1 Otànnugbo lẹ 15:1-29
15 Ewọ sọ zindonukọn nado to ohọ̀ lẹ gbá na ede to Tòdaho Davidi tọn mẹ, podọ e wleawu nọtẹn de tọn na Apotin Jiwheyẹwhe nugbo lọ tọn bo pẹ́n gòhọ de na ẹn.+
2 Whenẹnu wẹ Davidi dọmọ: “Mẹdepope ma dona ze Apotin Jiwheyẹwhe nugbo lọ tọn adavo Levinu lẹ, na yewlẹ wẹ Jehovah ko de nado nọ ze Apotin Jehovah tọn podọ nado nọ yilizọn na ẹn to whepoponu.”+
3 Davidi sọ bẹ omẹ Islaeli tọn lẹpo pli do Jelusalẹm nado hẹn Apotin Jehovah tọn hẹji wá nọtẹn he ewọ ko wleawu etọn na ẹn lọ.+
4 Davidi bẹ kúnkan Aalọn tọn lẹ+ po Levinu+ lẹ po pli:
5 sọn Kohatinu lẹ mẹ, Uliẹli he yin ogán lọ po nọvisunnu etọn 120 po;
6 sọn Melalinu lẹ mẹ, Asaia+ he yin ogán lọ po nọvisunnu etọn 220 po;
7 sọn Gẹlṣọminu lẹ mẹ, Joẹli+ he yin ogán lọ po nọvisunnu etọn 130 po;
8 sọn kúnkan Elizafani+ tọn lẹ mẹ, Ṣemaia he yin ogán lọ po nọvisunnu etọn 200 po;
9 sọn kúnkan Heblọni tọn lẹ mẹ, Eliẹli he yin ogán lọ po nọvisunnu etọn 80 po;
10 sọn kúnkan Uziẹli+ tọn lẹ mẹ, Aminadabi he yin ogán lọ po nọvisunnu etọn 112 po.
11 Humọ, Davidi ylọ Zadọki+ po Abiatali+ po he yin yẹwhenọ lẹ gọna Uliẹli, Asaia, Joẹli, Ṣemaia, Eliẹli po Aminadabi po he yin Levinu lẹ,
12 bo dọna yé dọmọ: “Mìwlẹ wẹ yin nukọntọ whédo otọ́ Levinu lẹ tọn lẹ. Mì klan mìde do wiwe, yèdọ mìwlẹ po nọvisunnu mìtọn lẹ po bo hẹn Apotin Jehovah Jiwheyẹwhe Islaeli tọn hẹji wá nọtẹn he yẹn ko wleawu etọn na ẹn lọ.
13 Na mìwlẹ ma ze e to tintan whenu wutu,+ Jehovah Jiwheyẹwhe mítọn ko gblehomẹ sinsinyẹn do mí go,+ na mí ma dindona aliho nuyiwa tọn he sọgbe lọ.”+
14 Enẹwutu, yẹwhenọ lẹ po Levinu lẹ po klan yede do wiwe nado hẹn Apotin Jehovah Jiwheyẹwhe Islaeli tọn hẹji wá.
15 Whenẹnu, Levinu lẹ yí opò lẹ do hẹn Apotin Jiwheyẹwhe nugbo lọ tọn do abọ́ ji,+ kẹdẹdile Mose ko degbe etọn sọgbe hẹ ohó Jehovah tọn do.
16 Davidi sọ dọna ogán Levinu lẹ tọn lẹ nado deazọ́nna nọvisunnu yetọn he yin hànjitọ lẹ nado yí ayajẹ do jihàn po hànjinu voovo lẹ po: yèdọ hànjinu okànnọ, ajalẹn+ po ajogàn+ lẹ po.
17 Enẹwutu, Levinu lẹ deazọ́nna Hemani+ visunnu Joẹli tọn, podọ sọn nọvisunnu etọn lẹ mẹ, Asafi+ visunnu Belekia tọn, gọna Etani+ visunnu Kuṣaia tọn sọn nọvisunnu yetọn he yin Melalinu lẹ mẹ.
