1 Samuẹli 16:1-23
16 To godo mẹ, Jehovah dọna Samuẹli dọmọ: “Nawẹ e na dẹnsọ bọ hiẹ na to aluẹmẹ na Sauli+ todin he yẹn ko gbẹ́ ewọ dai ma nado to ahọlu yin do Islaeli ji?+ Kọ̀n amì do azò towe mẹ+ bo dedo. Yẹn na do we hlan Jẹsse+ Bẹtlẹhẹminu lọ dè, na yẹn ko de ahọlu de na dee to visunnu etọn lẹ mẹ.”+
2 Ṣigba, Samuẹli dọmọ: “Nawẹ yẹn gán yì dọ́n gbọn? Eyin Sauli sè ehe, e na hù mi.”+ Jehovah gblọn dọmọ: “Hẹn oyìnsi winyanwinyan dopo bo dọ dọ, ‘Avọ́san hlan Jehovah gbé wẹ n’tọ́n.’
3 Basi oylọna Jẹsse wá avọ́sinsan lọ tẹnmẹ; whenẹnu yẹn na dọ nuhe hiẹ dona wà na we. Mẹhe yẹn na dohia we lọ wẹ hiẹ ni yiamisisadode na mi.”+
4 Samuẹli sọ wà nuhe Jehovah dọ. Whenue e jẹ Bẹtlẹhẹm,+ mẹho tòdaho lọ tọn lẹ pé e bo jẹ sisọsisọ ji bosọ dọmọ: “Jijọho wẹ ya?”
5 Ewọ sọ dọmọ: “Jijọho wẹ. Avọ́san hlan Jehovah gbé wẹ n’tọ́n. Mì klan mìde do wiwe, bo zọnhẹ mi yì avọ́sinsan lọ tẹnmẹ.” To whenẹnu, e klan Jẹsse po visunnu etọn lẹ po do wiwe, enẹgodo e ylọ yé wá avọ́sinsan lọ tẹnmẹ.
6 Dile yé biọ whégbè ja bọ e mọ Eliabi,+ e dọmọ: “Matin ayihaawe, mẹyiamisisadode Jehovah tọn lọ die to nukọn etọn.”
7 Ṣigba, Jehovah dọna Samuẹli dọmọ: “A na ayidonugo awusọhia etọn kavi tedidi etọn blo,+ na yẹn ko gbẹ́ ewọ dai. Na e ma yin aliho he mẹ gbẹtọ nọ pọnnu te wẹ Jiwheyẹwhe nọ pọnnu te, na nuhe sọawuhia to nukunta wẹ gbẹtọ nọ pọ́n, amọ́ ahun mẹ wẹ Jehovah nọ pọ́n.”+
8 Enẹgodo, Jẹsse ylọ Abinadabi+ bo hẹn ẹn gbọn Samuẹli nukọn, ṣigba e dọmọ: “Jehovah ma de ewọ lọsu.”
9 To ewọ godo, Jẹsse hẹn Ṣammahi+ wá, ṣigba Samuẹli dọmọ: “Jehovah ma de ewọ lọsu.”
10 Gbọnmọ dali, Jẹsse hẹn ṣinawe to visunnu etọn lẹ mẹ gbọn Samuẹli nukọn, ṣigba Samuẹli dọna Jẹsse dọ: “Jehovah ma de depope to omẹ ehelẹ mẹ.”
11 To godo mẹ, Samuẹli dọna Jẹsse dọmọ: “Visunnu towe lẹpo die ya?” Ewọ sọ dọmọ: “Pẹvi pete lọ+ wẹ ma ko yin hinhẹnwa kakajẹ din; e to lẹngbọ lẹ yìn.”+ To whenẹnu, Samuẹli dọna Jẹsse dọmọ: “Domẹhlan ẹn, na mí ma na sinai nado dùnú kakajẹ whenue ewọ na wáfi.”
12 Enẹwutu, e domẹhlan ẹn bo hẹn ẹn wá. Todin, omẹ bibia wẹ ewọ bọ nukunmẹ etọn yọ́npọ́n, e sọ yọnwhanpẹ.+ Whenẹnu, Jehovah dọmọ: “Fọnṣite bo yiamisisadode e, na mẹlọ die!”+
13 Enẹwutu, Samuẹli ze azò amì tọn lọ+ bo yiamisisadode e to nọvisunnu etọn lẹ nukọn. Gbigbọ Jehovah tọn sọ jẹ huhlọn na Davidi ji bẹsọn gbenẹgbe sọyi.+ To godo mẹ, Samuẹli fọ́n bo dedo Lama.+
14 Todin, gbigbọ Jehovah tọn ko jo Sauli do,+ bọ Jehovah dike gbigbọ ylankan de jẹ tuklado e ji.+
15 Devizọnwatọ Sauli tọn lẹ dọna ẹn dọmọ: “Hiẹ mọdọ Jiwheyẹwhe dike bọ gbigbọ ylankan de nọ to tuklado we.
16 Na oklunọ mítọn ni jaale bo degbena devizọnwatọ etọn he to nukọn etọn lẹ nado yì dín mẹhe nọ hò ajalẹn ganji de wá.+ Whedepopenu he Jiwheyẹwhe dike bọ gbigbọ ylankan de wá ji we, ewọ na nọ hò ajalẹn lọ, bọ hiẹ na nọ mọ dewe mẹ.”
17 Enẹwutu, Sauli dọna devizọnwatọ etọn lẹ dọmọ: “Mì jaale bo yì dín mẹhe nọ hònú ganji de, bo plan ẹn wá na mi.”
18 Dopo to devizọnwatọ lọ lẹ mẹ dọmọ: “Pọ́n! N’ko mọ lehe visunnu Jẹsse Bẹtlẹhẹminu lọ tọn de nọ hònú ganji do, podọ awhànfuntọ adọgbotọ he dohuhlọn de wẹ ewọ.+ E sọ yọ́n hodọ bo yọnwhanpẹ+ bọ Jehovah tin hẹ ẹ.”+
19 Sauli sọ do wẹnsagun lẹ hlan Jẹsse bo dọmọ: “Do Davidi visunnu towe he nọ penukundo lẹngbọpa go lọ hlan mi.”+
20 Enẹwutu, Jẹsse doagban akla, ayúgò ovẹn tọn po gbọgbọẹ winyanwinyan de po tọn do kẹtẹkẹtẹ de ji bo do yé hlan Sauli to pọmẹ hẹ Davidi visunnu etọn.
21 Gbọnmọ dali, Davidi wá Sauli dè bo jẹ devizọnwana ẹn ji.+ Sauli sọ wá yiwanna ẹn taun, bọ Davidi lẹzun gbaja hẹntọ etọn.
22 Sauli dowẹn hlan Jẹsse dọmọ: “Jaale, dike Davidi ni gbọṣi dè e nado nọ wadevizọn na mi, na ewọ ko mọ nukundagbe ṣie.”
23 Whedepopenu he Jiwheyẹwhe dike bọ gbigbọ ylankan de wá Sauli ji, Davidi nọ ze ajalẹn bo nọ hò, bọ Sauli nọ mọ kọgbọ bo nọ mọ ede mẹ, gbigbọ ylankan lọ sọ nọ jo e do.+
