To madɛnmɛ, Axɔ́luɖuta Jixwéyɛxwe tɔn xe mǐ ko to nukúnɖo é ma kpɔ́ lɔ, enɛ wɛ ganɖuɖu lɛdó ayihɔ́n kpé ɖé xe Jixwéyɛxwe zéɖayǐ, ná hɛn jijɔxo kpó kɔndókpɔ́ kpó wá ná mɛlɛkpó. “Jijɔxo ná sudeji,” ɖilě Salmu lɛ 72:7 ɖɔ ɖó. Amɔ̌, hwetɛnu wɛ Axɔ́luɖuta lɔ ná bɛ́ azɔ̌n tawun? Nawɛ é ná wàmɔ̌ gbɔn? Kpóɖɔ, nawɛ a sɔgǎn mɔaleyí sɔ́n ganɖuɖu exe mɛ gbɔn?

Biblu ɖɔ ɖɔ nujijɔ ayiɖego tɔn ɖélɛ ná jɔ xe ná dóxya ɖɔ Axɔ́luɖuta Jixwéyɛxwe tɔn ko sɛkpɔ́. Nujijɔ lɔ lɛkpó ná nɔkpɔ́ dó nyí “oxya” ɖé, exe bɛ́ ahwàn lɛdó ayihɔ́n kpé, xuvɛ, azɔ̀n, ayigba sisɔsisɔ susu, kpó jideji sɛ́nhɛngba tɔn kpó hɛn.—Matiu 24:3, 7, 12; Luku 21:11; Osɔ́xya 6:2-8.

Biblu sɔ́ ɖɔ nuɖevo lɛ xe ná wá jɔ ɖɔmɔ: “To azán godo tɔn lɛ mɛ, ojlɛ̌ awusínnyɛ tɔn xe vɛawu nadó kpéxɛ́ lɛ ná wá tíin. Ná gbɛtɔ́ lɛ ná nyí wǎnyina mɛɖétiti tɔ́, wǎnyina akwɛ́tɔ́, . . . tolivɛ dó mɛjitɔ́ lɛ go tɔ́, manyɔ́ɖagbenɔ, nǔgbómaɖɔtɔ́, owǎnyi jɔwamɔ tɔn matindótɔ́, gbigbɔ gbekɔndókpɔ́ tɔn matindótɔ́, mɛhɛngbletɔ́, wazɛjlɛgonɔ, kannylatɔ́, owǎnyi ɖagbewà tɔn matindótɔ́, . . . mɛxe nɔ gbɔn kikla dali yigo, wǎnyina gbɛɖuɖu tɔ́ kakati nidó nyí wǎnyina Jixwéyɛxwe tɔ́.” (2 Timoti 3:1-4) Nǔgbó wɛ ɖɔ jijɔ exelɛ ko tíin ɖayǐ jɛ obá ɖé mɛ. Amɔ̌, é ko wá sudeji to egbexe.

Ðɔɖáyǐ enɛlɛ jɛ hɛnɖi mɔ jí to 1914. Hwenuxó-kantɔ́ lɛ, tògán lɛ kpó wekantɔ́ susu kpó wɛ ɖɔxódó lěxe ayihɔ́n lɔ ɖyɔ́ bɛ́sɔn oxwe enɛ mɛ ɖó jí. Ði akpajlɛ̌, hwenuxó-kantɔ́ Danemark-nù Peter Munch wlan ɖɔmɔ: “Ahwàn xe wá aimɛ to 1914 ɖyɔ́ hwenuxó gbɛtɔ́vi lɛ tɔn. Nulɛ to yìyì ganji . . . bo wá ɖyɔ́ to ojlɛ̌ kleun ɖé gblamɛ, bɔ nugbajɛmɛji, obu, wǎngbɛ́na kpó xixɔ́ matindó kpó wá gbayikpé gbɔn filɛkpó.”

Amɔ̌, nujijɔ enɛlɛ sɔ́ dóxya ɖɔ ninɔmɛ ɖagbe lɛ ná wá to madɛnmɛ. Yé dóxya ɖɔ Axɔ́luɖuta xe ná ɖugǎn lɛdó ayihɔ́n kpé lɔ ko sɛkpɔ́. Jesu lɔsu tlɛ slɛ nuɖagbe ɖé dógɔ́ oxya azán godo tɔn lɛ tɔn, bo ɖɔmɔ: “Yɛhwexo wɛnɖagbe Axɔ́luɖuta lɔ tɔn exe ná nyí ɖiɖɔ to ayigba fininɔ lɛkpó jí tayiɖi okunnu ɖé ná akɔta lɛkpó, kpóɖɔ hwenɛnu wɛ okpódó lɔ ná wá.”—Matiu 24:14.

Wɛnɖagbe exe wɛ nyí owɛ̀n tangan xe Kunnuɖetɔ́ Jehovah tɔn lɛ nɔ lá. Xósɔ́ linlinwe xe yé nɔ má húgǎn tɔn wɛ Atɔ̀xɔ̀-Nuxixɔ́ lɔ Tɔn Xe to Axɔ́luɖuta Jehovah Tɔn Lá. É ɖɔxódó nuɖagbe xe Axɔ́luɖuta Jixwéyɛxwe tɔn ná wá wà ná gbɛtɔ́vi lɛ kpó ayigba kpó jí.

