1 Ahọlu lẹ 12:1-33
12 Lehoboami yì Ṣekẹmi, na Islaeli pete ko wá Ṣekẹmi+ nado yí i do doahọlu.+
2 Tlolo he Jeloboami visunnu Nebati tọn sè ehe (e gbẹ́ pò to Egipti to whenẹnu, na e ko họ̀njẹgbé na Ahọlu Sọlomọni wutu bo nọ nọ̀ Egipti),+
3 yé dowẹn hlan ẹn. Enẹgodo, Jeloboami po agun Islaeli tọn pete po wá Lehoboami dè bo dọmọ:
4 “Otọ́ towe hẹn zẹgẹ mítọn sinyẹn.+ Ṣigba, eyin hiẹ hẹn azọ́n sinsinyẹn he otọ́ towe zín do mí ji lọ bọawu bo hẹn zẹgẹ pinpẹn* he e zedo mí ji lọ fua, míwlẹ na wadevizọn na we.”
5 Whenẹnu, e dọna yé dọmọ: “Mì yì bo lẹkọwa dè e to azán atọ̀n godo.” Enẹwutu, gbẹtọ lọ lẹ yì.+
6 Ahọlu Lehoboami sọ dewé hẹ sunnu mẹho he ko wadevizọn na Sọlomọni otọ́ etọn to gbẹwhenu etọn lẹ bo dọmọ: “Etẹwẹ yin ayinamẹ mìtọn gando gblọndo he n’na na omẹ ehelẹ go?”
7 Yé gblọnna ẹn dọmọ: “Eyin hiẹ lẹzun devizọnwatọ de na omẹ ehelẹ to egbé bo kẹalọyi obiọ yetọn bosọ na yé gblọndo dagbe, yé na yin devizọnwatọ towe lẹ tẹgbẹ.”
8 Etomọṣo, e gbẹkọ ayinamẹ he sunnu mẹho lẹ na ẹn go bo yì dewé hẹ jọja sunnu he whẹ́n dopọ hẹ ẹ bosọ yin devizọnwatọ etọn todin lẹ.+
9 E kanse yé dọmọ: “Etẹwẹ yin ayinamẹ mìtọn gando gblọndo he mí dona na omẹ ehelẹ he dọna mi dọ, ‘Hẹn zẹgẹ he otọ́ towe zedo mí ji lọ fua’ go?”
10 Jọja sunnu he whẹ́n dopọ hẹ ẹ lọ lẹ dọna ẹn dọmọ: “Nuhe hiẹ dona dọna mẹhe dọna we dọ, ‘Otọ́ towe ko hẹn zẹgẹ mítọn pẹ̀n, ṣigba hiẹ ni hẹn ẹn fua na mí’ lọ lẹ die; nuhe hiẹ ni dọna yé die, ‘Alọvi pẹvi ṣie na tli hugan alinkàn otọ́ ṣie tọn.
11 Otọ́ ṣie zín zẹgẹ pinpẹn do mì ji, ṣigba yẹn na yidogọna zẹgẹ mìtọn. Obá tata wẹ otọ́ ṣie yí do sayana mì, ṣigba alànbá wẹ yẹn na yí do sayana mì.’”
12 Jeloboami po gbẹtọ lọ lẹpo po sọ wá Lehoboami dè to azán atọ̀ntọ gbè, kẹdẹdile ahọlu ko dọ do dọ: “Mì lẹkọwa dè e to azán atọ̀ntọ gbè.”+
13 Ṣigba, ahọlu ylangbè na gbẹtọ lọ lẹ bo gbẹkọ ayinamẹ he sunnu mẹho lẹ ko na ẹn go.
14 E dọhona gbẹtọ lọ lẹ sọgbe hẹ ayinamẹ jọja sunnu lẹ tọn dọmọ: “Otọ́ ṣie hẹn zẹgẹ mìtọn pẹ̀n, ṣigba yẹn na yidogọna zẹgẹ mìtọn. Obá tata wẹ otọ́ ṣie yí do sayana mì, ṣigba alànbá wẹ yẹn na yí do sayana mì.”
15 Gbọnmọ dali, ahọlu lọ ma dotoaina gbẹtọ lọ lẹ, na Jehovah wẹ hẹn nulẹ nado jọ domọ,+ na ohó he Jehovah ko dọna Jeloboami visunnu Nebati tọn gbọn Ahija+ Ṣilonu lọ gblamẹ nido mọ hẹndi.
16 Whenue Islaeli pete mọdọ ahọlu ko gbẹ́ nado dotoaina yé, gbẹtọ lọ lẹ gblọnna ahọlu dọmọ: “Mimá tẹwẹ míwlẹ tindo to Davidi mẹ? Mí ma tindo ogú depope to visunnu Jẹsse tọn mẹ. Islaeli E, mì lẹhlan yẹwhe mìtọn lẹ. Todin, Davidi E, pọ́n whédo towe titi go!” Whenẹnu, Islaelivi lẹ lẹkọyi owhé yetọn lẹ gbè.*+
17 Ṣigba, Lehoboami zindonukọn nado to gandu do Islaelivi he nọ nọ̀ tòdaho Juda tọn lẹ mẹ lẹ ji.+
18 Enẹgodo, Ahọlu Lehoboami do Adolami,+ he yin ogán mẹhe yin dide na azọ́n sinsinyẹn wiwà lẹ tọn hlan, amọ́ Islaeli pete wẹ dlan zannu do e hù. E ma bọawuna Ahọlu Lehoboami lọsu whẹpo e do biọ osọ́-kẹkẹ etọn mẹ bo họnyi Jelusalẹm.+
