Owalọ lẹ 23:1-35
23 To whenue Paulu pọ́n hagbẹ Whẹdatẹn Daho Ju lẹ tọn* lọ tọn lẹ tlintlin, e dọmọ: “Mì mẹmẹsunnu lẹ emi, yẹn ko yinuwa po ayihadawhẹnamẹnu he wé-ṣeke de po to Jiwheyẹwhe nukọn kakajẹ egbé.”
2 To whenẹnu, yẹwhenọ daho Ananias degbena mẹhe ṣite to apá na ẹn lẹ nado gbà awọ̀nnù na ẹn.
3 Enẹgodo, Paulu dọmọ: “Jiwheyẹwhe na linú we, hiẹ adó he yè sá onú wewe do. Hiẹ sinai nado dawhẹna mi sọgbe hẹ Osẹ́n lọ, podọ to ojlẹ dopolọ mẹ, hiẹ sọ to Osẹ́n lọ gbà, bo degbè dọ yè ni linú mi?”
4 Mẹhe ṣite to finẹ lẹ dọmọ: “Hiẹ to yẹwhenọ daho Jiwheyẹwhe tọn vlẹ wẹ?”
5 Paulu sọ dọmọ: “Mẹmẹsunnu lẹ emi, yẹn ma yọnẹn dọ yẹwhenọ daho wẹ ewọ. Na e ko yin kinkàndai dọ, ‘Hiẹ ma dona dọ ohó ylankan do ogán omẹ towe lẹ tọn de go.’”
6 Todin, to whenue Paulu doayi e go dọ adà de yin Sadusi lẹ ṣigba bọ adà de yin Falesi lẹ, e jẹ didọ ji po ogbè lélé po to Whẹdatẹn Daho Ju lẹ tọn lọ mẹ dọmọ: “Mì mẹmẹsunnu lẹ emi, Falesi de wẹ yẹn, yèdọ visunnu Falesi lẹ tọn de. Na todido fọnsọnku oṣiọ lẹ tọn wutu wẹ yẹn to yinyin whẹdana.”
7 Na enẹ he e dọ wutu, gbemanọpọ de fọ́n to Falesi lẹ po Sadusi lẹ po ṣẹnṣẹn, gbẹtọgun lọ sọ klan.
8 Na Sadusi lẹ nọ dọ dọ fọnsọnku kavi angẹli kavi gbigbọ de ma tin, ṣigba Falesi lẹ nọ lá ehe lẹpo to gbangba.
9 Enẹwutu, awhágbe lélé de gbajẹgbonu, bọ delẹ to wekantọ pipli Falesi lẹ tọn lẹ mẹ fọ́n bo jẹ núdọ̀n ji sinsinyẹn, dọmọ: “Mí ma mọ oylan depope to dawe ehe mẹ; ṣigba eyin gbigbọ kavi angẹli de wẹ dọhona ẹn,—.”
10 Todin, to whenue gbemanọpọ lọ sinyẹn deji, awhàngán daho lọ dibu dọ yé na tlẹ́n Paulu do flinflin, e sọ degbena awhànfuntọ lọ lẹ nado jẹte yì bosọ hò e yí sọn ṣẹnṣẹn yetọn bo hẹn ẹn wá opá awhànfuntọ lẹ tọn mẹ.
11 Ṣigba, to ozán he bọdego mẹ, Oklunọ ṣite to apá na ẹn bo dọmọ: “Gboadọ! Na dile hiẹ ko to kunnude mlẹnmlẹn gando go e to Jelusalẹm do, mọ wẹ hiẹ dona sọ dekunnu to Lomu do ga.”
12 Todin, to whenue ai ko họ́n, Ju lẹ wleawuna sébibla de bo yí yedelẹ do dẹ̀hodo glọ, dọ yé ma na dù kavi nù kakajẹ whenue yé na hù Paulu.
13 Hugan sunnu kande wẹ yí whiwhle do blasé ehe;
14 yé sọ yì yẹwhenọgán lẹ po sunnu mẹho lẹ po dè bo dọmọ: “Mí ko yí míde do dẹ̀hodo glọ sinsinyẹn dọ núdùdù de ma na jẹ onù na mí kakajẹ whenue mí na hù Paulu.
15 Enẹwutu, todin, mìwlẹ po Whẹdatẹn Daho Ju lẹ tọn lọ po ni hẹn ẹn họnwun na awhàngán daho lọ nuhewutu ewọ dona hẹn ẹn jẹte wá mì dè taidi dọ mì to linlẹn nado gbeje whẹho he gando e go lẹ pọ́n ganji wẹ nkọ. Ṣigba, whẹpo e nado sẹpọ, míwlẹ na tin to awuwle mẹ nado hù i.”
16 Ṣigba, visunnu nọviyọnnu Paulu tọn sè dogbọn owùtọnamẹ yetọn dali, ewọ sọ wá bo biọ opá awhànfuntọ lẹ tọn mẹ bo dọ ẹ na Paulu.
