1 Ahọlu lẹ 20:1-43
20 Todin, Ahọlu Bẹni-hadadi+ Silia+ tọn bẹ awhànpa etọn pete pli dopọ to pọmẹ hẹ ahọlu 32 devo lẹ po osọ́ yetọn lẹ po gọna osọ́-kẹkẹ yetọn lẹ; e sọ hẹji yì bo dosla lẹdo+ Samalia+ bosọ hoavùn hẹ ẹ.
2 Enẹgodo, e do wẹnsagun lẹ hlan Ahọlu Ahabi+ Islaeli tọn to tòdaho lọ mẹ bo dọna ẹn dọmọ: “Nuhe Bẹni-hadadi dọ die,
3 ‘Ṣie wẹ fataka po sika towe lẹ po yin, gọna asi po visunnu towe dagbe hugan lẹ po.’”
4 Ahọlu Islaeli tọn sọ gblọn dọmọ: “Oklunọ ṣie ahọlu E, towe wẹ yẹn po nutindo ṣie lẹpo po, kẹdẹdile a dọ do.”+
5 Wẹnsagun lọ lẹ sọ lẹkọwa bo dọmọ: “Nuhe Bẹni-hadadi dọ die, ‘N’dowẹn hlan we dai dọ: “Hiẹ na bẹ fataka, sika, asi po visunnu towe lẹ po na mi.”
6 Ṣigba, to osọ to ojlẹ ehe nkọ mẹ, yẹn na do devizọnwatọ ṣie lẹ hlan bọ yé na yí sọwhiwhe do keje ohọ̀ towe po ohọ̀ devizọnwatọ towe lẹ tọn po bo na bẹ nuhọakuẹ towe lẹpo yì.’”
7 To whenẹnu, ahọlu Islaeli tọn ylọ mẹho otò lọ tọn lẹpo bo dọmọ: “Mì jaale bo na ayidonugo bo mọdọ dawe ehe ko magbe nado hẹn nugbajẹmẹji wá, na e ko biọ asi ṣie lẹ, visunnu ṣie lẹ, fataka ṣie po sika ṣie po bọ n’ma gbẹ́.”
8 Mẹho lọ lẹpo po gbẹtọ lọ lẹpo po sọ dọna ẹn dọmọ: “A setonuna ẹn blo, mọ a yigbena ẹn blo.”
9 Enẹwutu, e dọna wẹnsagun Bẹni-hadadi tọn lẹ dọmọ: “Mì dọna oklunọ ṣie ahọlu dọ, ‘Nuhe a biọ devizọnwatọ towe to tintan whenu lẹpo wẹ n’na wà na we, amọ́ n’ma gán wà ehe uwọ.’” Devizọnwatọ lọ lẹ sọ dedo bo yì dowẹn ẹn.
10 Bẹni-hadadi sọ dowẹn hlan ẹn dọmọ: “Na yẹwhe lẹ ni sayana mi sinsinyẹn eyin kọ́gudu he pò to Samalia na pé, na dopodopo mẹhe hodo mi lẹ tọn nido mọ alọgogo dopo yí!”
11 Ahọlu Islaeli tọn sọ gblọn dọmọ: “Mì dọna ẹn dọ, ‘Mẹhe to gbaja blá ma dona doawagun di mẹhe to dide e sọn ogo gba.’”+
12 Tlolo he e sè gblọndo ehe, dile ewọ po ahọlu lọ lẹ po to ahànnu to gòhọ yetọn lẹ mẹ, e dọna devizọnwatọ etọn lẹ dọmọ: “Mì wleawu nado yì funawhàn!” Enẹwutu, yé wleawu nado yì tọ́nawhàn tòdaho lọ.
