Kolosinu lẹ 1:1-29
1 Paulu, apọsteli Klisti Jesu tọn gbọn ojlo Jiwheyẹwhe tọn gblamẹ, podọ Timoti mẹmẹsunnu mítọn
2 to wekanhlan omẹ wiwe lẹ po mẹmẹsunnu nugbonọ he to kọndopọ mẹ hẹ Klisti to Kọlọsi lẹ po:
Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn dè.
3 Whepoponu wẹ mí nọ dopẹna Jiwheyẹwhe Otọ́ Oklunọ mítọn Jesu Klisti tọn to whenue mí to dẹ̀ho do ota mìtọn mẹ,
4 na mí sè gando yise mìtọn go to kọndopọ mẹ hẹ Klisti Jesu po owanyi he mì tindo na omẹ wiwe lẹpo po
5 na todido he yin whiwhla do olọn mẹ na mì lọ wutu. Mìwlẹ ko sè gando todido ehe go dai gbọn nugbo wẹndagbe enẹ tọn didọ dali
6 ehe ko wá mì dè, yèdọ dile e to sinsẹ́n detọ́n bo to jijideji to aihọn lọ pete mẹ kẹdẹdile e to bibasi do to ṣẹnṣẹn mìtọn ga, sọn azán he gbè mì ko sè bo yọ́n nugbo lọ gando nukundagbe majẹhẹ Jiwheyẹwhe tọn go hezeheze.
7 Enẹ wẹ nuhe mìwlẹ ko plọn sọn Epafla afanumẹ hatọ mẹyiwanna mítọn dè, mẹhe yin lizọnyizọnwatọ nugbonọ Klisti tọn do otẹn mítọn mẹ,
8 mẹhe sọ hẹn owanyi mìtọn to gbigbọ-liho zun yinyọnẹn na mí.
9 Enẹ wẹ zọ́n ga bọ míwlẹ, sọn azán he gbè mí ko sè ehe, mí ma ko doalọtena dẹ̀hiho do ota mìtọn mẹ bo nọ to bibiọ dọ mì ni gọ́ na oyọnẹn he pegan ojlo etọn tọn to nuyọnẹn po nukunnumọjẹnumẹ gbigbọmẹ tọn lẹpo po mẹ,
10 nado sọgan zinzọnlin dile e jẹ do to Jehovah nukọn nado hẹn homẹ etọn hùn to gigọ́ mẹ dile mìwlẹ na to sinsẹ́n detọ́n zọnmii to azọ́n dagbe lẹpo mẹ bo na to jijideji to oyọnẹn he pegan Jiwheyẹwhe tọn mẹ,
11 bo na to yinyin hinhẹn zun huhlọnnọ po huhlọn lẹpo po sọgbe hẹ hlọnhlọn gigonọ etọn nado sọgan doakọnnanu to gigọ́ mẹ bo nasọ nọ yí ayajẹ do sinyẹnlin,
12 bo na nọ dopẹna Otọ́ lọ he hẹn mì nado jẹna mahẹ tintindo to ogú omẹ wiwe he to hinhọ́n nù lẹ tọn mẹ.
13 Ewọ whlẹn mí sọn aṣẹpipa zinvlu tọn si bo diọtẹnna mí biọ ahọluduta Visunnu yiwanna etọn tọn mẹ,
14 mẹhe gblamẹ míwlẹ mọ tundote yí gbọn ofligọ dali, yèdọ jona ylando mítọn lẹ tọn.
15 Ewọ wẹ yin apajlẹ Jiwheyẹwhe mayinukundomọ lọ tọn, yèdọ plọnji nudida lẹpo tọn;
16 na gbọn ewọ gblamẹ wẹ onú devo lẹpo yin didá te to olọn mẹ podọ to aigba ji, yèdọ onú yinukundomọ lẹ po onú mayinukundomọ lẹ po, vlavo ofìn lẹ wẹo kavi oklunọ-yinyin lẹ kavi gandudu lẹ kavi aṣẹpipa lẹ. Onú devo lẹpo wẹ yin didá gbọn ewọ dali podọ na ewọ.
