To tito tintɔ́n wexɔmɛ tɔn ɖé hwenu, yè sahwɛdókɔna sunnu jɔja ɖélɛ ɖɔ yé zanxɛ́ wexɔmɛvi sunnu ɖé gǎnnugǎnnu. Wexɔmɛ xe ma nyí axɔ́lu tɔn bo ɖinyǐ tawun ɖé wɛ yemɛkpó nɔ yì to Canada. To hwenue nulɔ jɔ godo, Leonard Stern wlan to linlinwe ɖé mɛ ɖɔmɔ: “Enyí jɔja lɛ tlɛ nyɔnuin, sewě, bosɔ ɖó akwɛ́ tawun, enɛ ma nɔ glɔnalina yé nadó wà nunylakan.”—Ottawa Citizen.

Stern sɔ́ ɖɔmɔ: “Mǐ nɔ saba lɛnɖɔ okplɔ́n ɖagbe niná ovi lɛ wɛ ɖóná nɔ ɖuahunmɛna mɛjitɔ́ lɛ húgǎn. Amɔ̌, é ɖi ɖɔ nǔxe nɔ ɖuahunmɛna mɛjitɔ́ lɛ húgǎn wɛ nyíɖɔ ovi lɛ ni sewě bo wá gézé to gbɛ̀mɛ.”

Nǔgbó wɛ ɖɔ wexɔmɛ yìyì nyí nǔjɔnǔ. Amɔ̌, wekpínkplɔ́n ayihɔ́n tɔn ɖagbe húgǎn ma gǎn gɔ́alɔnamɛ nadó ɖuto ojlǒ kavǐ linlɛn agɔ̀ lɛ jí. Todin, fie wɛ mǐ gǎn mɔ nukplɔ́nmɛ xe ná gɔ́alɔna mǐ nadó tindó walɔ ɖagbe te?

Biblu tayiɖi mɛkpɔ́nnu ɖé. Enyí mǐ nɔ xya ɛ, é ná gɔ́alɔna mǐ nadó ɖoayi walɔ nylakan mǐtɔn lɛ go. (Jakɔbu 1:23-25) Amɔ̌, é ma nyí enɛ kɛ́ɖɛ́ wɛ Biblu nɔ wà. É sɔ́ nɔ gɔ́alɔnamɛ nadó ɖyɔ́, bɔ yè nɔ wleawuna jijɔ ɖagbe lɛ xe nɔ zɔ́n bɔ jijɔxo kpó kpɔ́ninɔ kpó nɔ tíin. Ðelɛ to jijɔ enɛlɛ mɛ wɛ, ɖagbewà, xomɛɖagbe, xomɛfa, mawazɛjlɛ̌go kpó owǎnyi kpó. Owǎnyi tlɛ nyí yiylɔ́ɖɔ “gɛdɛ xe nɔ kɔ̀n gbɛtɔ́ lɛ dókpɔ́ to alixo kpíkpé ɖé mɛ.” (Kolosinu lɛ 3:14) Naegbɔ̌n owǎnyi dó ɖoxuhlɔn sɔmɔ? Kpɔ́n nǔxe Biblu ɖɔ gandego.

• “Owǎnyi nɔ faxomɛ bo nɔ nyí xomɛɖagbenɔ. Owǎnyi ma nɔ hwànwu. É ma nɔ zé eɖe daga, ma nɔ kla [kavǐ, yigo], ma nɔ wanu jɛagɔ, ma nɔ dín ale eɖetiti tɔn lɛ, ma nɔ gblexomɛ akplà. É ma nɔ basí kanɖayǐ nuciwa tɔn. É ma nɔ jaya to mawadǒdó [kavǐ, nunylakan] mɛ, cigbǎ nɔ jaya to nǔgbó mɛ. É nɔ cinnyɔnudó nulɛkpó, . . . nɔ ɖoakɔnna nulɛkpó. Owǎnyi ma nɔ gboawukpo gbeɖe.”—1 Kɔlintinu lɛ 13:4-8.

