1 Samuẹli 22:1-23
22 Enẹwutu, Davidi yì sọn finẹ,+ bo họnyi oslò Adulami tọn mẹ.+ To whenue nọvisunnu etọn lẹ po whédo otọ́ etọn tọn pete po sè ehe, yé jẹte yì e dè to finẹ.
2 Podọ mẹhe tin to nuhahun mẹ lẹ, mẹhe duahọ lẹ po mẹhe tin to ayimajai mẹ* lẹpo po bẹ yede pli do e dè bọ ewọ lẹzun ogán yetọn. Nudi sunnu 400 wẹ pli do e dè.
3 Enẹgodo, Davidi tọ́n sọn finẹ yì Mizpẹ to Moabi bo dọna ahọlu Moabi+ tọn dọmọ: “Jaale, dike otọ́ ṣie po onọ̀ ṣie po ni nọ dè we kakajẹ whenue yẹn na yọ́n nuhe Jiwheyẹwhe na wà na mi.”
4 Enẹwutu, e jo yé do ahọlu Moabi tọn dè, bọ yewlẹ nọ ahọlu lọ dè na ojlẹ he Davidi do nọ figángán lọ mẹ lẹpo.+
5 To nukọn mẹ, Gad+ yẹwhegán lọ dọna Davidi dọmọ: “A nọ figángán lọ mẹ ba blo. Sẹtẹn sọn finẹ yì aigba Juda tọn ji.”+ Enẹwutu, Davidi tọ́n sọn finẹ bo yì zungbo Helẹti tọn mẹ.
6 Sauli sọ sè dọ yè ko mọ Davidi po sunnu he topọ hẹ ẹ lẹ po. To ojlẹ lọ mẹ, Sauli to aisinsin to atin tamaliski tọn glọ to Gibea+ to ofi yiaga lọ bọ owhán etọn to alọmẹ na ẹn, devizọnwatọ etọn lẹpo sọ lẹdo e pé.
7 Whenẹnu, Sauli dọna devizọnwatọ etọn he lẹdo e pé lẹ dọmọ: “Mì Bẹnjamininu lẹ emi, mì jaale bo dotoai. Be visunnu Jẹsse tọn+ lọsu na na mì aigba po vẹngle lẹ po wẹ ya? Be e na de mìmẹpo taidi ogán omẹ fọtọ́n lẹ tọn po ogán omẹ kanweko lẹ tọn po wẹ ya?+
8 Mìmẹpo wẹ ko nọpọ́ do blasé do go e! Depope to mì mẹ ma dọna mi to whenue visunnu ṣie titi basi alẹnu de hẹ visunnu Jẹsse tọn!+ Depope to mì mẹ ma vẹawu mi bo dọna mi dọ visunnu ṣie titi ko fọ́n devizọnwatọ ṣie titi do ji e nado tọ̀pọwuna mi dile e te do todin.”
9 Whenẹnu, Doẹgi+ Edominu lọ, mẹhe yin dide do devizọnwatọ Sauli tọn lẹ ji to finẹ gblọn dọmọ:+ “N’mọ visunnu Jẹsse tọn bọ e wá Ahimelẹki visunnu Ahitubi tọn+ dè to Nobi.
10 Ewọ sọ kanhose Jehovah do ota etọn mẹ bo wleawu núdùdù tọn na ẹn. Ewọ tlẹ sọ yí ohí Goliati Filistinu lọ tọn na ẹn.”+
11 To afọdopolọji, ahọlu dowẹn hlan Ahimelẹki visunnu Ahitubi tọn, yèdọ yẹwhenọ lọ gọna yẹwhenọ he tin to whédo otọ́ etọn tọn mẹ to Nobi lẹpo. Yemẹpo sọ wá ahọlu dè.