13 Ṣigba, yẹwhegán de dọnsẹpọ Ahọlu Ahabi+ Islaeli tọn bo dọmọ: “Nuhe Jehovah dọ die, ‘A mọ gbẹtọgun daho ehe lẹpo ya? Pọ́n, yẹn na jo yé do alọ towe mẹ to egbé, bọ hiẹ na yọnẹn dọ yẹn wẹ Jehovah.’”+
14 Ahabi kanse dọmọ: “Gbọn mẹnu gblamẹ?” yẹwhegán lọ sọ dọmọ: “Nuhe Jehovah dọ die, ‘Gbọn devizọnwatọ ahọvi ayimatẹn lẹ tọn lẹ gblamẹ.’” E sọ kanse dọmọ: “Mẹnu whẹ́whẹ́ wẹ na tọ́nawhànmẹ?” ewọ sọ dọmọ: “Hiẹ wẹ!”
15 Whenẹnu wẹ Ahabi hia devizọnwatọ ahọvi ayimatẹn lẹ tọn lẹ bo mọ omẹ 232; e sọ hia sunnu Islaeli tọn lẹpo bo mọ yé omẹ 7 000.
16 Yé tọ́njẹgbonu to whèmẹ to whenue Bẹni-hadadi po ahọlu 32 he to godonọna ẹn lọ lẹ po to ahànnumu to gòhọ lẹ mẹ.
17 Whenue devizọnwatọ ahọvi ayimatẹn lẹ tọn lẹ whẹ́whẹ́ tọ́njẹgbonu, Bẹni-hadadi do wẹnsagun lẹ hlan. Yé sọ na ẹn linlin dọmọ: “Sunnu lẹ ko tọ́njẹgbonu wá sọn Samalia.”
18 E sọ dọmọ: “Eyin jijọho gbé wẹ yé tọ́n wá, mì wle yé gbẹ̀te; kavi eyin awhànfun gbé wẹ yé tọ́n wá, mì gbẹ́ dona wle yé gbẹ̀te.”
19 Ṣigba, to whenue omẹ ehelẹ—yèdọ devizọnwatọ ahọvi ayimatẹn lẹ tọn lẹ po awhànpa he hodo yé lẹ po—tọ́njẹgbonu sọn tòdaho lọ mẹ,
20 dopodopo yetọn jẹ mẹhe pé avùn hẹ yé lẹ hù ji. Silianu lẹ sọ họ̀n,+ bọ Islaeli dómọna yé, ṣigba Ahọlu Bẹni-hadadi Silia tọn po osọ́nọ delẹ po hẹ osọ́ ji bo họnyi.
21 Amọ́, ahọlu Islaeli tọn tọ́njẹgbonu bo jẹ osọ́nọ po osọ́-kẹkẹ kùntọ lẹ po hù ji, awhàngbigba* daho de wẹ e yin na ẹn sọta Silianu lẹ.
22 To godo mẹ, yẹwhegán lọ+ dọnsẹpọ ahọlu Islaeli tọn bo dọna ẹn dọmọ: “Yì, bo hẹn dewe lodo bosọ lẹnnupọndo nuhe a na wà ji,+ na to bẹjẹeji owhe* he ja tọn, ahọlu Silia tọn na hẹji wá tọ́nawhàn we.”+
23 Todin, devizọnwatọ ahọlu Silia tọn lẹ dọna ẹn dọmọ: “Jiwheyẹwhe osó lẹ tọn wẹ Jiwheyẹwhe yetọn. Enẹ wẹ zọ́n bọ yé do duto mí ji. Ṣigba, eyin mí hoavùn hẹ yé to aigba flala ji, mí na duto yé ji.
24 Humọ, nuhe hiẹ ni wà die: De ahọlu lẹpo sẹ̀+ sọn otẹn yetọn mẹ bo yí ayimatẹn-gán lẹ do diọtẹnna yé.
25 Enẹgodo, bẹ awhànpa de pli* he na sọzẹn hẹ awhànpa he a ko hẹnbu, yèdọ osọ́ do osọ́ tẹnmẹ podọ osọ́-kẹkẹ do osọ́-kẹkẹ tẹnmẹ. Gbọ mí ni hoavùn hẹ yé to aigba flala ji, mí nasọ duto yé ji janwẹ.” Ewọ sọ dotoaina ayinamẹ yetọn bo wà domọ pẹpẹ.
