1 Ahọlu lẹ 22:1-53
22 Awhàn depope ma fọ́n to Silia po Islaeli po ṣẹnṣẹn na owhe atọ̀n.
2 To owhe atọ̀ntọ lọ mẹ, Ahọlu Jehoṣafati+ Juda tọn jẹte yì ahọlu Islaeli tọn+ dè.
3 Ahọlu Islaeli tọn sọ dọna devizọnwatọ etọn lẹ dọmọ: “Be mì yọnẹn dọ míwlẹ tọn wẹ Lamọti-giliadi+ yin ya? Ṣogan, mí to awuwhle nado gọ̀ ẹ yí sọn ahọlu Silia tọn si.”
4 E sọ dọna Jehoṣafati dọmọ: “Hiẹ na zọnhẹ mi yì hoavùn to Lamọti-giliadi ya?” Jehoṣafati gblọnna ahọlu Islaeli tọn dọmọ: “Mẹdopolọ wẹ yẹn po hiẹ po. Mẹdopolọ sọ wẹ omẹ ṣie lẹ po omẹ towe lẹ po. Osọ́ ṣie lẹ sọ yin osọ́ towe lẹ.”+
5 Ṣigba, Jehoṣafati dọna ahọlu Islaeli tọn dọmọ: “Jaale, kàn ohó he Jehovah na dọ biọ+ whẹ́.”+
6 Enẹwutu, ahọlu Islaeli tọn bẹ yẹwhegán lẹ pli, yèdọ nudi sunnu 400 bo dọna yé dọmọ: “Yẹn ni yì funawhàn hẹ Lamọti-giliadi ya, kavi yẹn ni hònúpla?” Yé dọmọ: “Hẹji yì, Jehovah nasọ jo e do alọ ahọlu tọn mẹ.”
7 Jehoṣafati sọ dọmọ: “Yẹwhegán Jehovah tọn de ma tofi wẹ? Mì gbọ mí nisọ kanhose gbọn ewọ gblamẹ.”+
8 To whenẹnu, ahọlu Islaeli tọn dọna Jehoṣafati dọmọ: “Dawe devo de tin he gblamẹ mí sọgan kanhose Jehovah gbọn;+ amọ́ n’gbẹwanna ẹn,+ na e ma nọ dọ dọdai dagbe gando go e gbede, adavo ylankan kẹdẹ.+ Mikaia visunnu Imla tọn wẹ.” Ṣigba, Jehoṣafati dọmọ: “Ahọlu ni ma dọ mọ blo.”
9 Enẹwutu, ahọlu Islaeli tọn ylọ ahọluzọnwatọ họ̀nmẹ tọn de bo dọmọ: “Yawu yì plan Mikaia visunnu Imla tọn wá.”+
10 Todin, ahọlu Islaeli tọn po Jehoṣafati ahọlu Juda tọn po to aisinsin, dopodopo yetọn to ofìn etọn ji bo sọnú di ahọlu to likun-flétẹn he to họntonu họngbo Samalia tọn bọ yẹwhegán lọ lẹpo to dọdai dọ to nukọn yetọn.+
11 Zedekia visunnu Kẹnaana tọn sọ yí gànyuu do basi azò delẹ bo dọmọ: “Nuhe Jehovah dọ die, ‘Ehelẹ wẹ hiẹ na yí do sọ́* Silianu lẹ kaka hiẹ nado sukúndona yé.’”
12 Yẹwhegán he pò lẹpo sọ to dọdai dopolọ dọ dọmọ: “Hẹji yì Lamọti-giliadi, hiẹ nasọ tindo kọdetọn dagbe; Jehovah na jo e do alọ ahọlu tọn mẹ.”
13 Wẹnsagun he yì Mikaia ylọ gbé lọ dọna ẹn dọmọ: “Pọ́n! Ohó dagbe wẹ yẹwhegán lẹpo to pọmẹ dọna ahọlu. Jaale, gbọ ohó hiẹ lọsu tọn ni taidi ohó yetọn nkọ, hiẹ nisọ dọho dagbe.”+
14 Ṣigba, Mikaia dọmọ: “Dile Jehovah togbẹ̀, nudepope he Jehovah dọna mi wẹ yẹn na dọ.”
