1 Ahọlu lẹ 13:1-34
13 Sọgbe hẹ ohó Jehovah tọn, omẹ Jiwheyẹwhe tọn de+ tọ́n sọn Juda wá Bẹtẹli to whenue Jeloboami to ote to agbà lọ kọ̀n+ nado basi avọ́sinsan mimẹ̀.
2 E sọ yí ogbè lélé do dọho sọta agbà lọ sọgbe hẹ ohó Jehovah tọn dọmọ: “Agbà E, hiẹ agbà! Nuhe Jehovah dọ die: ‘Pọ́n! Visunnu de na yin jiji na whédo Davidi tọn bo na nọ yin Josia!+ Ewọ na yí yẹwhenọ ofi yiaga lẹ tọn lẹ do sanvọ́ to ji we, yèdọ yé mẹhe nọ basi avọ́sinsan mimẹ̀ to hiẹ ji lẹ, e nasọ mẹ̀ ohú gbẹtọ tọn lẹ to ji we.’”+
3 E sọ na ohia* de to gbenẹgbe dọmọ: “Ohia* he Jehovah ko na lọ die: Pọ́n! Agbà lọ na zẹ̀ bọ afín* he to e ji lẹ na vúnvún kọnyinai.”
4 Tlolo he ahọlu sè ohó he omẹ Jiwheyẹwhe nugbo lọ tọn ko dọ sọta agbà lọ to Bẹtẹli, Jeloboami dlẹnalọ etọn sọn agbà lọ kọ̀n bo dọmọ: “Mì wle e!”+ To afọdopolọji, alọ he e dlẹn do e lọ hú* bọ e masọ sọgan há ẹ ba.+
5 Agbà lọ sọ zẹ̀ bọ afín lọ lẹ vúnvún kọnyinai sọn agbà lọ ji sọgbe hẹ ohia* he omẹ Jiwheyẹwhe nugbo lọ tọn ko na gbọn ohó Jehovah tọn gblamẹ.
6 Todin, ahọlu dọna omẹ Jiwheyẹwhe nugbo lọ tọn dọmọ: “Jaale, biọ nukundagbe Jehovah Jiwheyẹwhe towe tọn* bo hodẹ̀ do ota ṣie mẹ, na alọ ṣie ni gọ̀ jẹ otẹn etọn mẹ.”+ Omẹ Jiwheyẹwhe nugbo lọ tọn sọ biọ nukundagbe Jehovah tọn, bọ alọ ahọlu tọn sọ gọ̀ jẹ otẹn etọn mẹ.
7 Ahọlu sọ dọna omẹ Jiwheyẹwhe nugbo lọ tọn dọmọ: “Hodo mi yì whégbè bo dùnú kleun de, bosọ gbọ ma na we nunina de.”
8 Ṣigba, omẹ Jiwheyẹwhe nugbo lọ tọn dọna ahọlu dọmọ: “Eyin a tlẹ na mi mado-awe owhé towe tọn, yẹn ma na hodo we yì bo dùnú kavi nùsin tofi.
9 Na nuhe Jehovah degbe etọn na mi die: ‘Hiẹ ma dona dùnú kavi nùsin, mọ hiẹ ma dona lẹkọ gbọn aliho dopolọ he ji a gbọn yì.’”
10 Enẹwutu, e dedo gbọn aliho devo ji bo ma lẹkọ gbọn aliho dopolọ he ji e gbọn yì Bẹtẹli.
11 Yẹwhegán yọnhonọ de tin he nọ nọ̀ Bẹtẹli, visunnu etọn lẹ sọ wá whégbè bo dọ nuhe omẹ Jiwheyẹwhe nugbo lọ tọn ko wà to Bẹtẹli to gbenẹgbe lẹpo na ẹn gọna ohó he e ko dọna ahọlu lẹ. To whenue yé ko dọ ehe lẹpo na otọ́ yetọn godo,
12 otọ́ yetọn kanse yé dọmọ: “Aliho tẹwẹ e gbọn?” Visunnu etọn lẹ sọ do aliho he omẹ Jiwheyẹwhe nugbo lọ tọn he wá sọn Juda lọ ko gbọn hia ẹ.
13 Todin, e dọna visunnu etọn lẹ dọmọ: “Mì wleawuna kẹtẹkẹtẹ lọ na mi.” Yé sọ wleawuna kẹtẹkẹtẹ lọ na ẹn bọ e hẹ e ji.
14 E jẹgodona omẹ Jiwheyẹwhe nugbo lọ tọn bo wá mọ ẹn to aisinsin to atin daho de sá. E sọ dọna ẹn dọmọ: “Hiẹ wẹ omẹ Jiwheyẹwhe nugbo lọ tọn he wá sọn Juda lọ ya?”+ Ewọ gblọn dọmọ: “Yẹn wẹ.”
15 E sọ dọna ẹn dọmọ: “Hodo mi yì whégbè bo dùnú.”
16 Ṣigba, ewọ dọmọ: “Yẹn ma sọgan lẹkọ hodo we kavi kẹalọyi oylọ-basinamẹ towe, mọ n’ma sọgan dùnú kavi nùsin hẹ we tofi.
17 Na Jehovah ko degbena mi dọ, ‘Hiẹ ma dona dùnú kavi nùsin to finẹ. Hiẹ masọ dona lẹkọ gbọn aliho dopolọ he ji a gbọn yì.’”