19 Islaelivi lẹ gbẹ́ pò to gufọn+ do whédo Davidi tọn ji kakajẹ egbé.
20 Tlolo he Islaeli pete sè dọ Jeloboami ko lẹkọ, yé ylọ ẹ wá pipli lọ mẹ bo yí i do doahọlu do Islaeli pete ji.+ Depope to gbẹtọ lọ lẹ mẹ ma nọgodona whédo Davidi tọn, adavo hẹnnu Juda tọn.+
21 Whenue Lehoboami wá Jelusalẹm, e ylọ whédo Juda tọn pete po hẹnnu Bẹnjamini tọn po pli to afọdopolọji, yèdọ awhànfuntọ 180 000 he yin azọ́nplọn,* na yé nido hoavùn hẹ whédo Islaeli tọn nado sọgan gọ̀ gandudu jo na Lehoboami visunnu Sọlomọni tọn.+
22 Ohó Jiwheyẹwhe nugbo lọ tọn sọ wá Ṣemaia,+ yèdọ omẹ Jiwheyẹwhe nugbo lọ tọn dè dọmọ:
23 “Dọna Lehoboami visunnu Sọlomọni ahọlu Juda tọn gọna whédo Juda tọn pete, Bẹnjamini po mẹhe pò lẹ po dọ,
24 ‘Nuhe Jehovah dọ die: “Mìwlẹ ma dona hẹji yì hoavùn hẹ Islaelivi nọvisunnu mìtọn lẹ. Dopodopo mìtọn ni lẹkọyi owhé etọn gbè, na yẹn wẹ hẹn ehe nado jọ.”’”+ Enẹwutu, yé setonuna ohó Jehovah tọn bo lẹkọyi whé, kẹdẹdile Jehovah ko dọna yé do.
25 Jeloboami sọ gbá* Ṣekẹmi+ to lẹdo osó tọn Eflaimi tọn mẹ bọ ewọ lọsu nọ nọ̀ finẹ. E sọ tọ́nyi sọn finẹ bo gbá* Penuẹli.+
26 Jeloboami dọ to ahun ede tọn mẹ dọmọ: “Ahọluduta lọ na lẹkọwa whédo Davidi tọn mẹ din.+
27 Eyin omẹ ehelẹ zindonukọn nado nọ hẹji yì basi avọ́sinsan lẹ to ohọ̀ Jehovah tọn mẹ to Jelusalẹm,+ ahun omẹ ehelẹ tọn lọsu na lẹkọ do oklunọ yetọn dè, yèdọ Ahọlu Lehoboami Juda tọn. Mọwẹ, yé na hù mi bo na lẹkọ do Ahọlu Lehoboami Juda tọn dè.”
28 To wedide dopọ godo, ahọlu basi oyìnvu sika tọn awe+ bo dọna gbẹtọ lọ lẹ dọmọ: “Nado nọ hẹji yì Jelusalẹm ko vẹawu gbau. Islaeli E, Jiwheyẹwhe towe die, yèdọ mẹhe plan we tọ́njẹgbonu sọn aigba Egipti tọn ji.”+
29 E sọ ze dopo do Bẹtẹli+ bo ze awetọ do Dani.+
30 Podọ ehe hẹn yé nado waylando,+ bọ gbẹtọ lọ lẹ nọ yì kaka Dani nado yì sẹ̀n dehe to dọ́n.
31 E sọ gbá ohọ̀ sinsẹ̀n-bibasi tọn lẹ do ofi yiaga lẹ bo de yẹwhenọ lẹ sọn omẹ paa lẹ mẹ, yèdọ mẹhe ma yin Levinu lẹ.+
32 Jeloboami sọ ze hùnwhẹ de dai to osun ṣinatọ̀ntọ mẹ, to azán 15tọ osun lọ tọn gbè, kẹdẹdi hùnwhẹ he nọ yin bibasi to Juda.+ To agbà he e doai to Bẹtẹli ji,+ e sanvọ́ na oyìnvu he e basi lẹ, podọ to Bẹtẹli e de yẹwhenọ lẹ do ofi yiaga he e ko basi lẹ.
33 E sọ jẹ avọ́nunina lẹ basi ji do agbà he e ko doai do Bẹtẹli lọ ji to azán 15tọ osun ṣinatọ̀ntọ tọn gbè, to osun he ewọ lọsu ko zedai lọ mẹ; e sọ ze hùnwhẹ de dai na omẹ Islaeli tọn lẹ bo hẹji yì agbà lọ kọ̀n nado basi avọ́nunina lẹ po avọ́sinsan mimẹ̀ po.
Nudọnamẹ Odò Tọn
^ Kavi “kọgbidinamẹ tọn.”
^ To paa mẹ, “gòhọ yetọn lẹ mẹ.”
^ To paa mẹ, “he yin dide.”
^ Kavi “do adó gángán lẹdo.”
^ Kavi “do adó gángán lẹdo.”