26 To bẹjẹeji owhe* lọ tọn, Bẹni-hadadi bẹ Silianu lẹ pli bo hẹji yì Afẹki+ nado funawhàn hẹ Islaeli.
27 Omẹ Islaeli tọn lẹ lọsu sọ yin bibẹpli bo wleawu, yé sọ tọ́njẹgbonu yì pé yé. Whenue omẹ Islaeli tọn lẹ dosla to nukọn yetọn, yé taidi apó gbọgbọẹ tọn pẹvi awe to whenue Silianu lẹ gọ́ aigba lọ pete ji.+
28 To whenẹnu, omẹ Jiwheyẹwhe nugbo lọ tọn dọnsẹpọ ahọlu Islaeli tọn bo dọmọ: “Nuhe Jehovah dọ die, ‘Na Silianu lẹ ko dọ dọ: “Jiwheyẹwhe osó lẹ tọn wẹ Jehovah, ewọ ma yin Jiwheyẹwhe dankló lẹ tọn” wutu, yẹn na jo gbẹtọgun daho ehe lẹpo do alọ towe mẹ,+ mìwlẹ nasọ yọnẹn hezeheze dọ yẹn wẹ Jehovah.’”+
29 Yé sọ gbọṣi osla yetọn lẹ mẹ pannukọn yede na azán ṣinawe, bọ to azán ṣinawetọ gbè, awhàn lọ bẹjẹeji. Omẹ Islaeli tọn lẹ hù awhànfuntọ Silianu he nọ zọ̀n afọ 100 000 to azán dopo gblamẹ.
30 Mẹhe pò lẹ họnyi Afẹki+ bo biọ tòdaho lọ mẹ. Ṣigba, adó họ́ jẹ sunnu 27 000 ji to mẹhe pò lẹ mẹ. Bẹni-hadadi lọsu họ̀n biọ tòdaho lọ mẹ bo whlá ede do abò de mẹ.
31 Devizọnwatọ etọn lẹ sọ dọna ẹn dọmọ: “Pọ́n, mí ko sè dọ ahọlu whédo Islaeli tọn lẹ tọn lẹ nọ wàlẹblanunamẹ.* Jaale, gbọ mí ni sìn odẹ́vọ̀ do alinkàn bo blá okàn lẹ do ota bosọ yì ahọlu Islaeli tọn dè. Vlavo ewọ sọgan pò we* dogbẹ̀.”+
32 Enẹwutu, yé sìn odẹ́vọ̀ do alinkàn bo blá okàn lẹ do ota wá ahọlu Islaeli tọn dè bosọ dọmọ: “Bẹni-hadadi devizọnwatọ towe dọ dọ, ‘Jaale bo pò mi* dogbẹ̀.’” Ewọ sọ gblọn dọmọ: “E pò togbẹ̀ wẹ ya? Nọvisunnu ṣie wẹ be.”
33 Sunnu lọ lẹ yí ehe do mọ ohia dagbe de bosọ yawu yí nuhe dọ e te sè, enẹwutu yé dọmọ: “Nọvisunnu towe wẹ Bẹni-hadadi.” Ewọ sọ dọmọ: “Mì yì plan ẹn wá.” Bẹni-hadadi sọ tọ́njẹgbonu wá e dè bọ e hẹn ẹn nado hẹji biọ osọ́-kẹkẹ lọ mẹ.
34 Todin, Bẹni-hadadi dọna ẹn dọmọ: “Yẹn na gọ̀ tòdaho he otọ́ ṣie ko yí sọn otọ́ towe si lẹ jo, hiẹ sọgan sọ do ahi lẹ ai* to Damasku, kẹdẹdile otọ́ ṣie ko wà do to Samalia.”