18 Nọvisunnu yetọn he to mimá awetọ+ mẹ lẹ sọ topọ hẹ yé, yèdọ Zekalia, Bẹni, Jaazieli, Ṣemilamọti, Jehiẹli, Uni, Eliabi, Bẹnaia, Maaseia, Matitia, Elifelẹhu po Mikneia po, gọna Obẹdi-edomi po Jeiẹli po he yin họ̀njinọtọ lẹ.
19 Hemani,+ Asafi+ po Etani po he yin hànjitọ lẹ wẹ yin dide nado hò ajogàn gànvẹẹ tọn lẹ;+
20 Zekalia, Aziẹli, Ṣemilamọti, Jehiẹli, Uni, Eliabi, Maaseia po Bẹnaia po wẹ nọ hò hànjinu okànnọ lẹ sọgbe hẹ nuhiho Alamọti* tọn;+
21 podọ Matitia,+ Elifelẹhu, Mikneia, Obẹdi-edomi, Jeiẹli po Azazia po wẹ nọ hò ajalẹn sọgbe hẹ nuhiho Ṣeminiti* tọn+ nado yinuwa di anademẹtọ hànjitọ lẹ tọn.
22 Kẹnania+ he yin ogán Levinu lẹ tọn wẹ deanana tẹnsisẹ lọ, na azọ́nyọnẹntọ de wẹ ewọ,
23 podọ Belekia po Ẹlkana po wẹ yin dide taidi họ̀njinọtọ to Apotin lọ kọ̀n.
24 Ṣebania, Joṣafati, Netanẹli, Amasai, Zekalia, Bẹnaia po Eliezẹli po he yin yẹwhenọ lẹ wẹ nọ kún opẹ̀n lẹ gángán to Apotin Jiwheyẹwhe nugbo lọ tọn nukọn,+ bọ Obẹdi-edomi po Jehia po yin dide di họ̀njinọtọ lẹ ga to Apotin lọ kọ̀n.
25 Davidi po mẹho Islaeli tọn lẹ po, gọna ogán omẹ fọtọ́n lẹ tọn lẹ sọ to yìyì to pọmẹ nado hẹn apotin alẹnu tọn Jehovah tọn hẹji wá sọn owhé Obẹdi-edomi tọn gbè+ po ayajẹ po.+
26 Whenue Jiwheyẹwhe nugbo lọ gọalọna Levinu lẹ he hẹn apotin alẹnu tọn Jehovah tọn lọ, yé yí oyìnsú winyanwinyan ṣinawe po agbò ṣinawe po do sanvọ́.+
27 Davidi do awù he ma tindo awà de he yè yí avọ̀ dagbedagbe do basi, kẹdẹdi Levinu lọ lẹpo he hẹn Apotin lọ, gọna hànjitọ lọ lẹ podọ Kẹnania he to anadena tẹnsisẹ lọ po azọ́n hànjitọ lẹ tọn po; Davidi sọ do efọdi* alavọ tọn de ga.+
28 Islaelivi lẹpo wẹ yí awhágbe ayajẹ tọn,+ kúnkún azò po opẹ̀n+ po tọn gọna ajogàn lẹ do to apotin alẹnu tọn Jehovah tọn hẹn hẹji wá bosọ to hànjinu okànnọ lẹ po ajalẹn lẹ po hò gángán.+
29 Ṣigba, whenue apotin alẹnu tọn Jehovah tọn lọ biọ Tòdaho Davidi tọn+ mẹ, Mikali+ viyọnnu Sauli tọn to nupọn hlan odò gbọn fleṣenu bo mọ Ahọlu Davidi to linlọ́n pé bo to hùnwhẹ basi; ewọ sọ jẹ vivlẹ ẹ kò ji to ahun etọn mẹ.+