17 Enẹwutu, Paulu ylọ dopo to mẹkanwekowhàngán lọ lẹ mẹ wá ede dè bo dọmọ: “Plan jọja sunnu ehe yì awhàngán daho lọ dè, na e tindo nude nado dọna ẹn.”
18 Enẹwutu, dawe ehe plan ẹn yì awhàngán daho lọ dè bo dọmọ: “Paulu, gàntọ lọ ylọ mi yì ede dè bo biọ dọ ma plan jọja sunnu ehe wá dè we, na e tindo nude nado dọna we.”
19 Awhàngán daho lọ hẹn alọ go na ẹn bo plan ẹn sọn finẹ bosọ jẹ kinkanse e ji dovo dọmọ: “Etẹwẹ hiẹ tindo nado dọna mi?”
20 Ewọ dọmọ: “Ju lẹ ko kọngbedopọ nado biọ to hiẹ si nado hẹn Paulu jẹte wá Whẹdatẹn Daho Ju lẹ tọn to osọ he ja taidi dọ yé to linlẹn nado sè nugbo lọ to gigọ́ mẹ gando ewọ go wẹ nkọ.
21 To popolẹpo mẹ, hiẹ dike yé ni diọlinlẹnna we blo, na nuhe hugan sunnu kande to yé mẹ wẹ tọ̀wu dai na ẹn, yé ko sọ yí yedelẹ do dẹ̀hodo glọ ma nado dù kavi nù kakajẹ whenue yé na hù i; podọ yé ko wleawufo todin, bo to tenọpọn gbedide towe.”
22 Enẹwutu, awhàngán daho lọ dike jọja sunnu lọ ni yì to whenue e ko degbena ẹn godo dọmọ: “A gbàpá mẹde dọ a ko hẹn onú ehelẹ zun yinyọnẹn na mi blo.”
23 Ewọ sọ ylọ awe to mẹkanwekowhàngán lẹ mẹ bo dọmọ: “Mì wleawuna awhànfuntọ fọde, podọ ga osọ́nọ kandegbàn po owhánnọ fọde po nado yì Sesalea to gànhiho atọ̀ntọ* mẹ to zánmẹ.
24 Humọ, mì wleawuna osọ́ lẹ he ji Paulu na hẹ nado ze e yì ayimatẹn-gán Feliksi dè awuyẹyẹ-afọyẹyẹ.”
25 E sọ kàn wekanhlanmẹ de he dọmọ:
26 “Klaudiu Lisia, hlan gigonọ daho, Ayimatẹn-gán Feliksi: Yẹn dọnudo we!
27 Ju lẹ wẹ wle dawe ehe bo ko dibla hù i, ṣigba yẹn hẹn awhànfuntọ lẹ wá to ajiji mẹ bo whlẹn ẹn, na yẹn sè dọ Lomunu de wẹ ewọ.
28 Podọ to whenue yẹn to jijlo nado yọ́n nuhewutu yé do to whẹsadokọna ẹn, yẹn hẹn ẹn jẹte yì Whẹdatẹn Daho Ju lẹ tọn yetọn mẹ.
29 Yẹn mọdọ yé sawhẹdokọna ẹn gando Osẹ́n yetọn lọ go, ṣigba yè ma jẹ owhẹ̀ etọn gando onú dopo tata he hẹn ẹn jẹna okú kavi gànpamẹ go gba.
30 Ṣigba, na núbibla he to yinyin awuwlena sọta ẹ lọ ko yin hinhẹn zun yinyọnẹn na mi wutu, yẹn to dido e hlan dè we to afọdopolọji, bosọ degbena whẹsadokọnamẹtọ lọ lẹ nado wá dọho jẹagọdo e to nukọn towe.”
31 Enẹwutu, awhànfuntọ lọ lẹ plan Paulu sọgbe hẹ gbedide he yin nina yé lẹ bo hẹn ẹn wá Antipatli to zánmẹ.
32 To aihọngbè, yé nagbè osọ́nọ lọ lẹ nado zindonukọn po e po, yewlẹ sọ lẹkọ do opá awhànfuntọ lẹ tọn mẹ.
33 Osọ́nọ lọ lẹ biọ Sesalea bo ze wekanhlanmẹ lọ na ayimatẹn-gán lọ bosọ ze Paulu do alọmẹ na ẹn ga.
34 Enẹwutu, e hia ẹ bo kàn ayimatẹn he mẹ e wá sọn lọ sè, bo mọdọ Silisia wẹ e wá sọn.
35 E sọ dọmọ: “Yẹn na dotoaina we to gigọ́ mẹ to whenue whẹsadokọnamẹtọ towe lẹ lọsu na wá.” E sọ degbè dọ yè ni to ṣiṣọ́ ẹ to họ̀nmẹ ahọlu Hẹlọdi tọn.
