔ ɖè mɛɖé dóvo, kpóɖɔ to okpli mǐtɔn lɛ jí, mǐ nɔ kɛalɔyi mɛɖékpókpé xe jlo ná nyɔ́ nǔxe Biblu kplɔ́nmɛ lɛ, maxokpɔ́nna ninɔmɛ gbɛ̀mɛ tɔn mɛlɔ tɔn. Mǐ nɔ tɛnkpɔ́n nadó jɔmɛ bo nɔ ná sísí xe jɛ “gbɛtɔ́ wunmɛ lɛkpó.”—1 Pita 2:17.
Mǐ nɔ ná sísí acɛkpikpa xe to lɛdó xe mɛ mǐ nɔ nɔ̀. (Lomunu lɛ 13:1) Mǐ nɔ yìn-sɛ́n bosɔ nɔ sú takwɛ́. Nǔgbó wɛ ɖɔ mǐ ma nɔ ɖoalɔ to tonuɖiɖɔ mɛ, amɔ́ mǐ nɔ ná sísí jlɔjɛ xe mɛɖévo lɛ ɖó nadó ɖè nǔxe jlo yé ná nǔxe ɖù hwɛxo tonuɖiɖɔ tɔn lɛ.