Onǔ titewungbe ɛnɛ ɖélɛ ɖie xe ná gblɔndó ná kanbyɔ́ enɛ:

1. Tònuɖɔtɔ́ ayihɔ́n exe tɔn ɖékpókpé ma ná ɖó maxɛ́ to Axɔ́luɖuta lɔ mɛ.

2. Ná tònuɖɔtɔ́ ayihɔ́n exe tɔn lɛ ma ná jlo nadó jo ogǎntɛn yětɔn dó wutu, yé ná gbɔn wunvi dali ɖyɔ́nukúnsɔ́ Axɔ́luɖuta Jixwéyɛxwe tɔn.—Salmu lɛ 2:2-9.

3. Axɔ́luɖuta Jixwéyɛxwe tɔn ná và ganɖuɖu ayihɔ́n tɔn xe ná gbɛ́ jlo nadó to ganɖu dó gbɛtɔ́vi jí lɛ sudó. (Daniɛlì 2:44; Osɔ́xya 19:17-21) Ahwàn lɛdó ayihɔ́n kpé godo tɔn exe nyí yiylɔ́ɖɔ Amagɛdɔni.—Osɔ́xya 16:14, 16.

4. Mɛxe ná ɖesɔn ojlǒ mɛ bo litaina Axɔ́luɖuta Jixwéyɛxwe tɔn lɛkpó ná lùn Amagɛdɔni tɔ́n bo ná byɔ́ ayihɔ́n yɔ́yɔ́ jijɔxo tɔn ɖé mɛ. Yé ná nɔkpɔ́ dó nyí “gbɛtɔ́ susugégé ɖé” xe Biblu ɖɔxó etɔn, exe sɔxa yětɔn ná yì livi susu lɛ.—Osɔ́xya 7:9, 10, 13, 14.

Onǔ tintan xe a gǎn wà nadó nɔ Axɔ́luɖuta Jixwéyɛxwe tɔn glɔ̌ wɛ nadó kplɔ́nnǔ. Jesu ɖɔ to oɖɛ̀ mɛ hlán Jixwéyɛxwe ɖɔmɔ: “Exe wɛ ogbɛ̀ maɖokpodó, ɖɔ yé ni wá nyɔ́ hyɛ Jixwéyɛxwe nǔgbó ɖokpó kɛ́ɖɛ́ lɔ, kpóɖɔ mɛxe hyɛ dóhlan, yèɖɔ Jesu Klisti.”—Johanu 17:3.

Enyí gbɛtɔ́ lɛ tɛnkpɔ́n bo wá nyɔ́ Jehovah Jixwéyɛxwe, yé nɔ mɔ ale susu yí. Gbɔ mǐ ni kpɔ́n awe kpoun to ale lɔ lɛ mɛ: Tintan, yé nɔ tindó yǐse nǔjɔnǔ tɔn to ewɔ mɛ. Yǐse xe lodó exe nɔ hɛn yé kudeji ɖɔ Axɔ́luɖuta Jixwéyɛxwe tɔn ná wá nǔgbó bo ko sɔ́ sɛkpɔ́. (Heblu lɛ 11:1) Awetɔ́, owǎnyi yětɔn ná Jixwéyɛxwe kpóɖɔ ná kɔmɛnu yětɔn nɔ sínnyɛ deji. Owǎnyi ná Jixwéyɛxwe nɔ hwàn yé nadó setonuna ɛn sɔ́n ahun mɛ wá. Owǎnyi ná kɔmɛnu nɔ hwàn yé nadó yinuwa sɔgbe xɛ́ xogbe Jesu tɔn lɛ xe mɛɖélɛ nɔ ylɔɖɔ Osɛ́n Síka tɔn. É ɖɔmɔ: “Kɛ́ɖɛ́ɖilě mìwlɛ jlo ɖɔ gbɛtɔ́ lɛ ni nɔ wà ná mì ɖó, mɔ wɛ mì ni nɔ wà ná yé ɖó.”—Luku 6:31.

Tayiɖi otɔ́ owǎnyinɔ ɖé, nuɖagbe húgǎn lɛ wɛ Mɛdatɔ́ mǐtɔn nɔ jlo ná mǐ. É jlo ɖɔ mǐ ni ɖǔvivi ogbɛ̀ xe Biblu ylɔɖɔ “ogbɛ̀ nǔjɔnǔ tɔn.” (1 Timoti 6:19) Ogbɛ̀ dintɔn ma nyí “ogbɛ̀ nǔjɔnǔ tɔn” lɔ. Ná gbɛtɔ́ livi susu lɛ wɛ gbɛninɔ nɔ vɛawuna tawun to egbexe. Nadó nyɔ́ nǔxe “ogbɛ̀ nǔjɔnǔ tɔn” lɔ ná bɛ́hɛn lɛ, kpɔ́n nuɖagbe ɖélɛ xe Axɔ́luɖuta Jixwéyɛxwe tɔn ná wà ná mɛxe jí é ná ɖugǎn dó lɛ.