1 Samuẹli 6:1-21
-
Filistinu lẹ lẹkọna Apotin lọ yì Islaeli (1-21)
6 Apotin+ Jehovah tọn nọ aigba Filistinu lẹ tọn ji na osun ṣinawe.
2 Filistinu lẹ ylọ yẹwhenọ lẹ po dọṣẹdọtọ+ lẹ po bo kanse dọmọ: “Nawẹ mí na zọ̀n do Apotin Jehovah tọn? Mì gbọ mí ni yọ́n lehe mí na gọ̀ ẹ dohlan nọtẹn etọn do.”
3 Yewlẹ gblọn dọmọ: “Eyin mìwlẹ jlo na do apotin alẹnu Jehovah Jiwheyẹwhe Islaeli tọn lọ tọn hlan, mì ma gọ̀ ẹ dohlan matin avọ́nunina de blo. Mìwlẹ dona do avọ́nunina whẹhuhu tọn de hlan ẹn dandan.+ Whenẹnu kẹdẹ wẹ mìwlẹ na yin azọ̀nhẹngbọna, bọ nuhewutu alọ etọn ma do lẹ́ sọn mì dè na yin hinhẹn zun yinyọnẹn na mì.”
4 Enẹwutu, yé kanse dọmọ: “Avọ́nunina whẹhuhu tọn tẹwẹ mí na dohlan ẹn?” Yewlẹ dọmọ: “Mì do zẹntin he yè yí sika do basi atọ́n gọna oṣọ̀n he yè yí sika do basi atọ́n hlan, sọgbe hẹ sọha ogán Filistinu lẹ tọn,+ na azọ̀nylankan dopolọ wẹ hò mìmẹpo po ogán mìtọn lẹ po.
5 Mì dona basi apajlẹ zẹntin mìtọn lẹ tọn po apajlẹ oṣọ̀n+ he to aigba lọ husudo lẹ tọn po, mì sọ dona gbògbéna Jiwheyẹwhe Islaeli tọn. Vlavo ewọ na hẹn alọ etọn he pẹ̀n do mìwlẹ, yẹwhe mìtọn po aigba mìtọn po ji fua.+
6 Naegbọn mìwlẹ nado hẹn ahun mìtọn sinyẹn dile Egiptinu lẹ po Falo po hẹn ahun yetọn sinyẹn do?+ Whenue E ko yinuwa hẹ yé to aliho sinsinyẹn mẹ,+ yé wá to dandannu glọ nado do Islaeli hlan, bọ yé yì.+
7 Todin, mì wleawuna agbàn-kẹkẹ yọyọ de po oyìnsi awe po, ehe gbẹ́ tindo oyìnvu pẹvipẹvi lẹ amọ́ bo ma ko biọ zẹgẹ de glọ pọ́n. Enẹgodo, mì plá agbàn-kẹkẹ lọ na oyìnsi lọ lẹ, ṣigba mì bẹ oyìnvu yetọn lọ lẹ sọn yé dè lẹkọyi whé.
8 Mì ze Apotin Jehovah tọn lọ do agbàn-kẹkẹ lọ ji, bo bẹ núzinzan sika tọn he mì to didohlan ẹn taidi avọ́nunina whẹhuhu tọn lọ lẹ do apotin de mẹ to apá etọn.+ Enẹgodo, mì do e hlan
9 bo pọ́n: Eyin e hẹji dedo gbọn aliho he yì Bẹti-ṣemẹṣi,+ yèdọ aigba etọn ji, be ewọ wẹ ko wà nuylankan daho ehe do mí. Ṣigba, eyin e ma yinmọ, be mí na yọnẹn dọ e ma yin alọ etọn wẹ hò mí; dọ e jọ do mí go gbọn kosọ dali wẹ.”
10 Gbẹtọ lọ lẹ yinuwa domọ. Yé yí oyìnsi awe he tindo oyìnvu pẹvipẹvi lẹ bo plá agbàn-kẹkẹ lọ na yé bosọ bẹ oyìnvu yetọn lọ lẹ do apó mẹ to whégbè.
