1 Timoti 2:1-15
2 Enẹwutu, jẹnukọn whẹ́, yẹn dotuhomẹna mì, dọ ovẹvivẹ lẹ, odẹ̀ lẹ po pẹdido lẹ po ni nọ yin bibasi do ota gbẹtọ wunmẹ lẹpo tọn mẹ,
2 do ota ahọlu lẹ tọn mẹ podọ do ota mẹhe tin to otẹn daho mẹ lẹpo tọn mẹ; na mí nido sọgan yí mẹdezejo mlẹnmlẹn na Jiwheyẹwhe po wunza po do zindonukọn to gbẹzan abọẹninọ tọn po whii-ninọ tọn po zinzan mẹ.
3 Ehe wẹ yọ́n bo yin alọkẹyi to nukun Mẹwhlẹngántọ mítọn, yèdọ Jiwheyẹwhe tọn mẹ,
4 mẹhe ojlo etọn wẹ yindọ gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.
5 Na Jiwheyẹwhe dopo wẹ tin, podọ whẹgbọtọ dopo to Jiwheyẹwhe po gbẹtọ lẹ po ṣẹnṣẹn, enẹ wẹ dawe lọ, Klisti Jesu,
6 mẹhe ze ede jo di ofligọ he sọzẹn de na mẹlẹpo—enẹ go wẹ kunnu na yin dide gando to ojlẹ etọn titi mẹ.
7 Na lẹndai kunnudide ehe tọn wutu wẹ yẹn yin dide di yẹwhehodọtọ de podọ apọsteli de—nugbo dọ wẹ yẹn te, yẹn ma to lalodo—yèdọ yẹn he yin mẹplọntọ akọta lẹ tọn gando whẹho yise po nugbo po tọn go.
8 Enẹwutu, yẹn jlo dọ sunnu lẹ ni nọ to dẹ̀ho to filẹpo, bo nọ to alọ wiwe yetọn lẹ zedaga, matin homẹgble po nudindọn lẹ po.
9 Mọdopolọ, yẹn jlo dọ yọnnu lẹ ni nọ gbọn mẹdehihọ́ po wunza po dali yí avọ̀ he jẹ do doaṣọ́na yede, e ma yin oda biblá lẹ po sika po kavi peali kavi avọ̀ he vẹahi tlala lẹ gba,
10 ṣigba to aliho he jẹna yọnnu he nọ sọalọakọ́n dọ emi to Jiwheyẹwhe sẹ̀n lẹ tọn mẹ, yèdọ gbọn azọ́n dagbe lẹ gblamẹ.
11 Mì gbọ yọnnu ni nọ plọnnu to abọẹninọ mẹ po taliai mlẹnmlẹn po.
12 Yẹn ma nagbè yọnnu de nado nọ plọnmẹ, kavi nado nọ paṣẹ do sunnu ji gba, adavo nado nọ nọ̀ abọẹ.
13 Na Adam wẹ yin didá jẹnukọn, enẹgodo, Evi.
14 Humọ, e ma yin Adam wẹ yin kiklọ gba, ṣigba yọnnu lọ wẹ yin kiklọ pete biọ sẹ́nhẹngba mẹ.
15 Etomọṣo, ewọ na yin hihla dai gbọn vijiji gblamẹ, eyin yé gbọṣi yise, owanyi, klandowiwe po wunza po mẹ.
