“Mì nyí magbɔjɛnɔ ná osɔ xe ja gbeɖe blo, ná osɔ xe ja ná tindó magbɔjɛ etɔn titi lɛ.”—MATIU 6:34.

Zɛɛmɛ: Mǐ ma gán dakpana lɛnkpɔ́n mlɛnmlɛn. Amɔ́, ma nɔ yí lɛnkpɔ́n kavǐ magbɔjɛ osɔ xe ja tɔn lɛ dógɔ́ egbexe tɔn lɛ blo. Nɔ ɖɔ azán ɖokpóɖokpó tɔn.

• Lɛnkpɔ́n glanglan gán hɛn we jɛflumɛ. Enɛwutu, tɛ́n exe kpɔ́n: Tintan, hɛn dó ayixa mɛ ɖɔ ninɔmɛ gbɛ̀mɛ tɔn ɖélɛ nɔ hɛn lɛnkpɔ́n wá dandan. Amɔ́, nuxixa zɛjlɛgo nɔ hɛn nulɛ vantan. Awetɔ, nɔ flinɖɔ nulɛ ma nɔ saba yì ɖó lěxe mǐ lɛn ɖó.

“Nǔnywɛ xe wá sɔ́n aga . . . nyí lɛnkpɔ́n ɖagbenɔ.”—JAKƆBU 3:17.

Zɛɛmɛ: Ma nɔ ɖonukún ɖɔ nulɛkpó ná yì ɖó lěxe a jlo ɖó blo. Nɔ nɔ̀ jlɛkaji to nǔxe a nɔ ɖonukún sɔ́n ɖewe kpó mɛɖévo lɛ kpó sí mɛ.

• Nyí hwihwɛnɔ kpóɖɔ lɛnkpɔ́n ɖagbenɔ, bo nywɛ ɖɔ nugokpíkpé towe kpó mɛɖévo lɛ kpó tɔn ɖó dógbó. Mɔwiwà ná zɔ́n bɔ a ná ɖé lɛnkpɔ́n kpò ná ɖewe kpó mɛxe lɛdó we lɛ kpó bɔ nulɛ nasɔ́ yì ganji. Humɔ, nɔ ɖɔ fànfún. Enyí a nɔ konu to hwenue nulɛ ma tlɛ to yìyì ganji, enɛ ná ɖé lɛnkpɔ́n kpò ná we bo ná we ayǎjɛ jɛ obá ɖé mɛ.

“Mɛxe tindó wuntuntun ná nɔ gbɔci abɔɛ.”—XÓHWINHWƐ́N LƐ 17:27.

Zɛɛmɛ: Numɔtolanmɛ agɔ̀ lɛ gán zɔ́n bɔ a ma ná lɛnnukpɔ́n ganji ba, enɛwutu nɔ ɖuto ɖewe jí.

• Tɛnkpɔ́n bo nyɔ́ nǔxe to lɛnkpɔ́n hɛnwa ná we bo ɖoayi lěxe a to nuyiwa sɔta ɛ ɖó go. Ði akpajlɛ̌, enyí nuɖé hɛn we byɔ́ lɛnkpɔ́n mɛ, ɖoayi linlɛn, numɔtolanmɛ kpó nuyiwa towe lɛ kpó go, kpóɖɔ a tlɛ gán kàn yé ɖayǐ. Enyí a nyɔ́ alixo xe mɛ a to nuyiwa sɔta lɛnkpɔ́n te, é gán bɔawuna we nadó ɖudeji. Humɔ, nɔ kàn ayixa nadó ɖé nǔxe nɔ hɛn lɛnkpɔ́n wá ná we lɛ kpò. Enyí é ma kpà we, dǐn alixo lɛ nadó nɔ ɖuto yé jí, vlavo a gán hɛn alixo azɔ́nwiwa tɔn towe kpɔ́nte kavǐ zán hwenu towe kpó nǔnywɛ kpó dógɔ́.

