Ẹsteli 3:1-15
3 To enẹgodo, Ahọlu Ahasuelusi ze Hamani+ visunnu Hamedata Agaginu+ lọ tọn daga bo hẹn ẹn yiji gbọn zize e do otẹn he yiaga hugan ahọvi hatọ etọn he pò lẹpo tọn mẹ dali.+
2 Devizọnwatọ ahọlu tọn he to họngbo ahọlu tọn ji lẹpo sọ nọ dẹ́ yìdo bo nọ ṣinyọ́n nukunmẹ ai to Hamani nukọn, na nuhe ahọlu ko degbe etọn gando ewọ go niyẹn. Ṣigba, Mọldekai gbẹ́ nado nọ dẹ́ yìdo kavi ṣinyọ́n nukunmẹ ai.
3 Enẹwutu, devizọnwatọ ahọlu tọn he to họngbo ahọlu tọn ji lẹ dọna Mọldekai dọmọ: “Naegbọn hiẹ ma nọ setonuna gbedide ahọlu tọn?”
4 Egbesọegbesọ wẹ yé nọ to hodọna ẹn, amọ́ e ma nọ dotoaina yé. Enẹgodo, yé dọna Hamani nado pọ́n eyin nuyiwa Mọldekai tọn na yin alọkẹyi kavi lala;+ na ewọ ko dọna yé dọ Ju de wẹ emi.+
5 Todin, to whenue Hamani mọdọ Mọldekai gbẹ́ nado nọ dẹ́ yìdo bo ṣinyọ́n nukunmẹ ai to nukọn etọn, Hamani gblehomẹ sinsinyẹn.+
6 Ṣigba, e lẹndọ e de emi pò nado hù* Mọldekai kẹdẹ, na yé ko dọhona ẹn gando omẹ Mọldekai tọn lẹ go. Enẹwutu, Hamani jẹ ayiha kàn ji nado sukúndona Ju he tin to gandudu Ahasuelusi tọn glọ lẹpo, yèdọ omẹ Mọldekai tọn lẹpo.
7 To osun tintan mẹ, enẹ wẹ osun Nisan* tọn, to owhe 12tọ+ gandudu Ahọlu Ahasuelusi tọn mẹ, yé de Puli+ (enẹ wẹ Ovò) to Hamani nukọn nado yọ́n azán po osun lọ po bọ e jẹ do osun 12tọ mẹ, enẹ wẹ Adali.*+
8 Hamani sọ dọna Ahọlu Ahasuelusi dọmọ: “Akọta de tin he gbàpe bosọ vúnvún pé gbọn akọta+ he to agbegbe* gandudu towe tọn glọ lẹpo+ mẹ bọ osẹ́n yetọn gbọnvona osẹ́n akọta he pò lẹpo tọn; yé masọ nọ setonuna osẹ́n ahọlu tọn lẹ, podọ dagbe de ma to e mẹ na ahọlu nado pò yé dogbẹ̀.
9 Eyin e yọ́n to nukun ahọlu tọn mẹ, dike gbedide de ni yin kinkan na yé nido yin vivasudo. N’na sú akuẹ talẹnti* fataka tọn 10 000 ahọluzọnwatọ lẹ nado bẹ do adọkunnu ahọlu tọn mẹ.”*
10 To whenẹnu, ahọlu de alọkẹ hiadonugo tọn+ etọn sọn alọ ede titi tọn bo yí i na Hamani+ visunnu Hamedata Agaginu+ lọ tọn he yin kẹntọ Ju lẹ tọn.
11 Ahọlu sọ dọna Hamani dọmọ: “Fataka lọ po akọta lọ po ko yin zizedo alọmẹ na we, na hiẹ nido wà na yé dile a mọdọ e sọgbe do.”
12 Whenẹnu wẹ wekantọ ahọlu tọn lẹ+ yin yiylọ to azán 13tọ osun tintan tọn gbè. Yé kàn+ gbedide Hamani tọn lẹpo he na yin didohlan agbegbe-gán ahọlu tọn lẹ, ayimatẹn-gán agbegbe* lọ lẹ tọn lẹ po ahọvi akọta voovo lẹ tọn lẹ po, yèdọ hlan agbegbe* dopodopo sọgbe hẹ wekinkan* etọn podọ akọta dopodopo to ogbè etọn titi mẹ. E yin kinkan to oyín Ahọlu Ahasuelusi tọn mẹ bo yin hiadogona po alọkẹ hiadonugo tọn ahọlu tọn po.+
13 Wekanhlanmẹ lọ lẹ yin didohlan agbegbe* he to ahọluduta lọ glọ lẹpo ji gbọn wẹndotọ lẹ gblamẹ po gbedide lọ po nado sukúndona Ju lẹpo, yọpọ po mẹho po, ovi lẹ po yọnnu lẹ po podọ nado hù yé bo và yé sudo to azán dopo gbè, enẹ wẹ azán 13tọ osun 12tọ tọn, he yin osun Adali tọn+ bọ nutindo yetọn lẹ na yin hihòyi.+
14 Vọkan wekanhlanmẹ lọ tọn dona yin didetọn taidi osẹ́n de gbọn agbegbe* lẹpo ji bo yin lilá hlan akọta lẹpo, na yé nido wleawudaina azán enẹ.
15 Wẹndotọ lọ lẹ yawu tọ́nyi+ sọgbe hẹ gbedide ahọlu tọn; osẹ́n lọ yin didetọn to Ṣuṣani*+ figángán* lọ. Enẹgodo, ahọlu po Hamani po sinai nado nù, ṣigba tòdaho Ṣuṣani* tọn tin to bẹwlu mẹ.
Nudọnamẹ Odò Tọn
^ To paa mẹ, “e de emi pò eyin alọ emitọn nido jẹ.”
^ Kavi “agbegbe fidugando.”
^ Kavi vlavo, “N’na sú talẹnti 10 000 do adọkunnu ahọlu tọn mẹ na mẹhe wazọ́n ehe lẹ.”
^ Kavi “agbegbe fidugando.”
^ Kavi “agbegbe fidugando.”
^ Kavi “aliho nukinkan tọn.”
^ Kavi “agbegbe fidugando.”
^ Kavi “agbegbe fidugando.”
^ Kavi “Susa.”
^ Kavi “họ̀nmẹ; fibẹtado.”
^ Kavi “Susa.”
