1 Johanu 3:1-24
3 Mì pọ́n owanyi he nkọ Otọ́ ko dohia mí,+ dọ mí nido yin yiylọdọ ovi Jiwheyẹwhe tọn lẹ!+ Podọ nuhe mí yin lọ niyẹn. Enẹ wẹ zọ́n bọ aihọn lọ ma do yọ́n mí,+ na e ma ko wá yọ́n ewọ wutu.+
2 Mẹyiwanna lẹ emi, ovi Jiwheyẹwhe tọn lẹ wẹ mí yin todin,+ ṣigba nuhe mí na wá yin ma ko yin didohia.+ Ṣogan, mí yọnẹn dọ whenue ewọ na sọawuhia, mí na taidi ewọ, na mí na mọ ẹn kẹdẹdile e te do.
3 Podọ mẹdepope he tindo todido ehe to ede mẹ nọ lẹ̀ ede wé,+ kẹdẹdile ewọ wé-ṣeke do.
4 Mẹdepope he hẹn ylando zun aṣa sọ to sẹ́nhẹngba hẹn zun aṣa ga, podọ ylando wẹ sẹ́nhẹngba yin.
5 Mìwlẹ yọnẹn ga dọ ewọ yin hinhẹn sọawuhia nado de ylando mìtọn lẹ sẹ̀,+ podọ ylando de ma tin to ewọ mẹ.
6 Mẹdepope he gbọṣi kọndopọ mẹ hẹ ẹ ma nọ hẹn ylando zun aṣa;+ mẹdepope he hẹn ylando zun aṣa ma ko mọ ẹn, mọjanwẹ e ma ko wá yọ́n ewọ do niyẹn.
7 Yọpọ lẹ emi, mì dike mẹdepope hẹn mì buali blo; mẹhe hẹn dodowiwa zun aṣa yin dodonọ, kẹdẹdile ewọ yin dodonọ do.
8 Mẹhe hẹn ylando zun aṣa wá sọn Lẹgba dè, na Lẹgba ko to ylando wà sọn bẹjẹeji.*+ Na lẹndai ehe wutu wẹ Visunnu Jiwheyẹwhe tọn ko yin hinhẹn sọawuhia, nado gbà* azọ́n Lẹgba tọn lẹ.+
9 Mẹdepope he yin jiji sọn Jiwheyẹwhe dè ma nọ hẹn ylando zun aṣa,+ na okún* Etọn nọ gbọṣi omẹ mọnkọtọn mẹ, podọ e ma sọgan hẹn ylando zun aṣa, na e ko yin jiji sọn Jiwheyẹwhe dè wutu.+
10 Lehe ovi Jiwheyẹwhe tọn lẹ po ovi Lẹgba tọn lẹ po nọ yin didohia gbọn die: Mẹdepope he ma hẹn dodowiwa zun aṣa ma wá sọn Jiwheyẹwhe dè, mọkẹdẹ wẹ e yin na mẹhe ma yiwanna mẹmẹsunnu etọn.+
11 Na ehe wẹ owẹ̀n he mì ko sè sọn bẹjẹeji, dọ mí dona yiwanna ode awetọ;+
12 e ma yin taidi Kaini, mẹhe wá sọn mẹylankan lọ dè bo hù nọvisunnu etọn.+ Podọ na whẹwhinwhẹ́n tẹ wutu wẹ e do hù i? Na azọ́n etọn lẹ yin ylankan,+ ṣigba nọvisunnu etọn tọn lẹ yin dodo wutu.+
13 Mẹmẹsunnu lẹ emi, ni ma paṣa mì blo dọ aihọn gbẹwanna mì.+
14 Mí yọnẹn dọ mí ko tọ́n sọn okú mẹ biọ ogbẹ̀ mẹ,+ na mí yiwanna mẹmẹsunnu lẹ wutu.+ Mẹhe ma tindo owanyi gbọṣi okú mẹ.+
15 Hlọnhutọ* de wẹ mẹdepope he gbẹwanna mẹmẹsunnu etọn,+ podọ mì yọnẹn dọ ogbẹ̀ madopodo ma nọ gbọṣi hlọnhutọ de mẹ gba.+
16 Gbọn ehe dali wẹ míwlẹ ko wá yọ́n owanyi, na ewọ ko ze ogbẹ̀* etọn jo na míwlẹ tọn wutu,+ podọ míwlẹ tin to dandannu glọ nado ze ogbẹ̀* mítọn jo na mẹmẹsunnu mítọn lẹ tọn wutu.+
17 Ṣigba, mẹdepope he tindo nutindo agbasa tọn aihọn ehe tọn lẹ bo mọ mẹmẹsunnu etọn to nuhudo mẹ, ṣogan bo gbẹ́ nado do awuvẹmẹ hia ẹ, nawẹ owanyi Jiwheyẹwhe tọn gbọṣi ewọ mẹ gbọn lo?+
18 Yọpọ lẹ emi, mí ma dona nọ yiwannamẹ to ohó mẹ kavi po odẹ́+ po kẹdẹ gba, ṣigba to walọ+ po nugbo+ po mẹ.
19 Gbọn ehe dali wẹ mí na yọnẹn dọ mí wá sọn nugbo lọ mẹ, podọ mí na na jide* ahun mítọn to ewọ nukọn
20 to nudepope he mẹ ahun mítọn sọgan gblewhẹdo mí te mẹ, na Jiwheyẹwhe klohu ahun mítọn bosọ yọ́n nulẹpo.+
21 Mẹyiwanna lẹ emi, eyin ahun mítọn ma gblewhẹdo mí, mí tindo awuvivo hodidọ tọn hẹ Jiwheyẹwhe;+
22 podọ nudepope he mí biọ mí nọ mọyi sọn ewọ dè,+ na mí nọ payi gbedide etọn lẹ go bo to nuhe sọgbe to nukun etọn mẹ lẹ wà wutu.
23 Na nugbo tọn, ehe wẹ gbedide etọn: dọ mí ni tindo yise to oyín Visunnu etọn Jesu Klisti tọn mẹ+ bo nọ yiwanna ode awetọ,+ kẹdẹdile e ko degbe etọn na mí do.
24 Humọ, mẹhe nọ payi gbedide etọn lẹ go nọ gbọṣi kọndopọ mẹ hẹ ẹ, podọ ewọ to kọndopọ mẹ hẹ omẹ mọnkọtọn.+ Gbọn gbigbọ he ewọ na mí gblamẹ wẹ mí nọ yọnẹn dọ ewọ gbọṣi kọndopọ mẹ hẹ mí.+
Nudọnamẹ Odò Tọn
^ Kavi “và.”
^ Kavi “dowhenu.”
^ Enẹ wẹ, okún he penugo nado de sinsẹ́n tọ́n.
^ Kavi “Mẹhutọ.”
^ Kavi “alindọn.”
^ Kavi “alindọn.”
^ Kavi “na nujikudo; mí na duto.”
