NÁ KUNNUÐETƆ́ lɛ nɔ ylɔ azɔ̌n Biblu kpínkplɔ́nmɛ tɔn yětɔn ɖɔ nǔjɔnǔ wutu, mɛɖélɛ gán nɔ lɛnɖɔ yé ma yiwǎnna wexɔmɛ-yìyì. Amɔ́, é ma nyimɔ. Nadó kplɔ́n mɛɖévo lɛ, mɛkplɔ́ntɔ lɔ ɖóná kplɔ́nnǔ jɛnukɔn, kpóɖɔ exe nɔ byɔ́ ɖɔ ewɔ ni mɔ azɔ́nkplɔ́nmɛ kpó nukplɔ́nmɛ xe sɔgbe kpó yí. Enɛwutu, gbɔnvona ɖɔ Kunnuɖetɔ́ Jehovah tɔn lɛ yiwǎnna  wexɔmɛ-yìyì, sɔ́n oxwe susu lɛ ɖie wɛ yé ko sɔ́ to alemɔyi sɔ́n tito nukpínkplɔ́n tɔn voovo gɔna wexɔmɛ xe mɛxe nɔ ɖeanana yé lɛ zéɖayǐ lɛ mɛ. Exelɛ ko gɔ́alɔna Kunnuɖetɔ́ lɛ kpó mɛɖévo lɛ kpó nadó hɛn alixo nulɛnkpɔ́n tɔn, walɔyizan kpó gbigbɔnɔ-nyínyí yětɔn kpó kpɔ́nte dógɔ́.

Ði akpajlɛ̌, to otò susu mɛ Kunnuɖetɔ́ lɛ ko kpannukɔn nuxahun sínsínnyɛ ɖé—enɛ wɛ lěxe yé ná kplɔ́nnǔ mɛxe ma yì wexɔmɛ susu kavǐ ma tlɛ yì kpaali, bo ma nyɔ́ wexya kavǐ ma nyɔ́ wekan lɛ ɖó. Nadó sudò nuhudó exe tɔn, yé ko basí tito yɔnxya-nyɔkàn tɔn.

Ði akpajlɛ̌ to Nigéria, Kunnuɖetɔ́ Jehovah tɔn lɛ ko bayi tito wexɔmɛ exe nkɔ lɛ tɔn sɔ́n 1949. Klasí exelɛ ko zɔ́n bɔ to Nigéria, gbɛtɔ́ fɔtɔ́n susu lɛ ko nyɔ́ wexya. Sɔxayinanú ɖé dóxya ɖɔ húgǎn 90 to kanweko jí Kunnuɖetɔ́ xe to Nigéria lɛ tɔn wɛ nyɔ́ wexya bosɔ nyɔkàn, to hwenuena é nyiɖɔ tòvi otò lɔ tɔn xe nyɔ́ wexya bosɔ nyɔkàn lɛ ma kpé 50 to kanweko jí. To Mexique, Kunnuɖetɔ́ lɛ ko zé wexɔmɛ yɔnxya-nyɔkàn tɔn lɛ ɖayǐ sɔ́n 1946. To oxwe ɖokpó gblamɛ, gbɛtɔ́ 6500 linlán wɛ kplɔ́n nadó xyawe bosɔ nyɔkàn. Ná tawun tɔn, húgǎn gbɛtɔ́ 100000 wɛ yè ko gɔ́alɔna nadó nyɔ́ wexya bosɔ nyɔkàn. Tito yɔnxya-nyɔkàn tɔn sɔ́ nyí bibayi to oxwe lɛ gblamɛ to otò ɖevo lɛ mɛ, tayiɖi Bolivie, Cameroun, Népal kpó Zambie kpó. Kunnuɖetɔ́ lɛ ko zín vɔkan alɔnuwé lɔ Yí Ðewe Zán ná Wexixya kpó Wekinkan Kpó tɔn húgǎn livi cinawe jɛgbonu to ogbè 100 linlán mɛ.

