Matiu 5:1-48
5 To whenuena e mọ gbẹtọgun lẹ, e hẹji yì osó lọ ji; podọ to whenuena e ko sinai godo, devi etọn lẹ wá e dè;
2 podọ e kẹ̀ onù etọn bo jẹ nuplọn yé ji, dọmọ:
3 “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ, na yetọn wẹ ahọluduta olọn tọn.
4 “Ayajẹnọ wẹ mẹhe to aluẹmẹ lẹ, na yé na yin homẹmiọnna.
5 “Ayajẹnọ wẹ homẹmimiọnnọ lẹ, na yé na dugu aigba tọn.
6 “Ayajẹnọ wẹ mẹhe huvẹ po nugbla dodowiwa tọn po to hùhù lẹ, na yé na yin pekọhẹnwana.
7 “Ayajẹnọ wẹ lẹblanunọ lẹ, na lẹblanu na yin didohia yé.
8 “Ayajẹnọ wẹ mẹhe wé-ṣeke to ahun mẹ lẹ, na yé na mọ Jiwheyẹwhe.
9 “Ayajẹnọ wẹ jijọho-dintọ lẹ, na yé na yin yiylọdọ ‘visunnu Jiwheyẹwhe tọn lẹ.’
10 “Ayajẹnọ wẹ mẹhe ko yin homẹkẹndo na dodowiwa wutu lẹ, na yetọn wẹ ahọluduta olọn tọn.
11 “Ayajẹnọ wẹ mìwlẹ to whenuena gbẹtọ lẹ vlẹ mì kò bo dohomẹkẹn mì bosọ gbọn lalo dali dọ onú ylankan wunmẹwunmẹ lẹ do mì go na yẹn tọn wutu.
12 Mì nọ jaya bosọ nọ lọ́n na ayajẹ, na daho wẹ ale mìtọn to olọn mẹ; na mọ wẹ yé ko dohomẹkẹn yẹwhegán he jẹnukọnna mì lẹ do.
13 “Mìwlẹ wẹ ojẹ̀ aigba tọn; ṣigba eyin ojẹ̀ hẹn huhlọn etọn bu, nawẹ otọ́n etọn na yin hinhẹngọwa gbọn? E masọ yọ́n-na-yizan na nudepope ba, adavo nado yin zizedlan gbonu na gbẹtọ lẹ nido tùnafọ e ji.
14 “Mìwlẹ wẹ hinhọ́n aihọn tọn. Tòdaho he yin didoai do osó ji de ma sọgan yin whiwhla.
15 Gbẹtọ lẹ ma nọ tá miyọ́ngbán bo nọ ze e do ohà nujijlẹ tọn glọ gba, ṣigba do miyọ́ngbántin ji, bọ e nọ na hinhọ́n mẹhe tin to owhé lọ gbè lẹpo.
16 Mọdopolọ, mì dike hinhọ́n mìtọn ni họnwun to gbẹtọ lẹ nukọn, na yé nido sọgan mọ azọ́n dagbe mìtọn lẹ bo na gigo Otọ́ mìtọn he tin to olọn mẹ.
17 “Mì lẹndọ yẹn wá nado và Osẹ́n lọ kavi Yẹwhegán lẹ sudo blo. Yẹn wá, e ma yin nado vasudo, ṣigba nado hẹndi;
18 na nugbo wẹ yẹn dọna mì dọ, e na bọawu dọ olọn po aigba po ni juwayi hú dọ wekun pẹvi pete dopo kavi adà tiuntiun wekun tọn dopo ni juwayi sọn Osẹ́n lọ mẹ to aliho depope mẹ kaka onú he tin to e mẹ lẹpo nido yin hinhẹndi.
19 Enẹwutu, mẹdepope he nọ tùnafọ dopo to gbedide he whè hugan ehelẹ mẹ ji bo nọ plọn gbẹtọvi lẹ nado wàmọ, ewọ na yin yiylọdọ mẹhe ‘whè hugan’ to* ahọluduta olọn tọn mẹ. Ṣigba, mẹdepope he nọ yìn yé bo nọ plọn yé omẹ, ewọ na yin yiylọdọ mẹhe ‘klo’ to* ahọluduta olọn tọn mẹ.
20 Na yẹn dọna mì dọ, eyin dodowiwa mìtọn ma sù hú wekantọ lẹ po Falesi lẹ po tọn, mìwlẹ ma na biọ ahọluduta olọn tọn mẹ to aliho depope mẹ.
21 “Mì ko sè bọ e yin didọna omẹ hohowhenu tọn lẹ dọ, ‘Hiẹ ma dona hùhlọ̀n; ṣigba mẹdepope he hùhlọ̀n na dogbè to whẹdatẹn.’
22 Ṣigba, yẹn dọna mì dọ mẹdepope he zindonukọn to homẹgble mẹ sọta mẹmẹsunnu etọn na dogbè to whẹdatẹn; ṣigba mẹdepope he nọ yí hogbe vlẹko tọn he ma yọ́n dọtọ́n* zan na mẹmẹsunnu etọn na dogbè to Whẹdatẹn Daho Hugan; to whenuena mẹdepope he dọ, ‘Hiẹ nulunọ nuvọ́nọ!’ na jẹna Gẹhẹnna* miyọ́n tọn.
23 “To whelọnu lo, eyin hiẹ hẹn nunina towe ja agbà lọ kọ̀n bo flin to finẹ dọ mẹmẹsunnu towe tindo nude sọta we,
24 jo nunina towe do finẹ to agbà lọ nukọn, bo tọ́nyi; bo yì dín jijọho hẹ mẹmẹsunnu towe whẹ́, podọ to enẹgodo, to whenuena hiẹ ko lẹkọwa, na nunina towe.
