Galatianu lẹ 6:1-18
6 Mẹmẹsunnu lẹ emi, yèdọ eyin omẹ de tlẹ ṣì afọ ze whẹpo do wá yọ́n ẹn, mì mẹhe pegan to gbigbọ-liho lẹ ni tẹnpọn nado gọ̀ omẹ mọnkọtọn do otẹn etọn mẹ to gbigbọ walọmimiọn tọn mẹ, na dopodopo mìtọn ni payi ede go, na mìlọsu nikaa yin whiwhlepọn ga.
2 Mì nọ to alọgọna ode awetọ to nuhe to agbàn pẹ̀n mì lẹ mẹ, bo gbọnmọ dali hẹn osẹ́n Klisti tọn di.
3 Na eyin mẹde lẹndọ emi yin nude to whenue ewọ ma yin nude, ede klọ wẹ e te.
4 Ṣigba, mì gbọ omẹ dopodopo ni nọ dindona azọ́n edetiti tọn, podọ to whenẹnu, ewọ na tindo whẹwhinwhẹ́n nado jẹaglin gando edetiti kẹdẹ go, bọ e ma yin nado nọ yí ede jlẹdo mẹdevo go gba.
5 Na omẹ dopodopo wẹ na hẹn agbàn edetiti tọn.
6 Humọ, mì gbọ mẹdepope he yè to onù yí do plọn ohó lọ ni nọ tindo mahẹ to onú dagbe lẹpo mẹ hẹ mẹhe nọ namẹ nuplọnmẹ nùmẹ tọn mọnkọtọn.
7 Yè klọ mì blo: Jiwheyẹwhe ma yin mẹhe yè na vlẹ. Na nudepope he gbẹtọ to didó, ehe wẹ e na gbẹ̀n ga;
8 na ewọ he to didó sọgbe hẹ agbasalan etọn na gbẹ̀n gbigble sọn agbasalan etọn mẹ, ṣigba ewọ he to didó sọgbe hẹ gbigbọ na gbẹ̀n ogbẹ̀ madopodo sọn gbigbọ lọ dè.
9 Enẹwutu, mì dike mí gbọjọ to nuhe yin dagbe wiwà mẹ blo, na mí na gbẹ̀n to osaa sisọ mẹ eyin agbọ́ ma pé mí.
10 Na nugbo tọn, to whelọnu lo, dile mí na tindo dotẹnmẹ hundote etọn do, mì gbọ mí ni nọ wà nuhe yin dagbe hlan mẹlẹpo, ṣigba, na taun tọn, hlan mẹhe gando mí go to yise mẹ lẹ.
11 Mì pọ́n wekun daho he yẹn yí do kanwehlan mì po alọ ṣie titi po lẹ.
12 Mẹhe jlo nado do awusọhia dagbe hia to agbasalan mẹ lẹpo wẹ omẹ lọ lẹ he to tintẹnpọn nado hẹn mì gboadà, kiki na yé nikaa yin homẹkẹndo na yatin Klisti Jesu tọn wutu.
13 Na mẹhe gboadà lẹ lọsu ma tlẹ to Osẹ́n lọ yìn, ṣigba yé jlo dọ mìwlẹ ni yin adàgbona na yewlẹ nido tindo whẹwhinwhẹ́n nado doawagun gando awusọhia gbonu tọn agbasalan mìtọn tọn go.
14 Enẹ ni ma jọ gbede blo dọ yẹn ni doawagun, adavo to yatin Oklunọ mítọn Jesu Klisti tọn mẹ, mẹhe gblamẹ aihọn lọ ko yin whiwhè do núgo te to pọndohlan ṣie mẹ podọ yẹn to pọndohlan aihọn tọn mẹ.
15 Na adàgbigbo ma yin nude, mọdopolọ adàmagbo ma yin nude, ṣigba nudida yọyọ de wẹ yin nujọnu.
16 Podọ mẹhe na zinzọnlin jijlọ sọgbe hẹ nunọwhinnusẹ́n walọyizan dagbe tọn lẹpo, yewlẹ ji wẹ jijọho po lẹblanu po ni tin te, yèdọ to Islaeli Jiwheyẹwhe tọn ji.
17 Bẹsọn din, mì dike mẹdepope dotukla mi ba blo, na yẹn ko to hiadomẹgo lẹ he yin afanumẹ Jesu tọn hẹn to agbasa ṣie go.
18 Mẹmẹsunnu lẹ emi, na nukundagbe majẹhẹ Oklunọ mítọn Jesu Klisti tọn ni tin hẹ gbigbọ he mì dohia. Niṣẹ.*