To otò xe mɛ tito yɔnxya-nyɔkàn tɔn nyí bibayi te lɛ, acɛkpatɔ xe nɔ kpénukúndó wekpínkplɔ́n go lɛ nɔ saba kɛalɔyi yé. Ði akpajlɛ̌, to Mexique axɔluzɔnwatɔ ɖé wlan ɖɔmɔ: “N’nyɔ́ kpinkpɛn gbekɔndókpɔ́ mìtɔn tɔn, kpóɖɔ to onyí acɛkpatɔ lɛ tɔn mɛ, mǐ to nuɖɔdó mì kpó ahunɖokpó kpó ná azɔ̌n ɖagbe xe mì to wiwà ná ɖagbe tòvi lɛ tɔn, ɖilě mì to alɔgɔna mɛxe ma yì wexɔmɛ lɛ nadó mɔnukúnnujɛnumɛ. . . . Oɖɛ̀ mǐtɔn wɛ nyiɖɔ mì ni tindó kɔɖetɔn ɖagbe to azɔ̌n mɛkpínkplɔ́n tɔn exe kɔ̀n.”

Kunnuɖetɔ́ lɛ nɔ yí nukún nǔjɔnǔ tɔn dó kpɔ́n azɔ̌n Biblu kpínkplɔ́nmɛ tɔn yětɔn. Nue zɔ́n ninyɛ bɔ yé nɔ dóvivɛnu nadó hɛn nugokpíkpé yětɔn lɛ kpɔ́nte dógɔ́ ná nǔxe ɖù zɛɛmɛ bibayi ná mɛlɛ dó nukplɔ́nmɛ Biblu tɔn lɛ jí. Ði akpajlɛ̌, to agun xe húgǎn 119000 lɛ ɖokpóɖokpó mɛ lɛdó ayihɔ́n kpé, Kunnuɖetɔ́ lɛ nɔ mɔ azɔ́nkplɔ́nmɛ yí nadó xyawe bosɔ ɖɔxo to gbangba. Ovi flinflin lɛ lɔsu sɔgǎn zé nyǐkɔ ɖayǐ nadó mɔ azɔ́nkplɔ́nmɛ exe yí tlolo xe yé nyɔ́ wexya, kpóɖɔ exe ko sɔ́ hɛn ale wá ná yé to adà gbɛzǎn yětɔn tɔn ɖevo lɛ mɛ, etlɛ nyí to wexɔmɛ ga. Mɛkplɔ́ntɔ susu wɛ ko ɖɔ ɖɔ é nɔ bɔawuna wexɔmɛvi xe nyí Kunnuɖetɔ́ lɛ nadó ɖɔ linlɛn yětɔn lɛ tɔ́n.

 Humɔ, agun Kunnuɖetɔ́ Jehovah tɔn lɛ tɔn ɖokpóɖokpó ko nyí tulina nadó tindó wesɛɖotɛn ɖé xe bɛ́ owě sínai dó Biblu jí lɛ, wezɛxomɛ lɛ, kpó owě alɔdlɛndónu tɔn ɖevo lɛ kpó hɛn, to Kplitɛnxɔ yětɔn lɛ mɛ kavǐ to fie yé nɔ kpli te lɛ. Mɛxe nɔ wá kpli to Kplitɛnxɔ Axɔluɖuta lɔ tɔn mɛ lɛkpó wɛ sɔgǎn yí wesɛɖotɛn exe zán. To agun yětɔn lɛ mɛ, yé nɔ nyí tulina hwɛhwɛ nadó nɔ xyanu, kpóɖɔ hwɛndó ɖokpóɖokpó sɔ́ nɔ nyí tulina nadó ɖó wesɛɖotɛn hwɛndó tɔn ɖé xe bɛ́ owě voovo xe nyɔ́-ná-yizan ná yɔkpɔ́vu kpó mɛxo lɛ kpó hɛn.

Kunnuɖetɔ́ Jehovah tɔn lɛ sɔ́ zé wehɔmɛ lɛ ɖayǐ nadó kplɔ́nazɔ́n sunnu kpó nyɔnu lɛ kpó nadó lɛzun mɛɖéhlan, kpóɖɔ wexɔmɛ ɖevo lɛ nadó kplɔ́nazɔ́n mɛxe tindó azɔngban to agun mɛ lɛ. Wexɔmɛ exelɛ sɔ́ nyí kunnuɖenu dógɔ́ ɖɔ Kunnuɖetɔ́ Jehovah tɔn lɛ nɔ yí nukún nǔjɔnǔ tɔn dó kpɔ́n wekpínkplɔ́n.