• Nɔ ɖyɔ́ linlɛn towe. Nǔxe nɔ hɛn we byɔ́ lɛnkpɔ́n mɛ gán nɔma nyí onǔ sínsínnyɛ ná mɛɖévo. Kpókpólɛkpó nɔ sínai dó alixo xe mɛ mɛɖokpóɖokpó nɔ lɛnnukpɔ́n te jí. Kpɔ́n ayinamɛ atɔ̀n exelɛ:

  1. Ma nɔ yawu wá taɖona agɔ̀ kɔ̀n blo. Vlavo, mɛɖé wɛ sún vaun bo wá cí nukɔnna we to hwenue mì to ɖebɔdó-dego nadó wà nuɖé. Enyí a lɛnɖɔ mɛlɔ nywɛ fɛɛ dó wàmɔ, xomɛ gán gble we. Kakatimɔ, be é ma ná kpɔ́nte nadó lɛnɖɔ é ma nywɛ dó basí ya? É gán nyiɖɔ nǔgbó lɔ ninyɛ.

  2. Nɔ kpɔ́n adà ɖagbe nulɛ tɔn. Enyí ninɔmɛ ɖé byɔ́ ɖɔ a ni nɔte to dotoxwé kavǐ to agahun-glintɛn ɖé ná ojlɛ̌ dindɛn, a ná dakpana lɛnkpɔ́n enyí a yí ojlɛ̌ enɛ dó xyawe, wazɔ́n to ɔdinatɛɛ jí kavǐ xya wekanhlanmɛ xe to alokan towe jí lɛ.

  3. Nɔ mɔnú zɛ̀ nuxahun lɛ go. Kanse ɖewe ɖɔ, ‘Be ninɔmɛ exe ná gbɛ́ nyí nuxahun to osɔ kavǐ to osɛ xe ja mɛ wɛ ya?’ Nɔ nyɔ́ vogbingbɔn to nuxahun flinflin kpó ninɔmɛ sínsínnyɛ lɛ kpó cɛncɛn.

“Mì gbɔ nulɛkpó ni nɔ nyí wiwà ɖilě é jɛ ɖó kpóɖɔ to titoji.”—1 KƆLINTINU LƐ 14:40.

Zɛɛmɛ: Gbɛ́zan towe ni nɔ nɔ̀ titoji.

• Mǐ nɔ jlo ɖɔ nulɛ ni yì ganji to gbɛzǎn mǐtɔn mɛ. Ðokpó to nǔxe gán hɛn tito mǐtɔn lɛ gble bo ɖó lɛnkpɔ́n ná mǐ lɛ mɛ wɛ gbàndindɔn, kpóɖɔ exe gán zɔ́n bɔ azɔ̌n ná fɔ́n bo to kpíkpli ɖayǐ ná we makpote. Be a gán tɛ́n ayinamɛ exelɛ kpɔ́n ya?

  1. Nɔ basí tito nǔxe a ɖóná wà lɛ tɔn, bo nɔ xodó é.

  2. Nɔ ɖoayi nǔxe nɔ zɔ́n bɔ a nɔ dɔngbàn lɛ go bo basí vɔjlaɖo.

“Gbɔjɛ vuɖe kpɔ́nte xú kanvinván zɛjlɛgo kpó wezundidó to jɛhɔn godo kpó.”—YƐHWEXOÐƆTƆ 4:6.

Zɛɛmɛ: Mɛxe yiwǎnna azɔ̌n gbau lɛ ma nɔ mɔaleyi sɔ́n “kanvinván zɛjlɛgo” yětɔn mɛ. Yé masɔ nɔ ɖó hwenu kavǐ xúhlɔn xe ná zɔ́n bɔ yé ná ɖǔvivi azɔ̌n yětɔn tɔn.

• Nɔ zé azɔ̌n kpó akwɛ́ kpó dó otɛn yětɔn mɛ. Akwɛ́ susu tintindó ma nɔ namɛ ayǎjɛ kavǐ ɖé lɛnkpɔ́n kpò. É tlɛ gán tlɔmɛ. Yɛhwexoɖɔtɔ 5:12 ɖɔ ɖɔ, “nutindó susugégé adɔkunnɔ tɔn ma nɔ ná ɛn agbɔ́ nadó damlɔn.” Enɛwutu, nɔ tindó kpékɔ to nǔxe a ɖó lɛ mɛ.