25 “Yawu jẹ whẹgbọ ji hẹ mẹhe jlo na hẹn we yì owhẹ̀ nukọn to whenuena hiẹ tin to aliho ji hẹ ẹ jei finẹ, na eyin e ma yinmọ, whẹylọmẹtọ lọ sọgan ze we do alọmẹ na whẹdatọ, bọ whẹdatọ na ze we do alọmẹ na devizọnwatọ whẹdatẹn tọn, bọ hiẹ nasọ yin zizedlan gànpamẹ.
26 Nugbo wẹ yẹn dọna we, Hiẹ ma na tọ́n sọn finẹ to aliho depope mẹ kaka hiẹ nado sú abọgan-kuẹ pẹvi pete godo tọn.*
27 “Mì ko sè bọ e yin didọ dọ, ‘Hiẹ ma dona deayọ.’
28 Ṣigba yẹn dọna mì dọ mẹdepope he zindonukọn nado to yọnnu de pọ́n kaka bo tindo ojlo zogbe de na ẹn ko deayọ hẹ ẹ dote to ahun etọn mẹ.
29 Todin, eyin nukun towe adusiwhé tọn lọ to hinhẹn we dahli, sún in sẹ̀ bo ze e dlan sọn dewe go. Na e doale na we dọ dopo to awutugonu towe lẹ mẹ ni yin hinhẹnbu hú dọ agbasa towe blebu ni yin dindọn dlan Gẹhẹnna mẹ.
30 Mọdopolọ, eyin adusilọ towe to hinhẹn we dahli, sán ẹn sẹ̀ bo ze e dlan sọn dewe go. Na e doale na we dọ dopo to awutugonu towe lẹ mẹ ni yin hinhẹnbu hú dọ agbasa towe blebu ni yì Gẹhẹnna mẹ.
31 “Humọ, e ko yin didọ dọ, ‘Mẹdepope he gbẹ́ asi etọn dai, gbọ e ni na ẹn owe gbẹdai tọn de.’
32 Ṣigba, yẹn dọna mì dọ mẹdepope he gbẹ́ asi etọn dai, bọ e ma yin na whẹho galilọ tọn wutu, hẹn ẹn tin to owù ayọdide tọn mẹ, podọ mẹdepope he wlealọ hẹ yọnnu he yin gbigbẹdai, e deayọ.
33 “Mọdopolọ, mì ko sè bọ e yin didọna omẹ hohowhenu tọn lẹ dọ, ‘Hiẹ ma dona whlé bo nọma hẹndi, ṣigba hiẹ dona de opà towe lẹ hlan Jehovah.’
34 Ṣigba, yẹn dọna mì dọ: Mì whlé paali blo, vlavo gbọn olọn dali, na e yin ofìn Jiwheyẹwhe tọn wutu;
35 kavi gbọn aigba dali, na e yin tokloafọligbe afọ etọn lẹ tọn wutu; kavi gbọn Jelusalẹm dali, na e yin tòdaho Ahọlu daho lọ tọn wutu.
36 Mọdopolọ, hiẹ ma dona yí ota towe do whlé, na hiẹ ma sọgan diọ oda dopo zun wewe kavi yuu.
37 Mì kuku gbọ hogbe mìtọn Mọwẹ ni yin Mọwẹ, podọ Lala mìtọn ni yin Lala; na nuhe hú ehelẹ, mẹylankan lọ dè wẹ yé wá sọn.
38 “Mì ko sè bọ e yin didọ dọ, ‘Nukun na nukun podọ adú na adú.’
39 Ṣigba, yẹn dọna mì dọ: Mì diọavunnukunsọ ewọ he yin mẹylankan blo; ṣigba eyin mẹdepope hò alaka adusiwhé tọn na we, lẹ́ amiyọnwhé tọn na ẹn ga.
40 Podọ eyin mẹde jlo na hẹn we yì owhẹ̀ nukọn nado yí awù odò tọn towe, jo awugbó towe lọsu na ẹn ga;
41 podọ eyin mẹde he tin to otẹn aṣẹpipa tọn mẹ yí huhlọn do hẹn we nado wadevizọn na kilomẹtlu dopo, basi kilomẹtlu awe hẹ ẹ.
42 Nanú ewọ he to nubiọ we, podọ a dogodo ewọ he jlo na yàn sọn dè we matin akuẹvi blo.
43 “Mì ko sè bọ e yin didọ dọ, ‘Hiẹ dona yiwanna kọmẹnu towe bo gbẹwanna kẹntọ towe.’
44 Ṣigba, yẹn dọna mì dọ: Mì zindonukọn nado nọ yiwanna kẹntọ mìtọn lẹ bo nọ hodẹ̀ na mẹhe to homẹkẹndo mì lẹ;
45 na mì nido do mìde hia taidi visunnu Otọ́ mìtọn he tin to olọn mẹ lọ tọn lẹ, na e nọ hẹn owhè etọn zẹ̀ do mẹylankan lẹ po mẹdagbe lẹ po ji bosọ nọ hẹn jikun ja do dodonọ lẹ po mawadodonọ lẹ po ji.
46 Na eyin mì nọ yiwanna mẹhe yiwanna mì lẹ, ale tẹwẹ mì tindo? Be tòkuẹ-ṣinyantọ lẹ ma nọ wà onú dopolọ ga?
47 Podọ eyin mì nọ dọnudo mẹmẹsunnu mìtọn lẹ kẹdẹ, onú vonọtaun tẹwẹ mì to wiwà? Be omẹ akọta lẹ tọn ma nọ wà onú dopolọ ga?
48 Enẹwutu, mì dona yin pipé, kẹdẹdile Otọ́ mìtọn olọn tọn yin pipé do.
