Filemọni 1:1-25
1 Paulu he yin gàntọ de na Klisti Jesu tọn wutu, podọ Timoti mẹmẹsunnu mítọn, yẹn to wekanhlan Filemoni, mẹyiwanna mítọn podọ azọ́nwatọ hatọ,
2 podọ hlan Affia, mẹmẹyọnnu mítọn, podọ hlan Alkippu he yin awhànfuntọ Klisti tọn to pọmẹ hẹ mí, podọ hlan agun he to owhé towe gbè lọ:
3 Na nukundagbe majẹhẹ po jijọho po sọn Jiwheyẹwhe Otọ́ mítọn dè podọ sọn Oklunọ Jesu Klisti dè ni tin hẹ mì.
4 Whepoponu wẹ yẹn nọ dopẹna Jiwheyẹwhe ṣie to whenue yẹn dọho gando gowe to odẹ̀ ṣie lẹ mẹ,
5 dile yẹn nọ to sisè gando yise towe to Oklunọ Jesu mẹ go podọ gando owanyi towe na ewọ podọ na omẹ wiwe lẹpo go;
6 na yise he hiẹ tindo to kọndopọ mẹ hẹ mẹdevo lẹ nido sọgan yin yiyizan gbọn alọkikẹyi onú dagbe lẹpo he mí tindo to Klisti mẹ lẹ dali.
7 Na yẹn tindo ayajẹ po homẹmimiọn susu po gando owanyi towe go, na ahun omẹ wiwe lẹ tọn ko yin kọfana gbọn hiẹ mẹmẹsunnu gblamẹ.
8 Na whẹwhinwhẹ́n ehe wutu, dile etlẹ yindọ yẹn tindo awuvivo hodidọ tọn daho to kọndopọ mẹ hẹ Klisti nado degbena we nado wà nuhe sọgbe,
9 kakatimọ, yẹn to tudohomẹna we na owanyi he hiẹ tindo wutu, mimọ dọ yẹn yin mẹhe nkọ yẹn yin, yèdọ Paulu sunnu mẹhomẹ lọ, podọ gàntọ de ga todin na Klisti Jesu tọn wutu;
10 yẹn to tudohomẹna we gando ovi ṣie Onesimu* go, mẹhe yẹn lẹzun otọ́ de na dile yẹn tin to gẹdẹ ṣie lẹ mẹ,
11 mẹhe ma yọ́n-na-yizan na we dai, ṣigba todin ko yọ́n-na-yizan na we podọ na yẹn.
12 Ewọ lọ wẹ yẹn to kọlẹna dohlan we, mọwẹ, yèdọ mẹhe yẹn tindo owanyi sisosiso na.
13 Yẹn na ko jlo nado hẹn ẹn do dee dè na ewọ nido sọgan nọ to lizọnyina mi do otẹn towe mẹ to gẹdẹ he yẹn to akọndona na wẹndagbe lọ tọn wutu lẹ mẹ.
14 Ṣigba, yẹn ma jlo na wà nudepope matin gbekọndopọ towe, na homẹdagbe didohia towe ma nado yin ehe yè yí huhlọn do hẹnmẹ basi, ṣigba sọn ojlo towe titi mẹ.
15 Na nugbo tọn, vlavo e sọgan ko yin na ehe wutu wẹ ewọ do họ̀njẹgbé na whenu vude, na hiẹ nido sọgan gọ̀ ẹ mọyi kakadoi,
16 e masọ yin taidi afanumẹ de ba, ṣigba hugan afanumẹ de, yèdọ taidi mẹmẹsunnu mẹyiwanna de, titengbe na yẹn, ṣogan nẹmunẹmu wẹ e na yinmọ na hiẹ to haṣinṣan ogán po afanumẹ tọn po mẹ podọ to Oklunọ mẹ.
17 Enẹwutu, eyin hiẹ pọ́n mi di gbẹdohẹmẹtọ de, kẹalọyi i po homẹdagbe po dile hiẹ na ko wà na mi do.
18 Humọ, eyin ewọ ko wà oylan de do we kavi duahọ nudepope tọn do we, lẹn ehe dokọna mi.
19 Yẹn Paulu yí alọ ṣie titi do to owe ehe kàn: yẹn na suahọ etọn we—e ma yin dandan dọ yẹn ni dọ ehe na we, humọ, hiẹ duahọ ogbẹ̀ towe tọn do mi.
20 Mọwẹ, mẹmẹsunnu, na Oklunọ tọn wutu, gbọ yẹn ni mọ ale sọn dè we: fakọna ahun ṣie to kọndopọ mẹ hẹ Klisti.
21 Yẹn to wekanhlan we, na yẹn dejido gbekọndopọ towe go wutu, na yẹn yọnẹn dọ hiẹ na tlẹ wà hú nuhe yẹn dọ lẹ.
22 Ṣigba, humọ, wleawu adọtẹn tọn dai na mi ga, na todido ṣie wẹ yindọ gbọn odẹ̀ mìtọn lẹ gblamẹ, yẹn nido yin tuntundote na mì.
23 Mẹhe yí nudọdomẹ yetọn hlan we lẹ wẹ Epafla, gàntọ hatọ ṣie to kọndopọ mẹ hẹ Klisti Jesu,
24 podọ Malku, Alistaku, Dema, Luku, yèdọ azọ́nwatọ hatọ ṣie lẹ.
25 Nukundagbe majẹhẹ Oklunọ Jesu Klisti tọn ni tin hẹ gbigbọ he mì dohia.
Nudọnamẹ Odò Tọn
^ File 1:10 “Onesimu,” he zẹẹmẹdo alenọ.
