Titu 3:1-15
3 Zindonukọn nado nọ flinnu yé nado nọ litai bo nọ setonuna gandudu lẹ po aṣẹpipa lẹ po, nado wleawufo na azọ́n dagbe lẹpo,
2 ma nado nọ dọho ylankan gando mẹdepope go, ma nado yin jlẹwàtọ, nado yin lẹnpọn dagbenọ, nado nọ do walọmimiọn mlẹnmlẹn hia gbẹtọ lẹpo.
3 Na to ojlẹ de mẹ wayi mílọsu ko yin gugutọ, tolivẹtọ, bo yin hinhẹn buali, bosọ yin afanumẹ na ojlo po gbẹdudu voovo lẹ po, bo tin to oylan po nuvẹun po mẹ, bosọ nọ yin wangbẹna sinsinyẹn, bo nọ gbẹwanna ode awetọ.
4 Ṣigba, to whenuena homẹdagbe podọ owanyi Mẹwhlẹngántọ mítọn, yèdọ Jiwheyẹwhe tọn yin didohia,
5 e ma yin na azọ́n dodowiwa tọn he mí ko wà lẹ wutu wẹ gba, ṣigba na lẹblanu etọn wutu wẹ ewọ whlẹn mí gán gbọn klọwé* he hẹn mí wá ogbẹ̀ lọ gblamẹ podọ to hinhẹn mí jẹ yọyọ gbọn gbigbọ wiwe dali mẹ.
6 Gbigbọ ehe wẹ e kọ̀n jẹgbonu do mí ji susugege gbọn Jesu Klisti Mẹwhlẹngántọ mítọn gblamẹ,
7 na e nido yindọ, to lilá mí di dodonọ gbọn nukundagbe majẹhẹ omẹ enẹlọ tọn dali godo, mí nido sọgan lẹzun gudutọ sọgbe hẹ todido ogbẹ̀ madopodo tọn.
8 Nugbo wẹ ohó lọ, podọ yẹn jlo dọ hiẹ ni nọ zinnudo onú ehelẹ ji sinsinyẹn to whepoponu, na mẹhe tindo yise to Jiwheyẹwhe mẹ lẹ nido sọgan nọ ze ayiha yetọn do azọ́n dagbe lẹ wiwà ji. Onú ehelẹ yọ́n bosọ yin alenu na gbẹtọ lẹ.
9 Ṣigba, dapana kanbiọ nulú tọn lẹ, nudindọn do kúnkan whẹndo tọn lẹ ji, avùn po nudindọn do Osẹ́n lọ ji lẹ po, na ovọ́ po onú tata po wẹ yé.
10 Na nuhe dù omẹ lọ he nọ hẹn plọngiglọ gbayipe, gbẹ́ ewọ dai to nugbẹnamẹ tintan podọ awetọ godo;
11 na omẹ mọnkọtọn ko lẹkọ sọn aliho lọ ji bo to ylando wà, ewọ ko gblewhẹdo ede.
12 To whenuena yẹn na do Altema kavi Tikiku hlan we, wà nuhe go a pé lẹpo nado wá dè e to Nikopoli, na finẹ wẹ yẹn ko basi dide nado yí ojlẹ avivọ-whenu tọn zan te.
13 Yí sọwhiwhe do wleawu onú lẹ tọn na Zena, yèdọ mẹhe yọ́n Osẹ́n lọ ganji, podọ na Apolo to gbejizọnlin yetọn mẹ, bọ yé ma nado jẹdò nudepope tọn.
14 Ṣigba, dike omẹ mítọn lẹ lọsu ni plọn nado nọ wà azọ́n dagbe lẹ nado sọgan nọ penukundo nuhudo niyaniya tọn yetọn lẹ go, na yé nido sọgan nọ yin sinsẹ́nnọ to whepoponu.
15 Mẹhe to dè e lẹpo yí nudọdomẹ yetọn lẹ hlan we. Yí nudọdomẹ ṣie lẹ na mẹhe yiwanna mí to yise mẹ lẹ.
Na nukundagbe majẹhẹ ni tin hẹ mìmẹpo.