Ahabi sọ gblọn dọmọ: “Yẹn na dike hiẹ ni yì, to dodonu gbekọndopọ* ehe tọn ji.”
Enẹwutu, e basi gbekọndopọ de hẹ ẹ bo dike e ni yì.
35 To kọndopọ mẹ hẹ ohó Jehovah tọn, dopo to visunnu yẹwhegán* lẹ tọn lẹ+ mẹ dọna hatọ etọn dọ: “Jaale bo linú mi.” Amọ́, dawe lọ gbẹ́ ma nado linú in.
36 Enẹwutu, e dọna ẹn dọmọ: “Na hiẹ ma dotoaina ogbè Jehovah tọn wutu, tlolo he hiẹ tọ́n sọn fi kinnikinni de na hù we.” To whenue ewọ tọ́n sọn e dè godo, kinnikinni de tọ́n pé e bo hù i.
37 E sọ mọ dawe devo bo dọna ẹn dọ: “Jaale bo linú mi.” Dawe lọ sọ linú in bo gbleawuna ẹn.
38 Yẹwhegán lọ sọ yì bo nọtepọn ahọlu to aliji bosọ yí apà-blanú do blá nukunmẹ nado diọ awusọhia ede tọn.
39 Dile ahọlu juwajei, e dawhá hlan ahọlu dọmọ: “Devizọnwatọ towe yì awhàn nukọn to fie awhàn sinyẹn te hugan, mẹde sọ tọ́n wá bo plan dawe de wá na mi bosọ dọ dọ, ‘Ṣọ́ dawe ehe. Eyin yè ba ẹ pò, ogbẹ̀ towe wẹ na yin yíyí do ogbẹ̀ etọn tẹnmẹ,*+ kavi hiẹ na sú talẹnti* fataka tọn dopo.’
40 To whenue alọnu devizọnwatọ towe tọn ján to yidọn-yide etọn lẹ mẹ, dawe lọ họnyi to ajiji mẹ.” Ahọlu Islaeli tọn sọ dọna ẹn dọmọ: “Mọ wẹ whẹdida towe na yin; hiẹ ko dawhẹna dewe.”
41 E sọ yawu de apà-blanú lọ sẹ̀ sọn nukunmẹ bọ ahọlu Islaeli tọn wá mọdọ dopo to yẹwhegán+ lẹ mẹ wẹ ewọ.
42 E dọna ẹn dọmọ: “Nuhe Jehovah dọ die, ‘Na hiẹ ko jo dawe he yẹn dọ dọ e dona yin hùhù lọ do bọ e họ̀ngán sọn alọ towe mẹ wutu,+ ogbẹ̀ towe wẹ na yin yíyí do ogbẹ̀ etọn tẹnmẹ,*+ podọ omẹ towe lẹ do omẹ etọn lẹ tẹnmẹ.’”+
43 Enẹwutu, ahọlu Islaeli tọn kúṣiọ bo lẹkọyi whé to Samalia+ po flumẹjijẹ po.
Nudọnamẹ Odò Tọn
^ Kavi “hùhù.”
^ Enẹ wẹ, amakikọ-whenu.
^ To paa mẹ, “hia awhànpa.”
^ Enẹ wẹ, amakikọ-whenu.
^ Kavi “yin ahọlu he nọ do owanyi nugbo hia.”
^ Kavi “alindọn towe.”
^ Kavi “alindọn ṣie.”
^ Kavi “sọ na aliho lẹ dewe.”
^ Kavi “alẹnu.”
^ E taidi dọ hogbe lọ “visunnu yẹwhegán lẹ tọn lẹ” to alọdlẹndo wehọmẹ de he nọ plọnazọ́n yẹwhegán lẹ kavi pipli yẹwhegán lẹ tọn de.
^ Kavi “alindọn towe na nọ otẹn alindọn etọn tọn mẹ.”
^ Kavi “alindọn towe na nọ otẹn alindọn etọn tọn mẹ.”
