Nukplɔ́nmɛ Biblu tɔn lɛ ɖoxuhlɔn tawun bo gǎn ɖyɔ́ gbɛzǎn mɛtɔn. Kpɔ́n akpajlɛ̌ omɛ awe exelɛ tɔn: Ricardo kpó Andres kpó.

RICARDO: Oxwe 15 kpoun wɛ n’ɖó bo jɛ gbɛdó xɛ́ jaguda-gbɛ́ ɖé jí. Nuyiwa xɔ́ntɔn ce exelɛ tɔn bɛ́kplá mi tawun. É tlɛ lɛzun ojlǒ ce nadó yì sɛ̀ngàn ná oxwe ao! É gǎn ɖi gúgú sín nǔ. Amɔ̌ to lɛ̌dó ce mɛ, mɛlɛ nɔ mɔ mɛxe ko sɛ̀ngàn kpɔ́n lɛ ɖi mɛjɔmɛ bo nɔ sí yé. Nǔxe ka nɔ jlo nyɛlɔsu ninyɛ.

N’ɖoalɔ to nǔxe jaguda lɛ nɔ wà lɛkpó mɛ, kakajɛ amà-nùnù, gblewa kpó danuwiwa kpó jí. To zánmɛ gbèɖokpó, jaguda-gbɛ́ mǐtɔn kpé avùn xɛ́ kpíkpli ɖé bɔ mǐ ɖesò dó míɖelɛ baɖabaɖa. N’ko mɔ okú ce hlán, amɔ̌ nuɖé ma wà mi. To enɛgodo, n’jɛ nulɛnkpɔ́n jí tawun dó gbɛzǎn ce kpó nǔxe wà n’te lɛ kpó jí, bɔ n’basí ɖiɖe nadó ɖyɔ́. Amɔ̌ nawɛ n’gǎn ɖyɔ́ gbɔn? Fie wɛ n’ná mɔ alɔgɔ sɔ́n?

Suhúgǎn hɛnnumɛ ce lɛ tɔn wɛ ma ɖó ayǎjɛ. Gbɛzǎn yětɔn gɔ́ ná nuxahun. Amɔ̌, hwɛndo ylɔnɛn ce ɖé tɔn ka ɖó ayǎjɛ. N’nywɛ ɖɔ gbɛtɔ́ ɖagbe wɛ yé nyí, kpóɖɔ nǔxe Biblu ɖɔ wɛ nɔ ɖeanana gbɛzǎn yětɔn. Yé tlɛ ko dóxya mi kpɔ́n ɖɔ Jehovah wɛ Jixwéyɛxwe nɔ nyí. Enɛwutu, ojlɛ̌ ɖé to avùnxixo enɛlɔ godo, n’xoɖɛ̀ hlán Jehovah bo tlɛ ylɔ nyǐkɔ etɔn tlɔlɔ, bosɔ byɔ́ to é sí nadó gɔ́alɔna mi. É kpaca mi ɖɔ to wunkɛngbe tlolo, Kunnuɖetɔ́ Jehovah tɔn ɖé wá xúxúhɔ̀n ná mi! É sɔ́ jɛ Biblu kplɔ́n mi jí.

Amɔ̌, é ma dɛn bɔ nuɖé xwlé mi kpɔ́n tawun. Xɔ́ntɔn ce ɖáyǐ tɔn lɛ nɔ ylɔ mi to alokan jí nadó vɔ́ jɛ gbɛ̌dó xɛ́ yé jí. É ma bɔawu, amɔ̌ n’nɔ gbɛ́. N’magbe nadó zindónukɔn to Biblu kpínkplɔ́n ce mɛ kpóɖɔ é víví ná mi ɖɔ n’wàmɔ̌! Gbɛzǎn ce jɛ ɖiɖyɔ́ jí bɔ n’ɖó ayǎjɛ tawun.

N’flinɖɔ n’ɖɔná Jixwéyɛxwe to oɖɛ̀ mɛ ɖɔ, n’ko jlo kpɔ́n nadó sɛ̀ngàn ná oxwe ao, ná mɛlɛ nidó nɔ sí mi tayiɖi jaguda ɖé. Enɛwutu, n’byɔ́ ɛ ɖɔ ni ɖike ma sɛ̀n ɛn tayiɖi yɛhwexoɖɔtɔ́ hwenu-gǐgɔ́ tɔn ɖé, é hwè gbau ná oxwe ao nadó gɔ́alɔna mɛɖévo lɛ ɖilě yè gɔ́alɔna nyɛlɔsu ɖó. Ewɔ sè oɖɛ̀ ce, ná n’ko nyí yɛhwexoɖɔtɔ́ hwenu-gǐgɔ́ tɔn ná oxwe 17 todin! Kpóɖɔ n’ma ko sɛ̀ngàn kpɔ́n.

