Titu 1:1-16
1 Paulu, afanumẹ Jiwheyẹwhe tọn podọ apọsteli Jesu Klisti tọn de sọgbe hẹ yise mẹdide Jiwheyẹwhe tọn lẹ tọn po oyọnẹn he pegan nugbo lọ tọn po he to kọndopọ mẹ hẹ mẹdezejo na Jiwheyẹwhe
2 to dodonu todido ogbẹ̀ madopodo tọn ji, ehe Jiwheyẹwhe, mẹhe ma sọgan dolalo ko dopagbe etọn sọn whenu dindẹn die,
3 to whenue e yindọ to ojlẹ sisọ etọn titi mẹ, e hẹn ohó etọn sọawuhia gbọn yẹwhehodidọ he yin zizedo alọmẹ na mi lọ gblamẹ, yèdọ gbọn gbedide Mẹwhlẹngántọ mítọn, Jiwheyẹwhe tọn dali.
4 Yẹn to owe ehe kàn hlan Titu, yèdọ ovi nugbo de sọgbe hẹ yise he mí tindo to pọmẹ:
Na nukundagbe majẹhẹ po jijọho po ni tin sọn Jiwheyẹwhe Otọ́ dè podọ sọn Klisti Jesu Mẹwhlẹngántọ mítọn dè.
5 Na whẹwhinwhẹ́n ehe wutu wẹ yẹn do jo we do Klete, na hiẹ nido sọgan jla onú he ma sọgbe lẹ do podọ nado nọ de sunnu mẹho lẹ to tòdaho dopodopo mẹ, dile yẹn ko na we anademẹ etọn do;
6 eyin mẹde tin matin whẹsadokọnamẹ, asu yọnnu dopo tọn, bo tindo ovi he yise lẹ he yè ma sawhẹ walọ gblezọn kavi tasinsinyẹn tọn dokọna.
7 Na nugopọntọ dona tin matin whẹsadokọnamẹ taidi họ̀nkọnsi Jiwheyẹwhe tọn, e ma yin ojlo mẹdetiti tọn watọ, e ma yin mẹhe nọ yawu gblehomẹ, e ma yin ahànnumunọ avùnda-daitọ de, e ma yin nulimẹtọ de, e ma yin mẹhe nọ yí nukunkẹn do dín ale mawadodo tọn,
8 ṣigba johẹmẹtọ, mẹhe yiwanna dagbewiwa, wùnzanọ, dodonọ, nugbonọ, mawazẹjlẹgonọ,
9 he nọ tẹdo ohó nugbo lọ go gligli na nuhe dù azọ́nyinyọnẹn mẹpinplọn tọn etọn, na ewọ nido sọgan penugo nado nọ dotuhomẹnamẹ gbọn mẹpinplọn he pegan lọ dali podọ nado nọ wọhẹ mẹhe ma kọngbedopọ lẹ.
10 Na tasinyẹntọ susu wẹ tin, hofusadọtọ lẹ, po mẹklọtọ lẹ po, titengbe omẹ lọ lẹ he nọ tẹdo adàgbigbo go.
11 Dandannu wẹ e yin nado bọnùdo na omẹ ehelẹ, na yé nọ to yise whédo blebu lẹ tọn hẹn gblezọn gbọn nuhe yé ma dona plọnmẹ lẹ pinplọnmẹ na ale mawadodo tọn wutu dali.
12 Dopo to yé mẹ, yèdọ yẹwhegán* yetọn titi dọmọ: “Lalonọ wẹ Kletenu lẹ to whepoponu, gbekanlin ylankan lẹ, adọwhẹ́nnọ adidọnọ lẹ.”
13 Nugbo wẹ kunnudide ehe. Na ehe wutu, zindonukọn nado nọ to wiwọhẹ yé sinsinyẹn, na yé nido sọgan pegan to yise mẹ,
14 bo ma nado nọ na ayidonugo otangblo Ju lẹ tọn po gbedide mẹhe lẹkọ sọn nugbo lọ mẹ lẹ tọn po.
15 Onú lẹpo wẹ yin wiwe na mẹhe yin wiwe lẹ. Ṣigba, nudepope ma nọ yin wiwe na mẹhe yin hinhẹnflu po mẹhe ma tindo yise lẹ po, ṣigba ayiha yetọn po ayihadawhẹnamẹnu yetọn lẹ po ko yin hinhẹnflu.
16 Yé lá to gbangba dọ yé yọ́n Jiwheyẹwhe, ṣigba yé mọ́n ẹn gbọn azọ́n yetọn lẹ dali, na yé yin osùnú po tolivẹtọ lẹ po wutu bo ma yin alọkẹyi na azọ́n dagbe wunmẹ depope.