• Nɔ dǐn hwenu nadó ɖeayiɖai. Lɛnkpɔ́n towe ná ɖekpò enyí a nɔ daihun xe a yiwǎnna lɛ. Amɔ́, ayiɖeɖayǐ xe ma nɔ byɔ́ vivɛnudidó sɔmɔ lɛ, tayiɖi televiziɔn kpínkpɔ́n gán nɔma gɔalɔ.

• Nɔ yí nǔnywɛ dó zán alokan, tablɛti kpó onǔ mɔnkɔ ɖevo lɛ kpó. Nɔ dakpana wekanhlanmɛ alokan jí tɔn lɛ kpínkpɔ́n hwɛhwɛ, kavǐ Intɛnɛt jí yìyì hwekpókpónu nadó ɖɔxo xɛ́ xɔ́ntɔn lɛ. Adavo é byɔ́ ɖomɔ, ma nɔ xya wekanhlanmɛ xe gandó azɔ̌n go lɛ to azɔ̌n godo blo.

“Agbasa yiyizan nyí alenu ná onǔ vuɖe.”—1 TIMOTI 4:8.

Zɛɛmɛ: É nɔ nyɔ́ ɖɔ yè ni zán agbasa hwɛhwɛ.

• Wleawuna aca ɖagbe lɛ. Agbasa yiyizan gán zɔ́n bɔ a ná vò sɔ́n ayixa mɛ. Nɔ ɖù núɖùɖù xe ná ná we hunsinɖagbe; kpóɖɔ nɔ ɖùnú dó gànmɛ. Nɔ gbɔjɛ ganji.

• Nɔ dakpana kpɔ́ngbɔ agɔ̀ dindin ná lɛnkpɔ́n, tayiɖi azɔ̀-nùnù, amasin aɖínɔ kavǐ ahàn sínsínnyɛ cicizan. Ðilě ojlɛ̌ to yìyì, aca exelɛ nɔ hɛn lɛnkpɔ́n wá dógɔ́ bo tlɛ gán bɛ́kpla agbasalilo towe bosɔ vɔ̀ akwɛ́ ná we.

• Yì dotoxwé enyí lɛnkpɔ́n towe ɖi nǔxe ma gán kpɔ́nte. Alɔgɔ doto ɖé tɔn dindin ma nyí winnyanu.

“Mɔdóna nǔxe nyí nǔjɔnǔ húgǎn lɛ.”—FILIPINU LƐ 1:10.

Zɛɛmɛ: Xwesɔ bo ɖé nǔxe ná nɔ otɛn tintan mɛ ná we lɛ.

• Nɔ tɛnkpɔ́n nadó nyɔ́ azɔ̌n xe nyí nǔjɔnǔ húgǎn lɛ. Exe ná gɔ́alɔna we nadó nɔ ná ayiɖonugo azɔ̌n xe to niyaniya mɛ lɛ, bo nyɔ́ ɖexe a gán wà to nukɔn mɛ lɛ, ɖexe a gán ɖena mɛɖévo, kavǐ tlɛ jodó lɛ.

• Ná osɛ ɖokpó, zé ayixa dó lěxe a nɔ zán hwenu towe ɖó jí. Enɛgodo, dǐn alixo ɖevo lɛ nadó zán hwenu towe ganji dógɔ́. Mɔwiwà ná zɔ́n bɔ azɔ̌n ma ná nɔ kpli dó kɔ̀ji ná we.

• Nɔ ɖé hwenu dóvo nadó gbɔjɛ. Ojlɛ̌ kleunkleun ɖélɛ yíyí dó ɖé ayixa sɔ́n azɔ̌n jí gán vɔ́ xúhlɔn ná we bɔ lɛnkpɔ́n towe ná ɖekpò.