15 Ewọ sọ biọ họmẹ yì ahọlu dè bọ ahọlu kanse e dọmọ: “Mikaia, mí ni yì funawhàn hẹ Lamọti-giliadi ya, kavi mí ni hònúpla?” To afọdopolọji, e gblọn dọmọ: “Hẹji yì, hiẹ nasọ tindo kọdetọn dagbe; Jehovah na jo e do alọ ahọlu tọn mẹ.”
16 Whenẹnu wẹ ahọlu dọna ẹn dọmọ: “Whla nẹmu wẹ yẹn na hẹn we whlé ma nado dọ nudevo na mi adavo nugbo lọ to oyín Jehovah tọn mẹ?”
17 Enẹwutu, e dọmọ: “N’mọ Islaelivi lẹpo bọ yé gbàdo to osó lẹ ji,+ taidi lẹngbọ he ma tindo lẹngbọhọtọ. Jehovah dọmọ: ‘Omẹ ehelẹ ma tindo klunọ. Gbọ dopodopo yetọn ni lẹkọyi owhé etọn gbè to jijọho mẹ.’”
18 Ahọlu Islaeli tọn sọ dọna Jehoṣafati dọmọ: “N’ma ko dọna we dai dọ, ‘E ma na dọ dọdai dagbe gando go e, adavo ylankan kẹdẹ’ ya?”+
19 Mikaia sọ dọmọ: “Enẹwutu, dotó ohó Jehovah tọn: Yẹn mọ Jehovah to aisinsin to ofìn etọn+ ji bọ awhànpa olọn tọn lẹpo to ote to e dè, to adusi po amiyọn etọn po.+
20 Jehovah sọ dọ dọ, ‘Mẹnu wẹ na yì blẹ Ahabi, na ewọ nido hẹji yì Lamọti-giliadi bo ṣíawhàn?’ Mẹde nọ dọ ehe bọ omẹ diẹ nọ dọ devo.
21 Nudida gbigbọnọ*+ de sọ sẹwá bo nọte to Jehovah nukọn bosọ dọ dọ, ‘Yẹn na blẹ ẹ.’ Jehovah kanse e dọ, ‘Nawẹ hiẹ na wà ehe gbọn?’
22 E gblọn dọmọ, ‘Yẹn na tọ́nyi bo na lẹzun gbigbọ oklọ tọn de to onù yẹwhegán etọn lẹpo tọn mẹ.’+ Ewọ sọ dọmọ, ‘Hiẹ na blẹ ẹ bo na tlẹ sọ tindo kọdetọn dagbe. Tọ́nyi bo wàmọ.’
23 Podọ todin, Jehovah ko ze gbigbọ oklọ tọn do onù yẹwhegán towe ehe lẹpo tọn mẹ,+ ṣigba Jehovah ko magbe nado hẹn nugbajẹmẹji wá ji we.”+
24 Todin, Zedekia visunnu Kẹnaana tọn dọnsẹpọ bo hotómẹ na Mikaia bosọ dọmọ: “Aliho tẹ mẹ wẹ gbigbọ Jehovah tọn jo mi do bo dọhona we te?”+
25 Mikaia gblọn dọmọ: “Pọ́n! Hiẹ na mọ aliho lọ to gbeegbe hiẹ na họ̀n whlá do abò homẹ tọn lọ mẹ.”
26 Ahọlu Islaeli tọn sọ dọmọ: “Ze Mikaia jo na Amọni ogán tòdaho lọ tọn po Joaṣi visunnu ahọlu tọn po.
27 Dọna yé dọ, ‘Nuhe ahọlu dọ die: “Mì ze dawe ehe do gànmẹ+ bo de akla po osin etọn po pò kakajẹ whenue yẹn na lẹkọwa to jijọho mẹ.”’”