11 Enẹgodo, yé ze Apotin Jehovah tọn lọ do agbàn-kẹkẹ lọ ji, gọna apotin he mẹ oṣọ̀n he yè yí sika do basi lọ po apajlẹ zẹntin yetọn lẹ tọn po te.
12 Oyìnsi lọ lẹ sọ wleali tlọlọ gbọn aliho he yì Bẹti-ṣemẹṣi ji.+ Yé to yìyì to alihogbó dopo lọ ji bo to núdọ dile yé to yìyì; yé ma lẹhlan adusi kavi hlan amiyọn. To ojlẹ enẹ mẹ, ogán Filistinu lẹ tọn lẹ to zọnlinzin to godo na yé kakajẹ dogbó Bẹti-ṣemẹṣi tọn kọ̀n.
13 Omẹ Bẹti-ṣemẹṣi tọn lẹ to ojijẹ likun tọn bẹpli to dankló* ji to whelọnu. Whenue yé ze nukun daga bo mọ Apotin lọ, yé jaya tlala nado mọ ẹn.
14 Agbàn-kẹkẹ lọ biọ ogle Jọṣua Bẹti-ṣemẹṣinu lọ tọn mẹ bo nọte to finẹ sẹpọ zannu daho de. Enẹwutu, yé sán atin he yè yí do basi agbàn-kẹkẹ lọ bo yí oyìnsi lọ lẹ+ do basi avọ́nunina mimẹ̀ de hlan Jehovah.
15 Levinu+ lẹ ze Apotin Jehovah tọn lọ jẹte po apotin he tin to apá etọn po, ehe mẹ núzinzan sika tọn lọ lẹ te, yé sọ bẹ yé do zannu daho lọ ji. Omẹ Bẹti-ṣemẹṣi+ tọn lẹ sọ basi avọ́nunina mimẹ̀ po avọ́sinsan lẹ po hlan Jehovah to gbenẹgbe.
16 To whenue ogán atọ́n Filistinu lẹ tọn mọ ehe, yé lẹkọyi Eklọni to gbenẹgbe.
17 Todin, zẹntin he yè yí sika do basi he Filistinu lẹ dohlan taidi avọ́nunina whẹhuhu tọn hlan Jehovah lọ lẹ+ die: dopo na Aṣidọdi,+ dopo na Gaza, dopo na Aṣikelọni, dopo na Gati,+ podọ dopo na Eklọni.+
18 Sọha oṣọ̀n he yè yí sika do basi lọ lẹ tọn sọ sọgbe hẹ sọha tòdaho Filistinu lẹ tọn lẹpo he tin to aṣẹ ogán atọ́n lọ lẹ tọn glọ—yèdọ tòdaho gángán lẹ po gbétatò he to danji he to flala lẹ po.
Zannu daho he ji yé ze Apotin Jehovah tọn lọ do sọ lẹzun kunnudenu de kakajẹ egbehe to ogle Jọṣua Bẹti-ṣemẹṣinu lọ tọn mẹ.
19 Ṣigba, Jiwheyẹwhe hù omẹ Bẹti-ṣemẹṣi tọn lẹ, na yé pọ́n Apotin Jehovah tọn wutu. E hù omẹ 50 070* sọn gbẹtọ lọ lẹ mẹ, bọ gbẹtọ lọ lẹ sọ jẹ avivi ji, na Jehovah ko hù sọn yé mẹ badabada wutu.+
20 Enẹwutu, omẹ Bẹti-ṣemẹṣi tọn lẹ kanse dọmọ: “Mẹnu wẹ na penugo nado nọte to Jehovah, Jiwheyẹwhe wiwe ehe nukọn,+ podọ mẹnu dè wẹ ewọ na yì bo tlọ́n mí dè?”+
21 Yé sọ do wẹnsagun lẹ hlan mẹhe nọ nọ̀ Kiliati-jealimi+ lẹ dọmọ: “Filistinu lẹ ko lẹkọna Apotin Jehovah tọn. Mì jẹte wá bo wá ze e hẹji yì mì dè.”+
