Titu 2:1-15
2 Ṣigba, hiẹ ni zindonukọn nado nọ to nuhe jẹna oplọn he pegan lọ dọ.
2 Gbọ sunnu mẹhomẹ lẹ ni yin mẹdehọ́tọ to walọ mẹ, bo whèwhín, bosọ yin wùnzanọ, bo pegan to yise mẹ, to owanyi mẹ, to akọndonanu mẹ.
3 Mọdopolọ, gbọ yọnnu mẹhomẹ lẹ ni tindo budisi to walọ mẹ, yé ma dona yin mẹhẹngbletọ, mọjanwẹ yé ma dona yin afanumẹ ovẹn susu tọn do niyẹn, yé dona yin mẹplọntọ onú dagbe tọn lẹ;
4 na yé nido sọgan nọ flinnu jọja yọnnu lẹ nado nọ yiwanna asu yetọn lẹ, nado nọ yiwanna ovi yetọn lẹ,
5 nado nọ yin wùnzanọ, nado nọ nọ̀ wiweji, nado nọ wazọ́n to whégbè, nado nọ yin omẹ dagbe, he nọ yin mẹmẹglọ na asu yetọn titi lẹ, bọ ohó Jiwheyẹwhe tọn ma nado yin nùzan dego.
6 Mọdopolọ, nọ to tudohomẹna jọja sunnu lẹ nado yin wùnzanọ,
7 nọ do dewe hia taidi apajlẹ de na azọ́n dagbe lẹ to onú lẹpo mẹ; nọ plọnmẹ po nugbodidọ po, po wunza po,
8 podọ po hodidọ he sọgbe po, ehe ma sọgan yin whẹgbledo; na winyan nido sọgan hù agọjẹdomẹtọ lẹ, bọ yé ma nado tindo onú ylankan depope nado dọ gando mí go.
9 Gbọ afanumẹ lẹ ni yin mẹmẹglọ na klunọ yetọn lẹ to onú lẹpo mẹ, bo nọ hẹn homẹhun yé ganji, e ma yin nado nọ dọho jẹagọdo yé,
10 e ma yin nado nọ jẹajo, ṣigba nado nọ do nugbonọ-yinyin hia to gigọ́ mẹ, na yé nido sọgan doaṣọ́na oplọn Mẹwhlẹngántọ mítọn, yèdọ Jiwheyẹwhe tọn, to onú lẹpo mẹ.
11 Na nukundagbe majẹhẹ Jiwheyẹwhe tọn he nọ hẹn whlẹngán wá na gbẹtọ wunmẹ lẹpo ko yin hinhẹn sọawuhia,
12 bo nọ to pinplọn mí nado gbẹ́ jijọ-madi-Jiwheyẹwhe po ojlo aihọn tọn lẹ po dai podọ nado nọ do wunza, dodowiwa po mẹdezejo na Jiwheyẹwhe po hia to titonu ehe mẹ,
13 dile mí to tepọn todido jiawu gọna awusọhia gigonọ Jiwheyẹwhe daho lọ tọn podọ Mẹwhlẹngántọ mítọn, yèdọ Klisti Jesu tọn,
14 mẹhe yí ede na mí na ewọ nido sọgan whlẹn mí gán sọn sẹ́nhẹngba wunmẹ lẹpo mẹ bo klọ́ mí wé nado lẹzun omẹ vonọtaun etọn titi lẹ, yèdọ zohunhunnọ na azọ́n dagbe lẹ.
15 Nọ to onú ehelẹ dọ bo nọ to tudohomẹnamẹ bosọ nọ yí aṣẹpipa he yin nina we nado degbè do nọ wọhẹmẹ. A dike mẹde yí nukunpẹvi do pọ́n we blo.