28 Ṣigba, Mikaia dọmọ: “Eyin hiẹ lẹkọwa to jijọho mẹ, be Jehovah ma ko dọhona mi.”+ E sọ yidogọ dọmọ: “Mì doayi ehe go, mì gbẹtọ lẹpo emi.”
29 Ahọlu Islaeli tọn po Jehoṣafati ahọlu Juda tọn po sọ hẹji yì Lamọti-giliadi.+
30 Todin, ahọlu Islaeli tọn dọna Jehoṣafati dọmọ: “Yẹn na diọ awusọhia ṣie whẹpo do yì awhàn, amọ́ hiẹ ni do awù ahọlu tọn towe.” Ahọlu Islaeli tọn sọ diọ awusọhia ede tọn+ bo yì awhàn.
31 Todin, ahọlu Silia tọn ko degbena awhàngán daho osọ́-kẹkẹ lẹ tọn etọn 32 lẹ+ dọmọ: “Mì hoavùn hẹ mẹdepope blo, yèdọ omẹ pẹvi kavi omẹ daho, adavo ahọlu Islaeli tọn kẹdẹ.”
32 Tlolo he awhàngán daho osọ́-kẹkẹ lẹ tọn lọ lẹ mọ Jehoṣafati, yé dọna yedelẹ dọ: “Ayihaawe ma tin dọ ahọlu Islaeli tọn die.” Enẹwutu, yé lẹ́ nado hoavùn hẹ ẹ; Jehoṣafati sọ jẹ awhádo ji na alọgọ.
33 Whenue awhàngán daho osọ́-kẹkẹ lẹ tọn lọ lẹ mọdọ e ma yin ahọlu Islaeli tọn wẹ ewọ, yé lẹ́ sọn godona ẹn to afọdopolọji.
34 Ṣigba gbọn kosọ dali,* sunnu dopo de ogá etọn bọ e jẹ ahọlu Islaeli tọn go to fie gbaja linlọ̀n etọn pé te. Enẹwutu, ahọlu dọna osọ́-kẹkẹ kùntọ etọn dọmọ: “Lilẹ́ bo plan mi sọn awhàngbenu,* na n’ko gbleawu taun.”+
35 Avùn lọ sinyẹn taun to azán lọ blebu ji, bọ yè dona hẹn ahọlu go whẹpo e nido nọte to osọ́-kẹkẹ lọ mẹ pannukọn Silianu lẹ. Ohùn he tọ́n sọn apà lọ mẹ kọ̀n do osọ́-kẹkẹ awhàn tọn lọ mẹ, bọ ahọlu wá kú to whèjai.+
36 To whèjai, awhágbe de yin sisè gbọn osla lọ mẹ dọmọ: “Mẹdopodopo ni lẹkọyi tòdaho etọn mẹ! Mẹdopodopo ni yì otò etọn mẹ!”+
37 Mọ wẹ ahọlu lọ kú do, bọ oṣiọ etọn yin zize yì Samalia; yé sọ dì ahọlu do Samalia.
38 Whenue yé klọ́ osọ́-kẹkẹ awhàn tọn lọ to osindò Samalia tọn tó, avún lẹ wẹ wá didọ́ ohùn etọn bọ galọtọ lẹ wá lawu to finẹ,* sọgbe hẹ nuhe Jehovah ko dọ.+
39 Na nuhe dù otàn Ahabi tọn he pò, yèdọ nuhe e wà lẹpo, owhé* he e yí ajinnakú-dú+ do gbá po tòdaho he e do lẹpo po, be e ma yin kinkan do owe whenuho ahọlu Islaeli tọn lẹ tọn mẹ ya?