“Magbɔjɛ xe to ahun gbɛtɔ́ tɔn mɛ nɔ hɛn agbàn kpɛ̀n ɛn, cigbǎ, oxó ɖagbe nɔ vɔ́ zodólanmɛna ɛn.”—XÓHWINHWƐ́N LƐ 12:25.

Zɛɛmɛ: Oxó ɖagbe lɛ sisè gán wà ɖagbe ná we.

• Nɔ ɖɔxodó nǔxe to tukladó we lɛ jí xɛ́ mɛxe gán mɔnukúnnujɛemɛ ɖé. Omɛ mɔnkɔ gán gɔ́alɔna we nadó mɔ nulɛ to alixo ɖevo mɛ kavǐ ɖé ayixa ɖagbe ɖé tɔ́n xe a ma ná ayiɖonugo sɔmɔ. Hoɖiɖɔ tɔ́n gán zɔ́n bɔ a ná vò to ɖewe mɛ.

• Nɔ byɔ́ alɔgɔ. Enyí azɔ̌n sù dó we, be a gán ɖé vuɖe ná mɛɖévo kavǐ byɔ́ ɖɔ mɛɖé ni wazɔ́n xɛ́ we ya?

• Enyí nuyiwa azɔ́nwatɔgbɛ́ ɖé tɔn wɛ nɔ hɛn we byɔ́ lɛnkpɔ́n mɛ, dǐn alixo lɛ nadó vɔ́ ninɔmɛ lɔ jlaɖo. Ði akpajlɛ̌, a gán dɔnsɛkpɔ́ mɛlɔ bo yí ogbè fifá dó ɖɔ numɔtolanmɛ towe lɛ ná ɛn gandó hwɛxo lɔ go. (Xóhwinhwɛ́n lɛ 17:27) Enyí enɛ ma kpà we, be a gán ɖé hwenu xe a nɔ zán xɛ́ mɛlɔ kpò ya?

“Ayǎjɛnɔ wɛ mɛxe nywɛ ɖɔ yé tindó nuhudó gbigbɔmɛ tɔn lɛ.”—MATIU 5:3.

Zɛɛmɛ: É ma nyí núɖùɖù, avɔ̀ kpó oxɔ̀ kpó kɛ́ɖɛ́ sín hudó wɛ gbɛtɔ́ dó. Mǐ dó nuhudó gbigbɔmɛ tɔn lɛ. Nadó ɖó ayǎjɛ, mǐ ɖóná nywɛ ɖɔ mǐ tindó nuhudó enɛ bo nɔ hɛn kpékɔ wá ná ɛn.

• Ðɛ̀xixo nɔ gɔalɔ tawun. Jixwéyɛxwe jlo ɖɔ a ni ‘to magbɔjɛ towe lɛkpó bɛ́ dlan ewɔ jí, ná é to towe xòkpɔ́n wutu.’ (1 Pita 5:7) Ðɛ̀xixo kpó ayixamɛlinlɛnkpɔ́n dó nuɖagbe lɛ jí kpó gán ná we jijɔxo ahun mɛ tɔn.—Filipinu lɛ 4:6, 7.

• Nɔ xya nǔxe ná hɛn we dɔnsɛkpɔ́ Jixwéyɛxwe lɛ. Ayinamɛ xe to linlinwe exe mɛ lɛ wá sɔ́n Biblu mɛ, yèɖɔ owě xe nyí kinkan nadó hɛn kpékɔ wá ná nuhudó gbigbɔmɛ tɔn mǐtɔn lɛ. Ayinamɛ enɛlɛ sɔ́ nɔ zɔ́n bɔ yè nɔ tindó “nǔnywɛ nyɔ́-ná-yizan kpó nugokpíkpé nulɛnkpɔ́n tɔn kpó.” (Xóhwinhwɛ́n lɛ 3:21) Be é ma ná nyɔ́ ɖɔ a ni yí Biblu xixya dó dó nyawle ya? A gán bɛ́sɔn owě Xóhwinhwɛ́n lɛ tɔn jí.