Matiu 2:1-23
2 To whenuena Jesu ko yin jiji to Bẹtlẹhẹm Jude tọn to azán Hẹlọdi* ahọlu lọ tọn lẹ mẹ godo, pọ́n! sunwhlẹvu-pọntọ lẹ sọn whèzẹtẹn-waji wá Jelusalẹm,
2 bo dọmọ: “Fie wẹ ewọ he yin jiji taidi ahọlu Ju lẹ tọn lọ te? Na mí mọ sunwhlẹvu etọn to whenuena mí tin to whèzẹtẹn, podọ míwlẹ ko wá nado litaina ẹn.”
3 To whenue Ahọlu Hẹlọdi sè ehe, e biọ bẹwlu mẹ, gọna mẹhe tin to Jelusalẹm lẹpo;
4 podọ to whenuena e ylọ yẹwhenọgán lẹ gọna wekantọ gbẹtọ lẹ tọn lẹpo pli, e jẹ kinkanbiọ yé ji fie wẹ Klisti lọ na yin jiji te.
5 Yé dọna ẹn dọmọ: “To Bẹtlẹhẹm Jude tọn mẹ wẹ; na mọ wẹ e ko yin kinkàndai gbọn yẹwhegán lọ gblamẹ do dọ,
6 ‘Podọ hiẹ, Bẹtlẹhẹm he tin to aigba Juda tọn ji E, hiẹ ma yin tòdaho he whè hugan to ayimatẹn-gán Juda tọn lẹ ṣẹnṣẹn to aliho depope mẹ; na hiẹ mẹ wẹ ogán de na tọ́njẹgbonu sọn, he na yin lẹngbọhọtọ na omẹ ṣie lẹ, yèdọ Islaeli.’”
7 Enẹgodo, Hẹlọdi ylọ sunwhlẹvu-pọntọ lọ lẹ pli to nuglọ bo yí sọwhiwhe do dindona sọn yé dè ojlẹ he mẹ sunwhlẹvu lọ sọawuhia te;
8 podọ to whenuena e to dido yé hlan Bẹtlẹhẹm, e dọmọ: “Mì yì bo yí sọwhiwhe do dín ovi pẹvi lọ, podọ to whenuena mì ko mọ ẹn mì lẹkọ bo wá dogbè na mi, na yẹnlọsu nido yì nado litaina ẹn.”
9 To whenuena yé ko sè nuhe ahọlu lọ dọ godo, yé tọ́nyi; bo pọ́n! sunwhlẹvu he yé ko mọ to whenuena yé tin to whèzẹtẹn lọ jẹnukọnna yé, kaka bo wá nọte to aga to fie ovi pẹvi lọ tin te.
10 To whenuena yé mọ sunwhlẹvu lọ, yé jaya tlala na nugbo tọn.
11 Podọ to whenuena yé biọ owhé lọ gbè, yé mọ ovi pẹvi lọ po Malia onọ̀ etọn po, bọ yé jẹklo bo litaina ẹn. Yé sọ hùn nuhe mẹ adọkunnu yetọn te lẹ bo na ẹn nunina lẹ, yèdọ sika, nuyọnwan gblingblin, po zuya po.
12 Ṣigba, na yé mọ avase yí sọn Jiwheyẹwhe dè to odlọ mẹ ma nado lẹkọyi Hẹlọdi dè wutu, yé gbọn aliho devo lẹkọyi otò yetọn mẹ.
13 To whenuena yé ko lẹkọyi godo, pọ́n! angẹli Jehovah tọn sọawuhia Josẹfu to odlọ mẹ, bo dọmọ: “Fọ́n, ze ovi pẹvi lọ po onọ̀ etọn po bo họnyi Egipti bosọ nọ finẹ kakajẹ whenue yẹn na vọ́ dọhona we; na Hẹlọdi ko jlo na jẹ ovi pẹvi lọ dín ji nado hù i.”
14 Enẹwutu, e fọ́n bo plan ovi pẹvi lọ po onọ̀ etọn po to zánmẹ bo họnyi Egipti,
15 bosọ nọ finẹ kakajẹ whenue Hẹlọdi lẹzun matintọ, na enẹ he Jehovah dọ gbọn yẹwhegán etọn gblamẹ nido yin hinhẹndi, dọmọ: “Egipti wẹ yẹn ylọ visunnu ṣie jẹgbonu sọn.”
16 Enẹgodo, to whenuena Hẹlọdi mọdọ sunwhlẹvu-pọntọ lọ lẹ ko blu emi, e biọ adi sinsinyẹn mẹ, podọ e domẹhlan bo hù yọpọ sunnu lẹpo he tin to Bẹtlẹhẹm podọ to agbegbe etọn lẹpo ji, bẹsọn owhe awe mẹvi wá odò, sọgbe hẹ ojlẹ he e ko yí sọwhiwhe do dindona sọn sunwhlẹvu-pọntọ lọ lẹ dè.
17 Gbọnmọ dali, enẹ he yin didọ gbọn yẹwhegán Jelemia gblamẹ yin hinhẹndi, dọmọ:
18 “Ogbè de yin sisè to Lama, yèdọ avi po avihàndido sinsinyẹn po; Laheli wẹ to avivi na ovi etọn lẹ, podọ e ma jlo nado yin homẹmiọnna, na yé ma tin ba wutu.”
19 To whenuena Hẹlọdi ko lẹzun matintọ, pọ́n! angẹli Jehovah tọn sọawuhia Josẹfu to odlọ mẹ to Egipti
20 bo dọmọ: “Fọ́n, ze ovi pẹvi lọ po onọ̀ etọn po bo wle ali yì aigba Islaeli tọn ji, na mẹhe to alindọn ovi pẹvi lọ tọn dín lẹ ko kú.”
21 Enẹwutu, e fọ́n bo ze ovi pẹvi lọ po onọ̀ etọn po bosọ yì aigba Islaeli tọn ji.
22 Ṣigba, to whenuena e sè dọ Alkẹlausi dugán taidi ahọlu Jude tọn to otẹn Hẹlọdi otọ́ etọn tọn mẹ, e dibu nado yì finẹ. Humọ, na e mọ avase yí sọn Jiwheyẹwhe dè to odlọ mẹ wutu, e họnyi aigba Galili tọn ji,
23 bo wá sawhé do tòdaho de mẹ he nọ yin yiylọdọ Nazalẹti, na enẹ he yin didọ gbọn yẹwhegán lẹ gblamẹ nido sọgan yin hinhẹndi dọmọ: “Ewọ na yin yiylọdọ Nazalẹtinu.”