40 Enẹgodo, Ahabi yin hinhẹn nado mlọnai hẹ tọgbo etọn lẹ;+ visunnu etọn Ahazia+ sọ lẹzun ahọlu do otẹn etọn mẹ.
41 Jehoṣafati+ visunnu Asa tọn ko duahọlu do Juda ji to owhe ẹnẹtọ Ahọlu Ahabi Islaeli tọn mẹ.
42 Owhe 35 wẹ Jehoṣafati tindo to whenue e lẹzun ahọlu, e sọ dugán na owhe 25 to Jelusalẹm. Oyín onọ̀ etọn tọn wẹ Azuba viyọnnu Ṣilhi tọn.
43 E sọ zindonukọn nado to zọnlinzin gbọn aliho Asa+ otọ́ etọn tọn lẹpo ji. E ma lẹ́ sọn e ji, e sọ wà nuhe sọgbe to nukun Jehovah tọn mẹ.+ Ṣigba, ofi yiaga lẹ ma yin didesẹ, podọ gbẹtọ lẹ gbẹsọ to avọ́sinsan po avọ́sinsan mimẹ̀ lẹ po basi to ofi yiaga lẹ.+
44 Jehoṣafati hẹn haṣinṣan jijọho tọn go hẹ ahọlu Islaeli tọn.+
45 Na nude dù otàn Jehoṣafati tọn he pò, yèdọ huhlọn daho he e dohia po awhàn he e fùn po, be e ma yin kinkan do owe whenuho ahọlu Juda tọn lẹ tọn mẹ ya?
46 Ewọ sọ de sunnu galọtọ tẹmpli mẹ tọn+ he pò to aigba lọ ji lẹ sẹ̀, yèdọ mẹhe pò sọn azán Asa otọ́ etọn tọn gbè lẹ.+
47 Ahọlu de ma to Edomi+ to whenẹnu; nukunpedonugotọ de wẹ nọ yinuwa di ahọlu.+
48 Jehoṣafati sọ basi tọjihun Talṣiṣi tọn* lẹ nado nọ yì bẹ sika wá sọn Ofili,+ ṣigba yé ma yì dọ́n, na tọjihun lọ lẹ siọ to Ezioni-gebeli+ wutu.
49 Whenẹnu, Ahazia visunnu Ahabi tọn dọna Jehoṣafati dọmọ: “Dike devizọnwatọ ṣie lẹ ni yì hẹ devizọnwatọ towe lẹ to tọjihun lọ lẹ mẹ,” ṣigba Jehoṣafati ma yigbe.
50 Enẹgodo, Jehoṣafati yin hinhẹn nado mlọnai hẹ tọgbo etọn lẹ+ bo yin dìdì dopọ hẹ tọgbo etọn lẹ do Tòdaho Davidi tọgbo etọn tọn mẹ; visunnu etọn Jeholami+ sọ lẹzun ahọlu do otẹn etọn mẹ.
51 Ahazia+ visunnu Ahabi tọn lẹzun ahọlu do Islaeli ji to Samalia to owhe 17tọ Ahọlu Jehoṣafati Juda tọn mẹ, e sọ duahọlu do Islaeli ji na owhe awe.
52 E to nuhe ylan to nukun Jehovah tọn mẹ lẹ wà mapote bosọ to zọnlinzin gbọn aliho otọ́ etọn+ po onọ̀ etọn+ po tọn ji, podọ gbọn aliho Jeloboami visunnu Nebati tọn ji, mẹhe hẹn Islaeli nado waylando.+
53 E zindonukọn nado to Baali sẹ̀n+ bo to didẹ́ do odò na ẹn bosọ nọ to homẹ hẹngblena Jehovah Jiwheyẹwhe Islaeli tọn,+ kẹdẹdile otọ́ etọn ko wà do.
Nudọnamẹ Odò Tọn
^ Kavi “sisẹ́.”
^ Kavi “Angẹli.”
^ To paa mẹ, “osla lọ mẹ.”
^ Kavi “to homẹvọ etọn mẹ.”
^ Kavi vlavo, “fie galọtọ lẹ nọ lawu te wẹ avún lẹ didọ́ ohùn etọn te.”
^ Kavi “họ̀nmẹ.”
