1 Samuẹli 21:1-15
21 To godo mẹ, Davidi wá Ahimelẹki yẹwhenọ lọ dè to Nobi.+ Ahimelẹki sọ jẹ sisọsisọ ji to whenue e pé Davidi, bo dọna ẹn dọmọ: “Naegbọn hiẹ do to dewe ṣo bọ mẹde ma hodo we?”+
2 Davidi gblọnna Ahimelẹki yẹwhenọ lọ dọmọ: “Ahọlu wẹ degbena mi nado wà nude, amọ́ e dọna mi dọ, ‘A dike mẹdepope yọ́n nude gando azọ́ndenamẹ he wutu yẹn do we hlan lọ podọ gando anademẹ he yẹn ko na we lẹ go blo.’ N’sọ do dope na dẹpẹ ṣie lẹ, na mí nido pé to fide.
3 Todin, eyin a tindo akla atọ́n to finẹ, kavi nudevo depope, saa yí yé na mi poun.”
4 Ṣigba, yẹwhenọ lọ gblọnna Davidi dọmọ: “Akla tata de ma tofi, akla wiwe+ kẹdẹ wẹ tin—kiki eyin dẹpẹ lọ lẹ ko nọla na yọnnu.”*+
5 Davidi gblọnna yẹwhenọ lọ dọmọ: “E họnwun dọ mí ko nọla na yọnnu kẹdẹdi to ojlẹ he wayi lẹ mẹ to whenue n’nọ tọ́nyi awhàn.+ Eyin dẹpẹ lọ lẹ nọ yin wiwe etlẹ yin na azọ́ndenamẹ paa lẹ, nẹmunẹmu wẹ yé ma na yin wiwe to egbé!”
6 Enẹwutu, yẹwhenọ lọ yí akla wiwe lọ na ẹn,+ na akla devo depope ma tin to finẹ adavo akla sọhia tọn lọ, ehe ko yin didesẹ sọn Jehovah nukọn bo yin tẹndiọna gbọn akla yọyọ de dali to gbeegbe e yin didesẹ.
7 Todin, dopo to devizọnwatọ Sauli tọn lẹ mẹ tin to finẹ to gbenẹgbe bo yin ginglọndo finẹ to Jehovah nukọn. Oyín etọn wẹ Doẹgi+ Edominu+ lọ, yèdọ ogán lẹngbọhọtọ Sauli tọn lẹ tọn.
8 Davidi sọ dọna Ahimelẹki dọmọ: “Owhán kavi ohí de to dè we fi ya? N’ma hẹn ohí ṣie titi kavi adánwanu ṣie lẹ, na azọ́ndenamẹ niyaniya tọn wẹ azọ́ndenamẹ ahọlu tọn lọ.”
9 Enẹwutu, yẹwhenọ lọ dọmọ: “Ohí Goliati+ Filistinu he a hù to Agbàdo Elahi tọn+ mẹ lọ tọn wẹ tofi, bọ e yin búbú do avọ̀ de mẹ to efọdi*+ lọ godo. Eyin a jlo na ze e janwẹ, bo ze e, na ohí enẹ kẹdẹ wẹ tofi.” Davidi sọ dọmọ: “Ohí ehe nkọ ma pé awe. Ze e na mi.”
10 Davidi fọnṣite to gbenẹgbe bo zindonukọn nado to hinhọ̀n+ na Sauli, podọ to godo mẹ, e jẹ Ahọlu Akiṣi Gati+ tọn dè.
11 Devizọnwatọ Akiṣi tọn lẹ dọna ẹn dọmọ: “Be e ma yin Davidi, ahọlu aigba lọ tọn die? Be e ma yin ewọ go wẹ yé jihàn gando dile yé to wedu bo dọ dọ,‘Sauli ko hù fọtọ́n etọn lẹ,Davidi ko sọ hù fọtọ́n donu ao etọn lẹ’ ya?”+
12 Davidi yí ohó ehelẹ hẹn do ahun mẹ, e sọ dibu taun+ na Ahọlu Akiṣi Gati tọn.
13 Enẹwutu, e do ede hia to nukọn yetọn di mẹhe hùnalẹ̀+ bo jẹ nuyiwa ji di alẹ̀nọ to ṣẹnṣẹn yetọn.* E to hùzẹ gbọn họngbo tòdaho lọ tọn lẹ go bo to dẹ̀-lùn do ogbì etọn mẹ.
14 To godo mẹ, Akiṣi dọna devizọnwatọ etọn lẹ dọmọ: “Mì ma mọdọ tadunọ de wẹ dawe ehe! Naegbọn mì do plan ẹn wá dè e?
15 Tadunọ wẹ whèdo mi bọ n’do tindo hudo dawe ehe tọn nado to nuyiwa di tadunọ to nukọn ṣie ya? Be e jẹ dọ dawe ehe ni tlẹ biọ owhé ṣie gbè ya?”
