1 Otànnugbo lẹ 11:1-47
11 To nukọn mẹ, Islaelivi lẹpo pli do Davidi dè to Heblọni+ bo dọmọ: “Pọ́n! Ohú towe podọ agbasalan towe* wẹ mí yin.+
2 To ojlẹ he wayi lẹ mẹ, to whenue Sauli gbẹ́ yin ahọlu, hiẹ wẹ nọ deanana Islaeli yì awhàn.*+ Jehovah Jiwheyẹwhe towe ko sọ dọna we dọ: ‘Hiẹ wẹ na yin lẹngbọhọtọ Islaeli omẹ ṣie lẹ tọn, podọ hiẹ wẹ na lẹzun nukọntọ do Islaeli omẹ ṣie lẹ ji.’”+
3 Enẹwutu, mẹho Islaeli tọn lẹpo wá ahọlu dè to Heblọni, bọ Davidi sọ basi alẹnu de hẹ yé to Heblọni to Jehovah nukọn. Enẹgodo, yé yiamisisadode Davidi taidi ahọlu do Islaeli ji,+ sọgbe hẹ ohó he Jehovah ko dọ gbọn Samuẹli gblamẹ.+
4 To godo mẹ, Davidi po omẹ Islaeli tọn lẹpo po dedo Jelusalẹm, enẹ wẹ Jẹbusi,+ fie Jẹbusinu lẹ+ nọ nọ̀ to aigba lọ ji.
5 Mẹhe nọ nọ̀ Jẹbusi lẹ ko vlẹ Davidi kò dọmọ: “Hiẹ ma gán wáfi gbede!”+ Ṣigba, Davidi yí figángán Ziọni tọn lọ,+ ehe lẹzun Tòdaho Davidi tọn todin.+
6 Enẹwutu, Davidi dọmọ: “Omẹ tintan he na yì hù Jẹbusinu lẹ wẹ na lẹzun ogán* podọ ahọvi de.” Joabi+ visunnu Zeluia tọn wẹ yin omẹ tintan he hẹji yì, ewọ sọ lẹzun ogán.
7 Enẹgodo, Davidi jẹ figángán lọ mẹ nọ ji. Enẹ wẹ zọ́n bọ yé do nọ ylọ ẹ dọ Tòdaho Davidi tọn.
8 Davidi sọ jẹ tòdaho lọ gbá ji lẹdo pé, yèdọ sọn Pópló* lọ kọ̀n jẹ fie lẹdo e pé lẹ, bọ Joabi vọ́ pipotọ tòdaho lọ tọn jlado.
9 Gbọnmọ dali, huhlọn Davidi tọn fọ́n bo to jijẹ e ji mapote,+ Jehovah awhànpa lẹ tọn sọ tin hẹ ẹ.
10 Todin, ehelẹ wẹ nukọntọ awhànfuntọ huhlọnnọ Davidi tọn lẹ, yèdọ mẹhe nọgodona ẹn taun to ahọlu-yinyin etọn mẹ, to pọmẹ hẹ omẹ Islaeli tọn lẹpo nado yí i do doahọlu sọgbe hẹ ohó Jehovah tọn gando Islaeli go.+
11 Todohukanji awhànfuntọ huhlọnnọ Davidi tọn lẹ tọn die: Jaṣobeami+ visunnu Hakmọninu de tọn he yin nukọntọ to omẹ atọ̀n lẹ mẹ.+ Ewọ ze owhán etọn do omẹ 300 ji bo hù yé to ojlẹ dopolọ mẹ.+
12 Mẹhe bọdo ewọ go wẹ Eleazali+ visunnu Dodo Ahohinu+ lọ tọn. Ewọ yin dopo to awhànfuntọ huhlọnnọ atọ̀n lọ lẹ mẹ.
13 Ewọ to Davidi dè to Pas-damimi+ fie Filistinu lẹ ko bẹ yede pli na awhàn te. Todin, ogle de tin to finẹ he gọ́ na balekun, gbẹtọ lẹ ko sọ họnyi na Filistinu lẹ wutu.
14 Ṣigba, ewọ nọte to ogle lọ ṣẹnṣẹn bo yiavùnlọna ẹn bosọ to Filistinu lẹ hù mapote, bọ Jehovah gbọnmọ dali hẹn awhàngbigba* daho de wá.+
15 Atọ̀n to nukọntọ 30 lọ lẹ mẹ jẹte yì osé lọ kọ̀n, to Davidi dè to oslò Adulami tọn mẹ,+ dile awhànpa Filistinu lẹ tọn dosla do Agbàdo Lefaimi tọn mẹ.+
16 Davidi tin to figángán lọ mẹ to whenẹnu bọ awhànfun-gbẹ́ Filistinu lẹ tọn de tin to Bẹtlẹhẹm.
17 Davidi sọ dọ ojlo etọn tọ́n dọmọ: “Ṣo, eyin n’gán mọ osin nù sọn osindò he tin to họngbo Bẹtlẹhẹm+ tọn kọ̀n wẹ!”
18 Whenẹnu, yé omẹ atọ̀n lọ lẹ yì bo biọ osla Filistinu lẹ tọn mẹ gánnugánnu bo dọ̀n osin sọn osindò he tin to họngbo Bẹtlẹhẹm tọn kọ̀n lọ mẹ bosọ hẹn ẹn wá na Davidi; ṣigba Davidi gbẹ́ nado nù in bo kọ̀n ẹn do kọmẹ na Jehovah.
