1 Samuẹli 9:1-27
-
Samuẹli yì Sauli dè (1-27)
9 Dawe de tin to Bẹnjamini he oyín etọn nọ yin Kiṣi,+ yèdọ visunnu Abiẹli tọn, visunnu Zelọli tọn, visunnu Bekolati tọn, visunnu Afia tọn, yèdọ Bẹnjamininu+ de he yin adọkunnọ taun.
2 E tindo visunnu de he nọ yin Sauli,+ yèdọ jọja whanpẹnọ de—sunnu depope ma yọnwhanpẹ sọ ẹ to Islaelivi lẹ mẹ—e sọ dite hú gbẹtọ lọ lẹpo sọn abọ́ ji yiaga.
3 Whenue Kiṣi otọ́ Sauli tọn sin kẹtẹkẹtẹ* lẹ bu, Kiṣi dọna visunnu etọn Sauli dọmọ: “Jaale, plan dopo to devizọnwatọ lọ lẹ mẹ bo yì dín kẹtẹkẹtẹ lọ lẹ.”
4 Yé dán gbọn lẹdo osó tọn Eflaimi tọn mẹ podọ gbọn aigba Ṣaliṣa tọn ji, amọ́ yé ma mọ yé. Yé zingbejizọnlin gbọn aigba Ṣaalimi tọn ji, amọ́ kẹtẹkẹtẹ lọ lẹ ma to finẹ. Yé gbọn aigba Bẹnjamininu lẹ tọn pete ji, amọ́ yé ma mọ yé.
5 Yé sọ wá aigba Zufi tọn ji, bọ Sauli dọna devizọnwatọ etọn he zọnhẹ ẹ lọ dọmọ: “Wá, gbọ mí ni lẹkọ, na otọ́ ṣie nikaa jẹ nuhà ji na míwlẹ tọn wutu, kakati nido yin na kẹtẹkẹtẹ lọ lẹ.”+
6 Ṣigba, devizọnwatọ lọ gblọn dọmọ: “Pọ́n, omẹ Jiwheyẹwhe tọn de tin to tòdaho ehe mẹ, yèdọ dawe de he nọ yin gbégbòna. Nuhe e dọ lẹpo wẹ nọ mọ hẹndi.+ Todin, gbọ mí ni yì finẹ. Vlavo ewọ gán dọ aliho he mí na gbọn na mí.”
7 Sauli sọ dọna devizọnwatọ etọn dọmọ: “Eyin mí yì, etẹwẹ mí na hẹn yì na dawe lọ? Akla depope ma to aglò mítọn lẹ mẹ; nudepope ma tin he mí na na omẹ Jiwheyẹwhe nugbo lọ tọn. Etẹwẹ mí tindo?”
8 Enẹwutu, devizọnwatọ lọ gblọnna Sauli dọmọ: “Pọ́n! Mado ẹnẹ ṣekẹli* fataka tọn de tin to asi e. Yẹn na yí i na omẹ Jiwheyẹwhe nugbo lọ tọn, ewọ nasọ dọ aliho he mí na gbọn na mí.”
9 (To hohowhenu to Islaeli, nuhe mẹde nọ dọ eyin e jlo na yì dín Jiwheyẹwhe die: “Wá, bo gbọ mí ni yì numọtọ lọ dè.”+ Na numọtọ wẹ yẹwhegán egbezangbe tọn nọ yin yiylọdọ to hohowhenu.)
10 To whenẹnu, Sauli dọna devizọnwatọ etọn dọmọ: “Nuhe a dọ lọ yọ́n. Wá mí ni yì.” Enẹwutu, yé yì tòdaho lọ mẹ fie omẹ Jiwheyẹwhe nugbo lọ tọn te.
11 Dile yé gbọn aliho he hẹji yì tòdaho lọ mẹ ji jei, yé pé viyọnnu delẹ he tọ́n jei osin dọ̀n gbé. Enẹwutu, yé dọna yé dọmọ: “Be fi wẹ numọtọ+ lọ te ya?”
12 Viyọnnu lọ lẹ gblọn dọmọ: “Mọwẹ. Pọ́n, nukọn mìtọn janwẹ e te. Todin, mì yawu, na egbé wẹ e wá tòdaho lọ mẹ, na gbẹtọ lẹ to avọ́sinsan+ de basi to egbé to ofi yiaga lọ.+
13 Tlolo he mì biọ tòdaho lọ mẹ, mì na mọ ẹn whẹpo ewọ nado hẹji yì ofi yiaga lọ nado yì dùnú. Gbẹtọ lọ lẹ ma na dùnú jẹnukọnna wiwá etọn, na ewọ wẹ nọ dona avọ́sinsan lọ. To mọwiwà godo wẹ mẹhe yin oylọ-basina lẹ sọgan dùnú. Enẹwutu todin, mì yawu dedo, mì nasọ mọ ẹn.”
