1 Otànnugbo lẹ 22:1-19
22 Whenẹnu wẹ Davidi dọmọ: “Ohọ̀ Jehovah Jiwheyẹwhe nugbo lọ tọn die, podọ agbà avọ́nunina mimẹ̀ tọn de die na Islaeli.”+
2 Enẹgodo, Davidi degbe nado bẹ mẹhe to jonọ-gbéji+ to aigba Islaeli tọn ji lẹpo pli, e sọ deazọ́nna yé taidi zannu-pàtọ lẹ nado nọ sán zannu lẹ bo nọ pà yé dote nado gbá ohọ̀ Jiwheyẹwhe nugbo lọ tọn.+
3 Davidi sọ wleawu gànyuu susugege tọn dai he na yin yiyizan taidi oṣó na họngbo lẹ podọ nado ṣá fipétẹn lẹ dopọ, gọna gànvẹẹ he sù sọmọ bo ma sọgan yin jijlẹ,+
4 po owhlẹ kedali tọn+ madosọha lẹ po, na owhlẹ kedali tọn susugege wẹ Sidoninu+ lẹ po Tilenu+ lẹ po hẹnwa na Davidi.
5 Davidi sọ dọmọ: “Visunnu ṣie Sọlomọni gbẹ́ yin jọja bo ma tindo numimọ,*+ podọ ohọ̀ he dona yin gbigbá na Jehovah lọ dona tindo gigo tlala+ bọ yindidi po whanpẹ etọn po+ na yin yinyọnẹn to aigba lẹpo ji.+ Enẹwutu, yẹn na wleawudaina ẹn.” Enẹ wẹ zọ́n bọ Davidi do wleawu azọ́nwanu susu tọn dai jẹnukọnna okú etọn.
6 Humọ, e ylọ visunnu etọn Sọlomọni bo na ẹn anademẹ nado gbá ohọ̀ de na Jehovah Jiwheyẹwhe Islaeli tọn.
7 Davidi dọna visunnu etọn Sọlomọni dọmọ: “Na yẹn tọn, n’jlo sọn ahun mẹ wá nado gbá ohọ̀ de na oyín Jehovah Jiwheyẹwhe ṣie tọn.+
8 Ṣigba, Jehovah dọna mi dọ, ‘Hiẹ ko sọ̀n ohùn susu dai, podọ hiẹ ko funawhàn susu. Hiẹ ma na gbá ohọ̀ de na oyín ṣie,+ na a ko sọ̀n ohùn susu dai do aigba ji to nukọn ṣie.
9 Pọ́n! Hiẹ na ji visunnu de+ he na yin jijọhonọ,* yẹn nasọ na ẹn gbọjẹ sọn alọ kẹntọ etọn he lẹdo e pé lẹpo tọn mẹ,+ na Sọlomọni*+ wẹ ewọ na nọ yin, podọ yẹn na na jijọho po vivomẹninọ po Islaeli to azán etọn lẹ gbè.+
10 Ewọ wẹ na gbá ohọ̀ de na oyín ṣie.+ Ewọ na lẹzun visunnu ṣie bọ yẹn na yin otọ́ etọn.+ Yẹn nasọ hẹn ofìn gandudu etọn tọn lodo gligli do Islaeli ji kakadoi.’+
11 “Todin, visunnu ṣie, Jehovah ni tin hẹ we, na hiẹ ni tindo kọdetọn dagbe bo gbá ohọ̀ Jehovah Jiwheyẹwhe towe tọn, kẹdẹdile ewọ ko dọho etọn do gando gowe.+
12 Nulọ poun wẹ yindọ, Jehovah ni na we nuyọnẹn po nukunnumọjẹnumẹ po+ to whenue e na na we aṣẹpipa do Islaeli ji, na hiẹ nido nọ yìn osẹ́n Jehovah Jiwheyẹwhe towe tọn.+
13 Whenẹnu wẹ hiẹ na tindo kọdetọn dagbe eyin a nọ yí sọwhiwhe do payi aṣẹdai+ po whẹdida lọ lẹ po go, ehe Jehovah ko degbena Mose nado na Islaeli.+ Yin adọgbotọ bo yin huhlọnnọ. A dibu kavi dike ahun towe gbàdo blo.+
14 Pọ́n, yẹn ko jẹtukla taun nado wleawu talẹnti* sika tọn 100 000 po talẹnti fataka tọn 1 000 000 po tọn dai na ohọ̀ Jehovah tọn, gọna gànvẹẹ po gànyuu po+ he sù sọmọ bo ma sọgan yin jijlẹ, n’ko sọ wleawuna owhlẹ lẹ po zannu lẹ po,+ amọ́ a na gbẹ́ yí devo lẹ dogọ.
15 Azọ́nwatọ susu tin-to-aimẹ na we—yèdọ zannu-pàtọ lẹ, zannu-dótọ lẹ,+ atin-zọ́nwatọ lẹ po azọ́nyọnẹntọ wunmẹ lẹpo po.+
16 Sika, fataka, gànvẹẹ po gànyuu po tin to finẹ bo mayọnjlẹ.+ Fọ́n bo jẹ azọ́n ji, podọ Jehovah ni tin hẹ we.”+
17 Enẹgodo, Davidi degbena ahọvi Islaeli tọn lẹpo nado gọalọna visunnu etọn Sọlomọni dọmọ:
18 “Be Jehovah Jiwheyẹwhe mìtọn ma tin hẹ mì ya, podọ be ewọ ma ko na mì gbọjẹ to awà lẹpo ji ya? Na ewọ ko jo mẹhe nọ nọ̀ aigba lọ ji lẹ do alọ ṣie mẹ bọ aigba lọ ko yin yíyí to Jehovah nukọn podọ to omẹ etọn lẹ nukọn.
19 Todin, mì yí ahun po alindọn* mìtọn lẹpo po do magbe nado dín Jehovah Jiwheyẹwhe mìtọn+ bo jẹ fiwiwe Jehovah Jiwheyẹwhe nugbo lọ tọn gbá ji+ nado hẹn apotin alẹnu tọn Jehovah tọn po nuyizan wiwe Jiwheyẹwhe nugbo lọ tọn lẹ po wá+ ohọ̀ he yin gbigbá na oyín Jehovah tọn lọ mẹ.”+
Nudọnamẹ Odò Tọn
^ Kavi “bo madogán.”
^ To paa mẹ, “yin mẹhe tindo gbọjẹ.”
^ Sọn hogbe Heblugbe tọn de mẹ he zẹẹmẹdo “Jijọho.”