18 E sọ dọna ẹn dọmọ: “Yẹwhegán de wẹ yẹnlọsu taidi hiẹ, podọ angẹli de dọna mi gbọn ohó Jehovah tọn gblamẹ dọ, ‘Hẹn ẹn lẹkọ hodo we wá owhé towe gbè, na e nido dùnú bo nùsin.’” (Kiklọ ẹ wẹ e te.)
19 Enẹwutu, ewọ lẹkọ hodo e nado dùnú bo nùsin to owhé etọn gbè.
20 Dile yé to aisinsin to tafo kọ̀n, ohó Jehovah tọn wá yẹwhegán he plan ẹn lẹkọ lọ dè,
21 bọ e ze ogbè daga bo dọna omẹ Jiwheyẹwhe nugbo lọ tọn he wá sọn Juda lọ dọmọ, “Nuhe Jehovah dọ die: ‘Na hiẹ ṣiatẹ sọta anademẹ Jehovah tọn bo ma yìn gbedide he Jehovah Jiwheyẹwhe towe ko na we wutu,
22 ṣigba bọ hiẹ lẹkọyi nado dùnú bo nùsin to fihe yè ko dọna we gandego dọ, “A dùnú kavi nùsin blo,” oṣiọ towe ma na yin dìdì do yọdò tọgbo towe lẹ tọn mẹ.’”+
23 To whenue omẹ Jiwheyẹwhe nugbo lọ tọn ko dù bo nù godo, yẹwhegán yọnhonọ lọ wleawuna kẹtẹkẹtẹ de na yẹwhegán he e ko plan lẹkọ lọ.
24 Ewọ sọ wleali dedo, ṣigba kinnikinni de pé e to aliji bo hù i.+ Oṣiọ etọn sọ gbọṣi aliho lọ ji bọ kẹtẹkẹtẹ lọ ṣite to e kọ̀n; kinnikinni lọ lọsu ṣite to oṣiọ lọ kọ̀n.
25 Sunnu delẹ juwajei bo mọ oṣiọ he gbọṣi aliji lọ po kinnikinni he ṣite to oṣiọ lọ kọ̀n po. Yé sọ wá bo dọho gandego to tòdaho he mẹ yẹwhegán yọnhonọ lọ nọ nọ̀.
26 To whenue yẹwhegán he ko plan ẹn lẹkọ sọn ali etọn ji lọ sè ehe, e dọ to afọdopolọji dọmọ: “Omẹ Jiwheyẹwhe nugbo lọ tọn he ṣiatẹ sọta anademẹ Jehovah tọn lọ wẹ;+ Jehovah ko jo e do alọmẹ na kinnikinni, na e nido tlẹ́n ẹn bo hù i, sọgbe hẹ ohó he Jehovah ko dọna ẹn.”+
27 Enẹgodo, e dọna visunnu etọn lẹ dọmọ: “Mì wleawuna kẹtẹkẹtẹ lọ na mi.” Yé sọ wleawu etọn na ẹn.
28 Ewọ sọ wleali bo wá mọ oṣiọ he gbọṣi aliji lọ bọ kẹtẹkẹtẹ lọ po kinnikinni lọ po ṣite to e kọ̀n. Kinnikinni lọ ma dù oṣiọ lọ, mọ e masọ tlẹ́n kẹtẹkẹtẹ lọ.
29 Yẹwhegán lọ sọ ze oṣiọ omẹ Jiwheyẹwhe nugbo lọ tọn do kẹtẹkẹtẹ lọ ji bo ze e lẹkọwa tòdaho he mẹ ewọ lọsu nọ nọ̀ nado nọ aluẹmẹ na ẹn bo dì i.
30 E sọ tẹ́ oṣiọ lọ do yọdò etọn titi mẹ bọ yé to avivi do e ji mapote dọmọ: “Ṣo, nọvisunnu ṣie!”
31 To whenue e ko dì i godo, e dọna visunnu etọn lẹ dọmọ: “Eyin n’kú, fie omẹ Jiwheyẹwhe nugbo lọ tọn yin dìdì do wẹ mì ni dì mi do. Mì tẹ́ ohú ṣie lẹ do ohú etọn lẹ pá.+
32 Ohó Jehovah tọn he ewọ dọ sọta agbà he to Bẹtẹli lọ podọ sọta ohọ̀ sinsẹ̀n-bibasi tọn lẹpo he to ofi yiaga lẹ+ to tòdaho Samalia tọn lẹ mẹ na mọ hẹndi dandan.”+
33 Etlẹ yin to nujijọ ehe godo, Jeloboami ma lẹkọ sọn aliho ylankan etọn ji, ṣigba e zindonukọn nado nọ de yẹwhenọ lẹ sọn omẹ paa lẹ mẹ na ofi yiaga lẹ.+ Mẹdepope he jlo wẹ e nọ na aṣẹ di yẹwhenọ* bo nọ dọmọ: “Ewọ ni lẹzun dopo to yẹwhenọ lẹ mẹ na ofi yiaga lẹ.”+
34 Ylando he whédo Jeloboami+ tọn wà ehe wẹ zọ́n bọ yé do yin vivasudo bo yin kúnsúdona sọn aigba nukunmẹ.+
Nudọnamẹ Odò Tọn
^ Kavi “nudabla.”
^ Kavi “Nudabla.”
^ Kavi “afín he gọ́ na ojó,” enẹ wẹ, afín he ojó avọ́sinsan lẹ tọn ko hẹn yọ̀n.
^ Kavi “kúsẹ́.”
^ Kavi “nudabla.”
^ Kavi “hẹn nukunmẹ Jehovah Jiwheyẹwhe towe tọn bọ̀.”
^ To paa mẹ, “nọ hẹn alọ etọn gọ́.”
