Ẹsteli 5:1-14
5 To azán atọ̀ntọ gbè,+ Ẹsteli do tewu ahọsi tọn etọn lẹ bo ṣite to awánu homẹ tọn to ohọ̀* ahọlu tọn mẹ, pannukọn ohọ̀ ahọlu tọn, dile ahọlu to aisinsin to ofìn ahọlu tọn etọn ji to owhé ahọlu tọn gbè pannukọn họntonu lọ.
2 Tlolo he ahọlu mọ Ahọsi Ẹsteli bọ e ṣite to awánu lọ mẹ, ewọ mọ nukundagbe ahọlu tọn bọ ahọlu dlẹn ogánpò sika tọn+ he to alọ etọn mẹ lọ do Ẹsteli. Whenẹnu wẹ Ẹsteli dọnsẹpọ bo doalọ ogánpò lọ go.
3 Ahọlu kanse e dọmọ: “Ahọsi Ẹsteli E, etẹwẹ jọ? Etẹwẹ yin obiọ towe? Etlẹ yin kakajẹ* odaa ahọluduta ṣie tọn ji, e na yin nina we!”
4 Ẹsteli gblọn dọmọ: “Eyin e yọ́n to nukun ahọlu tọn mẹ, gbọ ahọlu po Hamani+ po ni wá hùnwhẹ he n’ko wleawu etọn dai na ẹn lọ to egbé.”
5 Enẹwutu, ahọlu dọna sunnu etọn lẹ dọmọ: “Mì dọna Hamani nado yawu wá, sọgbe hẹ obiọ Ẹsteli tọn.” Ahọlu po Hamani po sọ yì hùnwhẹ he Ẹsteli ko wleawu etọn dai lọ.
6 To hùnwhẹ ovẹn tọn lọ whenu, ahọlu dọna Ẹsteli dọmọ: “Etẹwẹ yin ovẹ̀ towe? E na yin nina we! Podọ etẹwẹ yin obiọ towe? Etlẹ yin kakajẹ* odaa ahọluduta ṣie tọn ji, e na yin bibasi na we!”+
7 Ẹsteli gblọn dọmọ: “Ovẹ̀ po obiọ ṣie po die,
8 Eyin n’ko mọ nukundagbe ahọlu tọn podọ eyin e yọ́n to nukun ahọlu tọn mẹ nado sè ovẹ̀ ṣie bo yinuwa sọgbe hẹ obiọ ṣie, gbọ ahọlu po Hamani po ni wá hùnwhẹ he yẹn na basi na yé to osọ; podọ to osọ, n’na basi dile ahọlu dọ do.”
9 To gbenẹgbe, Hamani tọ́nyi po ayajẹ po bosọ to aglinjẹ. Ṣigba, to whenue Hamani mọ Mọldekai to họngbo ahọlu tọn ji bo doayi e go dọ ewọ ma fọnṣite bosọ sisọ to nukọn etọn, Hamani gblehomẹ sinsinyẹn do Mọldekai go.+
10 Ṣigba, Hamani dava ede bo yì whégbè. Enẹgodo, e dowẹn hlan họntọn etọn lẹ po Zelẹṣi+ asi etọn po.
11 Hamani doawagun gando adọkun susu po visunnu susu he e tindo po go,+ gọna lehe ahọlu ko ze e daga bo hẹn ẹn yiji hugan ahọvi po devizọnwatọ ahọlu tọn lẹ po do.+
12 Hamani yidogọ dọmọ: “Humọ, Ahọsi Ẹsteli ma basi oylọna mẹdevo de adavo yẹn nado hodo ahọlu wá hùnwhẹ he ewọ wleawu etọn lọ tẹnmẹ.+ N’ko sọ yin oylọ-basina nado wá nọpọ́ hẹ ewọ po ahọlu po to osọ.+
13 Amọ́, ehe lẹpo ma ko hẹn pekọ wá na mi dile e na dẹnsọ bọ n’na gbẹ́ to Mọldekai Ju lọ mọ to aisinsin to họngbo ahọlu tọn ji.”
14 Enẹwutu, Zelẹṣi asi etọn po họntọn etọn lẹpo po dọna ẹn dọmọ: “Biọ dọ pòtin he yiji na awagbà 50* de ni yin awuwlena. Podọ to afọnnu, dọna ahọlu dọ Mọldekai ni yin zizepla do e go.+ Enẹgodo, hodo ahọlu bo yì duvivi hùnwhẹ lọ tọn.” Ayinamẹ ehe yọ́n to nukun Hamani tọn mẹ, enẹwutu e biọ dọ pòtin lọ ni yin awuwlena.
