1 Pita 1:1-25
1 Pita, apọsteli+ Jesu Klisti tọn, hlan gbéjinọtọ ojlẹ gli tọn he gbàpe gbọn Pọntu, Galatia, Kapadokia,+ Asia po Bitinia po lẹ, hlan mẹhe yin dide lẹ
2 sọgbe hẹ oyọnẹn jẹnukọn Jiwheyẹwhe Otọ́ tọn+ po klandowiwe gbọn gbigbọ dali po,+ na mìwlẹ nido setonu bo yin kiklọ́we po ohùn Jesu Klisti tọn po:+
Na nukundagbe majẹhẹ po jijọho po ni yin hinhẹn sudeji hlan mì.
3 Pipà ni tin hlan Jiwheyẹwhe podọ Otọ́ Oklunọ mítọn Jesu Klisti tọn, na to gbesisọ mẹ hẹ lẹblanu daho etọn e vọ́ mí ji yọyọ+ hlan todido he to ogbẹ̀+ gbọn fọnsọnku Jesu Klisti tọn sọn oṣiọ lẹ mẹ dali,+
4 hlan ogú he ma sọgan gble bo ma nọ flu bo masọ nọ kupẹ́ de.+ E yin whiwhla do olọn mẹ na mì,+
5 yèdọ mẹhe huhlọn Jiwheyẹwhe tọn to hihọ́-basina gbọn yise dali na whlẹngán he whenu etọn ko sọ̀ nado yin didehia to ojlẹ godo tọn mẹ.
6 Ehe wutu wẹ mìwlẹ do to ayajẹ tlala, dile etlẹ yindọ, eyin e biọ domọ, mì ko yin hinhẹn blawu gbọn whlepọn voovo lẹ dali na ojlẹ kleun de,+
7 na nuhọakuẹ-yinyin yise mìtọn tọn he yin whiwhlepọn,+ he họakuẹ tlala hú sika he nọ gble mahopọnna dọ e nọ yin whiwhlepọn* gbọn miyọ́n dali, nido sọgan yin mimọ taidi dodonu de na pipà, gigo po gbégbò po to osọhia Jesu Klisti tọn whenu.+
8 Dile etlẹ yindọ mì ma mọ ẹn pọ́n, mì yiwanna ẹn. Dile etlẹ yindọ mì ma to mimọ ẹn to alọnu din, ṣogan mì do yise hia to ewọ mẹ bosọ to homẹhun tlala po ayajẹ mayọnjlẹ he tindo gigo po,
9 dile mì to yanwle yise mìtọn tọn kọ̀n jẹ, yèdọ whlẹngán mìtọn.*+
10 Gando whlẹngán ehe go, yẹwhegán he dọ dọdai gando nukundagbe majẹhẹ he ko yin awú etọn wle na mì go lẹ ko basi dogbapọnnanu sisosiso po dodinnanu sọwhiwhe tọn po.+
11 Yé zindonukọn nado dindona ojlẹ lọ taun kavi ojlẹ he gbigbọ he to yé mẹ lọ to alọdlẹndo gando Klisti go+ to whenuena e to kunnude jẹnukọn dogbọn oyà he Klisti na ji lẹ dali+ podọ dogbọn gigo he na bọdego lẹ dali.
12 E yin didehia yé dọ yé ma to lizọnyina yedetiti gba, ṣigba na mìwlẹ, gando nuhe ko yin lilá hlan mì todin gbọn yé mẹhe yí gbigbọ wiwe he yin didohlan sọn olọn mẹ do lá wẹndagbe hlan mì lẹ dali.+ Onú ehelẹ taun mẹ wẹ angẹli lẹ to jijlo nado zín nukun do.
13 Enẹwutu, mì wleawuna ayiha mìtọn lẹ na nuwiwa;+ mì gbọṣi lẹnpọn dagbenọ-yinyin mẹ mlẹnmlẹn;+ mì ze todido mìtọn do nukundagbe majẹhẹ he na yin didohia mì to osọhia Jesu Klisti tọn whenu ji.
14 Taidi ovi tonusetọ lẹ, mì sọ yin adàdiọna sọgbe hẹ ojlo he mì tindo dai to wunvi mìtọn mẹ lẹ ba blo,
15 ṣigba kẹdẹdi Omẹ Wiwe lọ he ylọ mì, mì lẹzun wiwe to walọyizan mìtọn lẹpo mẹ,+
16 na e yin winwlan dọmọ: “Mì dona yin wiwe, na wiwe wẹ yẹn.”+
17 Podọ eyin mì to awhádo ylọ Otọ́ he nọ dawhẹ sọgbe hẹ azọ́n mẹdopodopo tọn matin mẹnukuntahihopọn,+ mìwlẹ lọsu ni nọ yinuwa po budisi po+ to gbéjininọ ojlẹ gli tọn mìtọn whenu.
18 Na mì yọnẹn dọ e ma yin nuhe sọgan gble lẹ, di fataka kavi sika, wẹ yè yí do tún mì dote*+ sọn aliho gbẹninọ tọn ovọ́ he mì dugu etọn sọn tọgbo mìtọn lẹ dè* mẹ gba.
19 Ṣigba po ohùn họakuẹ de po wẹ,+ taidi lẹngbọvu madoblọ podọ madodiho de tọn,+ yèdọ Klisti tọn.+
20 Nugbo, ewọ ko yin yinyọnẹn jẹnukọn whẹpo aihọn do yin didoai,+ ṣigba e yin hinhẹn sọawuhia to opodo ojlẹ lẹ tọn na mìwlẹ tọn wutu.+
21 Gbọn ewọ dali wẹ mìwlẹ do lẹzun yisenọ to Jiwheyẹwhe mẹ,+ yèdọ mẹhe fọ́n ẹn sọn oṣiọ lẹ mẹ+ bo na ẹn gigo,+ na yise po todido mìtọn po nido tin to Jiwheyẹwhe mẹ
22 Todin he mì ko lẹ̀ mìde* wé gbọn tonusise mìtọn na nugbo lọ dali ehe dekọtọn do owanyi mẹmẹsunnu tọn matin yẹnuwiwa mẹ,+ mì yiwanna ode awetọ mìtọn sisosiso sọn ahun mẹ wá.+
23 Na yè ko vọ́ mì ji yọyọ,+ e ma yin gbọn okún he sọgan gble dali,* ṣigba gbọn ehe ma sọgan gble dali,+ gbọn ohó Jiwheyẹwhe ogbẹ̀nọ he tin kakadoi lọ tọn gblamẹ.+
24 Na “agbasalan* lẹpo wẹ taidi ogbé, podọ gigo etọn lẹpo taidi osẹ́ danji tọn; ogbé nọ yọ́, podọ vounvoun nọ ja kọnyinai,
25 ṣigba ohó he Jehovah* dọ na gbọṣi aimẹ kakadoi.”+ Podọ “ohó” ehe wẹ wẹndagbe he yin lilá hlan mì lọ.+
Nudọnamẹ Odò Tọn
^ Kavi “kiklọ́we.”
^ Kavi “whlẹngán alindọn mìtọn tọn.”
^ To paa mẹ, “do fli mì gọ̀.”
^ Kavi “to aṣa-liho.”
^ Kavi “alindọn mìtọn lẹ.”
^ Enẹ wẹ, okún he sọgan de sinsẹ́n tọ́n.
^ Kavi “gbẹtọ.”