17 Humọ, ewọ tin jẹnukọnna onú devo lẹpo podọ gbọn ewọ gblamẹ wẹ onú devo lẹpo yin hinhẹnwa tintin mẹ te,
18 podọ ewọ wẹ ota agbasa lọ tọn, yèdọ agun lọ. Ewọ wẹ bẹjẹeji, plọnji sọn oṣiọ lẹ mẹ, na ewọ nido sọgan lẹzun omẹ tintan to onú lẹpo mẹ;
19 na Jiwheyẹwhe mọdọ e yọ́n nado dike onú lẹpo ni nọ ewọ mẹ to gigọ́ mẹ,
20 bo gbọn ewọ gblamẹ hẹn onú devo lẹpo gbọwhẹ hẹ ede whladopo dogọ gbọn ohùn he ewọ sọndai to yatin ji yíyí do basi jijọho dali, vlavo yé yin onú aigba ji tọn lẹ kavi onú olọn mẹ tọn lẹ.
21 Na nugbo tọn, mìwlẹ he ko jẹla bo yin kẹntọ lẹ to ojlẹ de mẹ wayi na ayiha mìtọn tin to azọ́n he yin ylankan lẹ ji wutu,
22 e ko gbọwhẹ hẹ mì whladopo dogọ todin gbọn agbasa gbẹtọ tọn omẹ enẹ he kú lọ tọn gblamẹ, nado sọgan hẹn mì wá ewọ nukọn to wiwe ji, madoblọ podọ matin dotẹnmẹ hundote na whẹsadokọnamẹ depope,
23 na taun tọn, eyin mìwlẹ ko gbẹ́ zindonukọn to yise he yin didoai do dodonu ji lọ mẹ bo nọte gligli bo masọ yin tẹnsẹna sọn todido wẹndagbe enẹ he mì sè podọ ehe yẹwheho etọn yin didọna nudida he to olọn glọ lẹpo lọ tọn mẹ. Wẹndagbe ehe wẹ yẹn Paulu lẹzun lizọnyizọnwatọ de na.
24 Todin, yẹn to ayajẹ to yajiji ṣie lẹ mẹ do ota mìtọn mẹ, podọ yẹn lẹndọ yẹn ma ko jiya to gigọ́ mẹ na Klisti tọn wutu do ota agbasa etọn he yin agun lọ tọn mẹ gba.
25 Yẹn lẹzun lizọnyizọnwatọ agun ehe tọn de to kọndopọ mẹ hẹ họ̀nkọnsi-zọ́n he Jiwheyẹwhe na mi na ale mìtọn nado dọyẹwheho ohó Jiwheyẹwhe tọn to gigọ́ mẹ,
26 yèdọ aṣli wiwe he ko yin whiwhla sọn titonu he wayi lẹ mẹ podọ sọn whẹndo he wayi lẹ mẹ. Ṣigba todin, e ko yin hinhẹn họnwun na omẹ wiwe etọn lẹ,
27 mẹhe Jiwheyẹwhe ko hùnhomẹ nado hẹn aṣli wiwe gigonọ susugege etọn zun yinyọnẹn na lẹ to akọta lẹ ṣẹnṣẹn. Aṣli wiwe lọ wẹ yin Klisti to kọndopọ mẹ hẹ mì, yèdọ todido gigo etọn tọn.
28 Ewọ wẹ mẹhe míwlẹ to lilá pé, bo to tudohomẹna gbẹtọ lẹpo bosọ to gbẹtọ lẹpo plọn to nuyọnẹn lẹpo mẹ, na mí nido sọgan hẹn gbẹtọ lẹpo wá to pipé mẹ to kọndopọ mẹ hẹ Klisti.
29 Na nugbo tọn, ehe wutu wẹ yẹn to azọ́n sinsinyẹn wà, bo to kanván to kọndopọ mẹ hẹ nuyiwa etọn he to azọ́nwa po huhlọn po to yẹn mẹ.