19 Ewọ dọmọ: “To pọndohlan Jiwheyẹwhe ṣie tọn mẹ, e ma sọgan wá linlẹn mẹ na mi gbede nado wà ehe! Be yẹn na nù ohùn sunnu he ze ogbẹ̀* yetọn do owù mẹ ehelẹ tọn wẹ?+ Na ogbẹ̀* yetọn wẹ yé zedo owù mẹ nado hẹn ẹn wá.” Enẹwutu, e gbẹ́ nado nù in. Nuhe awhànfuntọ huhlọnnọ etọn atọ̀n lọ lẹ wà niyẹn.
20 Abiṣai+ nọvisunnu Joabi tọn+ sọ lẹzun nukọntọ to omẹ atọ̀n devo lẹ mẹ; ewọ ze owhán etọn do omẹ 300 ji bo hù yé, podọ e diyin taidi omẹ atọ̀n diẹ lẹ.+
21 To omẹ atọ̀n ehelẹ mẹ, ewọ diyin hugan awe to yé mẹ bosọ yin ogán yetọn; ṣogan e ma to hukan dopolọ ji hẹ omẹ atọ̀n tintan lọ lẹ.
22 Bẹnaia+ visunnu Jehoiada tọn yin sunnu adọgbotọ de* he wà onú daho susu to Kabzeẹli.+ Ewọ wẹ hù visunnu Aliẹli Moabinu lọ tọn awe lẹ, podọ e biọ osindò de mẹ to gbèdopo he osin-agó to jijà bo hù kinnikinni de.+
23 E sọ hù dawe Egiptinu he tọ́nalùn tlala de he dite na awagbà atọ́n.*+ Mahopọnna dọ dawe Egiptinu lọ tindo owhán he taidi dòtin avọ̀lọ̀ntọ lẹ tọn+ de to alọmẹ, e tọ́n pé e po opò de po bo hò owhán lọ yí sọn alọ Egiptinu lọ tọn mẹ bosọ yí owhán etọn titi do hù i.+
24 Nuhe Bẹnaia visunnu Jehoiada tọn lọ wà lẹ niyẹn, podọ e diyin taidi awhànfuntọ huhlọnnọ atọ̀n diẹ lẹ.
25 Dile etlẹ yindọ e diyin hú omẹ 30 lọ lẹ, ewọ ma to hukan dopolọ ji hẹ omẹ atọ̀n lọ lẹ.+ Etomọṣo, Davidi de e taidi nukọntọ hihọ́tọ etọn titi lẹ tọn.
26 Awhànfuntọ huhlọnnọ awhànpa lọ tọn lẹ wẹ Asahẹli+ nọvisunnu Joabi tọn, Ẹlhanani visunnu Dodo Bẹtlẹhẹminu lọ tọn,+
27 Ṣamọti Halọlinu lọ, Helẹzi Pẹloninu lọ,
28 Ila+ visunnu Ikẹṣi Tekoanu lọ tọn, Abi-ẹzẹli+ Anatọtinu lọ,
29 Sibekai+ Huṣanu lọ, Ilai Ahohinu lọ,
30 Mahalai+ Netofanu lọ, Helẹdi+ visunnu Baanahi Netofanu lọ tọn,
31 Itai visunnu Libai he wá sọn Gibea Bẹnjamininu lẹ tọn+ lọ tọn, Bẹnaia Pilatoninu lọ,
32 Hulai he wá sọn agbàdo tọ̀sisa tọn* Gaaṣi+ tọn mẹ lọ, Abiẹli Albatinu lọ,
33 Azmavẹti Bahaluminu lọ, Eliahiba Ṣaalbominu lọ,
34 visunnu Haṣẹmi Gizoninu lọ tọn lẹ, Jonatani visunnu Ṣage Halalinu lọ tọn,
35 Ahiami visunnu Sakali Halalinu lọ tọn, Elifali visunnu Uli tọn,
36 Hefeli Mekẹlatinu lọ, Ahija Pẹloninu lọ,
37 Hẹzlo Kalmẹlinu lọ, Naalai visunnu Ẹzbai tọn,
38 Joẹli nọvisunnu Natani tọn, Mibhali visunnu Hagli tọn,
39 Zelẹki Amọninu lọ, Nahalai Belọtinu lọ, yèdọ gbaja hẹntọ Joabi visunnu Zeluia tọn lọ tọn;
40 Ila Itlinu lọ, Galẹbi Itlinu lọ,
41 Ulia+ Hetinu lọ, Zabadi visunnu Ahlai tọn,
42 Adina visunnu Ṣiza Leubẹninu lọ tọn, yèdọ nukọntọ Leubẹninu lẹ tọn de, omẹ 30 sọ tin po e po;
43 Hanan visunnu Maaka tọn, Joṣafati Mitninu lọ,
44 Uzzia Aṣtalọtinu lọ, Ṣama po Jeiẹli po, yèdọ visunnu Hotami Aloelinu lọ tọn lẹ;
45 Jediaẹli visunnu Ṣimli tọn po Joha Tizinu lọ he yin nọvisunnu etọn po;
46 Eliẹli Mahavinu lọ, Jelibai po Joṣavia po he yin visunnu Ẹlnaami tọn lẹ, Itma Moabinu lọ;
47 Eliẹli, Obẹdi po Jaasiẹli Mẹzobainu lọ po.
Nudọnamẹ Odò Tọn
^ Kavi “hẹnnumẹ towe tlọlọ.”
^ To paa mẹ, “nọ plan Islaeli tọ́nyi bosọ nọ plan ẹn wá.”
^ To paa mẹ, “nukọntọ.”
^ Kavi “Milo.” Hogbe Heblugbe tọn de he zẹẹmẹdo “gọ́.”
^ Kavi “whlẹngán.”
^ Kavi “alindọn.”
^ Kavi “alindọn.”
^ To paa mẹ, “yin visunnu dawe adọgbotọ de tọn.”