12 Todin, Sauli dọmọ: “Jaale, dotoai hiẹ visunnu Ahitubi tọn!” bọ ewọ gblọn dọmọ: “Yẹn die, oklunọ ṣie.”
13 Sauli sọ dọna ẹn dọmọ: “Naegbọn hiẹ do nọpọ́ hẹ visunnu Jẹsse tọn bo blasé do go e, gbọn núdùdù po ohí po nina ẹn dali podọ gbọn hokinkanse Jiwheyẹwhe do ota etọn mẹ dali? Ewọ ko diọnukunsọ mi bo tọ̀pọwuna mi dile e te do todin.”
14 Whenẹnu, Ahimelẹki gblọnna ahọlu dọmọ: “Mẹnu to devizọnwatọ towe lẹpo mẹ wẹ sọgan yin jidedego* taidi Davidi?+ Ewọ yin ovisu ahọlu tọn+ bo yin ogán hihọ́tọ towe lẹ tọn bosọ nọ yin gbégbòna to owhé towe gbè.+
15 Be egbé wẹ whla tintan he n’to hokanse Jiwheyẹwhe do ota etọn mẹ ya?+ Nuhe dọ a te ma tlẹ gán wá linlẹn mẹ na mi gbede! Ahọlu ni ma hia onú mọnkọtọn depope dokọna devizọnwatọ etọn podọ dokọna whédo otọ́ ṣie tọn pete blo, na devizọnwatọ towe ma mọdona dopo tata to onú ehelẹ mẹ.”+
16 Ṣigba, ahọlu dọmọ: “Hiẹ na kú dandan,+ Ahimelẹki, yèdọ hiẹ po whédo otọ́ towe tọn pete po.”+
17 Whenẹnu, ahọlu dọna hihọ́tọ* he lẹdo e pé lẹ dọmọ: “Mì lilẹ́ bo hù yẹwhenọ Jehovah tọn lọ lẹ, na yé ko kọnawudopọ hẹ Davidi! Yé yọnẹn dọ mẹhe họ̀njẹgbé de wẹ ewọ yin, ṣogan bo ma dọna mi!” Ṣigba, devizọnwatọ ahọlu tọn lẹ ma jlo na ze alọ yetọn daga nado hù yẹwhenọ Jehovah tọn lẹ.
18 Whenẹnu, ahọlu dọna Doẹgi+ dọmọ: “Lilẹ́ bo hù yẹwhenọ lọ lẹ!” Doẹgi Edominu+ lọ sọ yì bo hù yẹwhenọ lọ lẹ to afọdopolọji. To gbenẹgbe, e hù sunnu 85 he do efọdi* alavọ tọn.+
19 E sọ yí ohí do hù mẹhe nọ nọ̀ Nobi,+ yèdọ tòdaho yẹwhenọ lọ lẹ tọn mẹ lẹ; e yí ohí do hù sunnu po yọnnu po, yọpọ po ovivu lẹ po, oyìnsú lẹ, kẹtẹkẹtẹ lẹ po lẹngbọ lẹ po.
20 Ṣigba, dopo to visunnu Ahimelẹki visunnu Ahitubi tọn lọ tọn lẹ mẹ, he yinkọ etọn nọ yin Abiatali,+ họ̀ngán bo họnyi nado nọ hodo Davidi.
21 Abiatali sọ dọna Davidi dọmọ: “Sauli ko hù yẹwhenọ Jehovah tọn lẹ.”
22 Whenẹnu, Davidi dọna Abiatali dọmọ: “Gbenẹgbe he n’mọ Doẹgi Edominu lọ to finẹ+ wẹ n’ko yọnẹn dọ e na dọ ẹ na Sauli janwẹ. Yẹn wẹ hẹn okú wá na mẹlẹpo* to whédo otọ́ towe tọn mẹ.
23 Gbọṣi dè e. A dibu blo, na mẹdepope he to okú* towe dín, okú* ṣie dín wẹ e te; hihọ́ ṣie glọ wẹ a tin te.”+
Nudọnamẹ Odò Tọn
^ Kavi “mẹhe alindọn yetọn to awufiẹsa mẹ.”
^ Kavi “nugbonọ.”
^ To paa mẹ, “wezundotọ.”
^ Kavi “alindọn lẹpo.”
^ Kavi “alindọn.”
^ Kavi “alindọn.”
