Jakọbu 5:1-20
5 Mì wá, todin, mì adọkunnọ lẹ, mì viavi, bo dó hùkluhú na awubla mìtọn he ja mì ji lẹ wutu.
2 Adọkunnu mìtọn lẹ ko yọ̀n, podọ okọ́ ko dù awugbó mìtọn lẹ.
3 Sika po fataka mìtọn po ko jẹkò pete, podọ kòjijẹ yetọn na tin taidi kunnudenu de sọta mì bo nasọ dù agbasalan mìtọn lẹ. Nuhe taidi miyọ́n wẹ mì ko bẹpli to azán godo tọn lẹ mẹ.
4 Mì pọ́n! Azọ́nkuẹ he jẹna azọ́nwatọ he gbẹ̀n jinukun to ogle mìtọn mẹ lẹ ṣigba ehe mì glọn do mìde dè, to awhádo madoalọte, podọ awhágbe gbingbẹ̀ntọ lẹ tọn na alọgọ ko biọ otó Jehovah awhànpa lẹ tọn mẹ.
5 Mì ko zan gbẹzan fẹẹmẹninọ tọn to aigba ji bo ko pò na gbẹ̀fẹdudu. Mì ko hẹn ahun mìtọn lẹ dojó to hùhù zangbe.
6 Mì ko gblewhẹdo, mì ko hù dodonọ lọ. Be ewọ ma to agọjẹdo mì ya?
7 Enẹwutu, mẹmẹsunnu lẹ emi, mì yí homẹfa zan kakajẹ tintin tofi Oklunọ tọn whenu. Mì pọ́n! Glesi nọ to tenọpọn sinsẹ́n họakuẹ aigba tọn zọnmii, bo nọ yí homẹfa do nọtepọn ẹn kaka e nado mọ jikun tintan po jikun godo tọn po.
8 Mìwlẹ lọsu ga, mì nọ yí homẹfa zan; mì hẹn ahun mìtọn lẹ lodo, na tintin tofi Oklunọ tọn ko dọnsẹpọ.
9 Mẹmẹsunnu lẹ emi, mì hlún sọta ode awetọ blo, na mì nikaa yin whẹdana. Mì pọ́n! Whẹdatọ lọ to ote to ohọ̀n lẹ ji.
10 Mẹmẹsunnu lẹ emi, mì yí yẹwhegán he dọho to oyín Jehovah tọn mẹ lẹ, di ohia oyà kanyinylan tọn jiji po homẹfa yiyizan po tọn.
11 Mì pọ́n! Mí nọ ylọ mẹhe ko doakọnnanu lẹ dọ ayajẹnọ. Mì ko sè gando akọndonanu Job tọn go bo ko sọ mọ kọdetọn he Jehovah na, dọ Jehovah tindo owanyi sisosiso bosọ yin lẹblanunọ.
12 Ṣigba, mẹmẹsunnu ṣie lẹ emi, hú popolẹpo, mì doalọtena whiwhle, mọwẹ, vlavo gbọn olọn kavi aigba dali, kavi gbọn whiwhle devo depope dali. Ṣigba mì dike Mọwẹ mìtọn ni yin Mọwẹ, podọ Lala mìtọn ni yin Lala, na mì nikaa jai jẹ whẹgbledo mẹ.
13 Be mẹde to oyà kanyinylan tọn ji to mì mẹ? Mì gbọ e ni nọ hodẹ̀. Be homẹ mẹde tọn vivi to mì mẹ? Mì gbọ e ni nọ ji psalm lẹ.
14 Be mẹde to azọ̀njẹ to mì mẹ? Mì gbọ e ni ylọ sunnu mẹho agun tọn lẹ wá ede dè, na yé ni hodẹ̀ do e ji, bo sá amisisa na ẹn to oyín Jehovah tọn mẹ.
15 Podọ odẹ̀ yise tọn na hẹn mẹhe to azọ̀njẹ jẹgangan, podọ Jehovah na jlọ ẹ dote. Humọ, eyin e ko wà ylando lẹ, e na yin jijona ẹn.
16 Enẹwutu, mì nọ yigbe ylando mìtọn lẹ tọn na ode awetọ to gbangba bo nọ hodẹ̀ na ode awetọ, na mì nido yin azọ̀nhẹngbọna. Ovẹ̀ dodonọ tọn, to whenuena e to azọ́nwa, nọ tindo huhlọn taun.
17 Gbẹtọ he tindo numọtolanmẹ taidi mítọn lẹ nkọ wẹ Elija, ṣogan to odẹ̀ mẹ, e hodẹ̀ dọ jikun ni ma ja blo; podọ jikun ma ja do aigba lọ ji na owhe atọ̀n po osun ṣidopo po.
18 Podọ e sọ vọ́ hodẹ̀, bọ olọn ja jikun, aigba lọ sọ de sinsẹ́n etọn tọ́n.
19 Mẹmẹsunnu ṣie lẹ emi, eyin mẹdepope to mì mẹ yin hinhẹn buali sọn nugbo lọ mẹ bọ mẹdevo hẹn ẹn gọwá,
20 mì yọnẹn dọ mẹhe hẹn ylandonọ de gọwá sọn alibubu etọn mẹ na whlẹn alindọn etọn gán sọn okú si bo nasọ ṣinyọnnudo ylando susugege.