• “Owǎnyi ma nɔ wà nunylakan dó kɔmɛnu etɔn go.”—Lomunu lɛ 13:10.

• “Hú kpókpólɛkpó, mì tindó owǎnyi sìsosìso ná oɖe awetɔ́, ná owǎnyi nɔ cinnyɔnudó nyladó susugégé.”—1 Pita 4:8.

Enyí a to mɛxe yiwǎnna we lɛ cɛncɛn, nawɛ é nɔ cí ná we? Be a ma nɔ mɔɖɔ emi to xixɔ́ mɛ, bo nɔ voawu bɔ ayixa towe sɔ́ nɔ jayǐ ya? Mɔ̌wɛ, ná a nywɛ ɖɔ yé nɔ dín ɖagbe towe, bo ma nǎ ɖesɔ́n ojlǒ mɛ gbeɖe nadó wadanu dó we to alixo ɖékpókpé mɛ.

Owǎnyi gǎn sɔ́ hwàn mɛlɛ nadó ɖyɔ́ jijɔ bo tlɛ jo aca nylakan lɛ dó, ná ɖagbe mɛɖévo lɛ tɔn. Ði  akpajlɛ̌, to hwenue dǎwe xe mǐ ná ylɔɖɔ George lɛzun baba-ɖaxo, é nɔ jlo nadó nɔkpɔ́ xɛ́ ovivi etɔn. Amɔ̌, nuxahun ɖé tíin. George ko kpeve to azɔ̀-nùnù mɛ, bɔ ovisu etɔn ma jlo ɖɔ ni nɔ nù azɔ̀ to viyɛyɛ lɔ kpá. Etɛ́wɛ George wà? Ðilě é tlɛ ko to azɔ̀ nù sɔ́n oxwe 50 ɖie gbɔ̌n, é jo aca exe dó ná ɖagbe ovivi etɔn tɔn wutu. Mɔ̌wɛ, owǎnyi ɖoxuhlɔn tawun!

Yè ma nɔ jì mɛɖé kpó owǎnyi kpó. Mɛjitɔ́ lɛ wɛ nɔ kplɔ́n ovi yětɔn lɛ nadó dó owǎnyi xya. Yé nɔ ná núɖùɖù ovi yětɔn lɛ, nɔ xɔ́ yé bosɔ nɔ gɔ́alɔ to hwenue nuɖé wà yé kavǐ bɔ yé jɛazɔ̀n. Mɛjitɔ́ ɖagbe lɛ nɔ ɖɔxó xɛ́ ovi yětɔn lɛ bosɔ́ nɔ kplɔ́nnǔ yé. Yé sɔ́ nɔ ɖomɛkplɔ́nlɔ ovi yětɔn lɛ go, exe nɔ byɔ́ ɖɔ yé ni kplɔ́n yé nǔxe sɔgbe kpó nǔxe ma sɔgbe lɛ kpó. Gbɔnvona enɛ, mɛjitɔ́ ɖagbe lɛ nɔ zé akpajlɛ̌ ɖagbe ɖayǐ ná ovi yětɔn lɛ.

Amɔ̌, é blawu ɖɔ mɛjitɔ́ ɖélɛ ma nɔ wàmɔ. Be exe dóxya ɖɔ ovi yětɔn lɛ ma gǎn wá dó walɔ ɖagbe xya wɛ ya? Kpaali! Mɛsusu xe ɖelɛ to yé mɛ hwɛ́n to hwɛndo xe ɖó nuxahun lɛ mɛ, tlɛ ko basí ɖyɔ̌dó susu to gbɛ̀mɛ bo lɛzun tòvi ɖagbe xe go yè gǎn ɖejidó lɛ. Ðilě mǐ ná mɔ ɖó to xósɔ́ xe bɔdego mɛ, ɖelɛ to yé mɛ tlɛ nyí mɛxe mɛsusu lɛnɖɔ yé ma gǎn ɖyɔ́ gbeɖe!