14 To whenẹnu, yé hẹji yì tòdaho lọ mẹ. Dile yé to dindọnsẹpọ ṣẹnṣẹn tòdaho lọ tọn, Samuẹli to tintọ́njẹgbonu nado wá pé yé, na yé nido hẹji yì ofi yiaga lọ.
15 Azán he jẹnukọnna wiwá Sauli tọn, Jehovah ko dọna* Samuẹli dọmọ:
16 “To osọ he ja to ogàn ehe nkọ mẹ, yẹn na do dawe de hlan we sọn aigba Bẹnjamini tọn ji.+ Hiẹ dona yiamisisadode e taidi nukọntọ do Islaeli omẹ ṣie lẹ ji,+ ewọ nasọ whlẹn omẹ ṣie lẹ gán sọn alọ Filistinu lẹ tọn mẹ. Na yẹn ko mọ yajiji omẹ ṣie lẹ tọn, bọ awhágbe yetọn ko hẹji wá dè e.”+
17 To whenue Samuẹli mọ Sauli, Jehovah dọna ẹn dọmọ: “Dawe ehe wẹ yẹn dọho etọn na we dọ, ‘Mẹlọ he na deanana omẹ ṣie lẹ* die.’”+
18 To whenẹnu, Sauli dọnsẹpọ Samuẹli to ṣẹnṣẹn họngbo lọ tọn bo dọmọ: “Jaale dọna mi, fie wẹ owhé numọtọ lọ tọn te?”
19 Samuẹli sọ gblọnna Sauli dọmọ: “Yẹn wẹ numọtọ lọ. Hẹji jẹnukọnna mi yì ofi yiaga lọ, hiẹ nasọ dùnú hẹ mi to egbé.+ Yẹn na do we hlan to afọnnu, bo nasọ dọ nuhe a jlo na yọnẹn* lẹpo na we.
20 Na nuhe dù kẹtẹkẹtẹ he bu to azán atọ̀n die lọ lẹ,+ a hanú na yetọn wutu blo, na yé ko yin mimọ. Humọ, mẹnu tọn wẹ nudagbe Islaeli tọn lẹpo yin? Be e ma yin hiẹ po whédo otọ́ towe tọn blebu tọn po wẹ ya?”+
21 To whenẹnu, Sauli gblọn dọmọ: “Be e ma yin Bẹnjamininu de wẹ yẹn, yèdọ hẹnnu pẹvi pete to hẹnnu Islaeli tọn lẹ mẹ,+ bọ whẹndo ṣie wẹ sọ whè hugan to whẹndo hẹnnu Bẹnjamini tọn lẹpo mẹ ya? Enẹwutu, naegbọn hiẹ do dọhona mi dole?”
22 Enẹgodo, Samuẹli plan Sauli po devizọnwatọ etọn po yì núdù-họsa lọ bo na yé otẹn de he yiaga hú mẹhe yin oylọ-basina lẹ tọn; nudi gbẹtọ 30 wẹ to finẹ.
23 Samuẹli dọna nudàtọ lọ dọmọ: “Ze adà he n’yí na we bo dọna we dọ, ‘Ze e dovo’ lọ wá.”
24 To whenẹnu, nudàtọ lọ ze asá lọ po nuhe to e ji lẹ po wá, bo ze e donukọnna Sauli. Samuẹli sọ dọmọ: “Nuhe ko yin didedovo lọ ko yin zizedo nukọn towe. Dù, na hiẹ wẹ yé de e dovo na, na dotẹnmẹ hundote ehe. Na n’ko dọna yé dọ, ‘Jonọ lẹ ja na mi.’” Enẹwutu, Sauli dùnú hẹ Samuẹli to gbenẹgbe.
25 Enẹgodo, yé jẹte sọn ofi yiaga lọ+ bo biọ tòdaho lọ mẹ, Samuẹli sọ zindonukọn nado to hodọ hẹ Sauli to họta.
26 Yé sọ yawu fọ́n, podọ to afọnnu fliflimẹ, Samuẹli ylọ Sauli to họta bo dọmọ: “Wleawu, na yẹn nido do we hlan.” Enẹwutu, Sauli wleawu bọ ewọ po Samuẹli po tọ́njẹgbonu.
27 Dile yé to tejẹ wá gbonu tòdaho lọ tọn, Samuẹli dọna Sauli dọmọ: “Dọna devizọnwatọ+ lọ dọ ni jẹnukọnna mí vude. Amọ́ todin, hiẹ ni nọte, na yẹn nido hẹn ohó Jiwheyẹwhe tọn zun yinyọnẹn na we.” Devizọnwatọ lọ sọ dedo nukọn.
Nudọnamẹ Odò Tọn
^ To paa mẹ, “kẹtẹkẹtẹ asi.”
^ To paa mẹ, “ko hùn otó na.”
^ Kavi “na hẹn omẹ ṣie lẹ do kọndopọ mẹ.”
^ To paa mẹ, “nuhe to ahun towe mẹ.”