Susu to xɔ́ntɔn ce ɖayǐ tɔn lɛ mɛ wɛ ko to gànmɛ sɔ́n oxwe susu ɖie. Mɛɖévo lɛ ko kú. Enyí n’lɛnnukpɔ́ndó gbɛzǎn ce jí, n’nɔ dókpɛ́ tawun ná hɛnnumɛ ce enɛlɛ xe nyí Kunnuɖetɔ́. Yé ma ɖibu nadó gbɔnvo, bo ɖike Biblu ni nɔ ɖeanana yé. Todin, n’ɖó sísí ná yé tawun hú mɛxe to jaguda-gbɛ́ ce mɛ lɛ. Hú kpókpólɛkpó, é nɔ víví ná mi ɖɔ Jixwéyɛxwe kplɔ́n mi nadó zán gbɛzǎn ɖagbe húgǎn lɔ.

 ANDRES: Amà-nùnù, mɛxoɖu, mɛhuhu kpó galilɔ kpó gbayikpé tawun to lɛdó xe mɛ n’nyí jiji bo hwɛ́n te. Ahànnumunɔ wɛ otɔ́ ce bosɔ kpeve to amasin sínsínnyɛ (cocaïne) nùnù mɛ. Ewɔ kpó onɔ̀ ce kpó nɔ to jlɛdɔ bo nɔ to avùnxo makpote.

N’gbɛ́ kpò to ovu bo jɛ ahàn sínsínnyɛ nù jí bosɔ nɔ nù amà. N’ma nɔ saba dɔ́ xwégbè, n’nɔ to dindankpé bo nɔ to ajojɛ bosɔ nɔ to nǔxe n’ko fìn lɛ gɔ̀ sà. Nadó jixɔ́ntɔn xɛ́ mi to hwenue n’to hwinhwɛ́n ja, otɔ́ ce kplɔ́n mi lěxe yè nɔ bɛ́ amasin sínsínnyɛ kpó nuɖevo xe osɛ́n ma kɛalɔyí lɛ kpó sɔ́n tògodo bo nɔ wá sà yé ɖó. N’mɔ akwɛ́ susu to ojlɛ̌ kleun ɖé mɛ. To gbèɖokpó, kponɔ lɛ wá oxwé ce gbè bo wle mi bosɔ sahwɛdókɔna mi ɖɔ n’tɛnkpɔ́n nadó hùmɛ. Enɛwutu, yè dahwɛna mi ɖɔ n’ná sɛ̀ngàn ná oxwe atɔ́n.

To afɔnnu ɖé, yè lá bo basí oylɔna gàntɔ́ lɛ nadó wá ɖotoaina xoɖɔdókpɔ́ sínai dó Biblu jí ɖé xe Kunnuɖetɔ́ Jehovah tɔn lɛ ná ɖeanana to gànkpa lɔ mɛ. N’basí ɖiɖe nadó yì. Nǔxe n’sè lɔ víví ná mi, bɔ n’yigbe ɖɔ Kunnuɖetɔ́ lɛ ni jɛ Biblu kplɔ́n mi jí. Nǔxe Owě-wíwé lɛ ɖɔ wɛ yé nɔ kplɔ́nmɛ tlɔlɔ, bo nɔ dó walɔ xe Jixwéyɛxwe kɛalɔyí kpó ɖexe é ma kɛalɔyí lɛ kpó xya mi.

É ma dɛn bɔ n’mɔɖɔ n’ɖó hudó alɔgɔ́ tɔn nadó basí ɖyɔ̌dó xe jɛ lɛ, titewungbe ná gàntɔ́ hatɔ́ ce lɛ nɔ sìn-adán ná mi, ná yé ma yiwǎnna nǔxe kplɔ́n n’te wutu. N’byɔ́ adɔgbigbo kpó nǔnywɛ kpó to oɖɛ̀ mɛ, bɔ Jehovah gɔ́alɔna mi. N’tlɛ kpénǔgo bo nɔ yí adɔgbigbo dó ɖekunnuna gàntɔ́ hatɔ́ ɖevo lɛ gandó Biblu go.

To hwenue tundóte ce sɛkpɔ́, buɖi mi sɔmɔ̌ bɔ n’tlɛ jlo ɖɔ ma gbɔcí gànkpamɛ. To hwenue n’jlo ná yì, gàntɔ́ susu wɛ mìalɔ hlán mi nadó ɖɔ é yì hweɖenu. Mɛɖélɛ tlɛ mlán mi bo ɖɔ “Yì xwé kpoun, yɛxwenɔ.”

Obu nɔ ɖi mi enyí n’lɛnnukpɔ́ndó nǔxe gbɛzǎn ce ná ko nyí jí, enyí n’ma ko ná dotɛnmɛ Jixwéyɛxwe nadó kplɔ́n mi. N’nɔ dókpɛ́ tlala ɖɔ Jixwéyɛxwe yiwǎnna mi, bo ma kpɔ́n mi ɖi mɛxe ma gǎn ɖyɔ́ gbeɖe. a