1 Pita 3:1-22
3 Mọkẹdẹ wẹ, mì asi lẹ ni nọ yin mẹmẹglọ hlan asu mìtọn titi lẹ,+ gbọnmọ dali, eyin mẹde ma setonuna ohó lọ, yé sọgan yin dindọn gbọn walọyizan asi yetọn lẹ tọn dali matin ohó depope didọ,+
2 na yé yí nukun do mọ walọ wiwe mìtọn+ to pọmẹ po sisi sisosiso po wutu.
3 Mì dike aṣọ́dido mìtọn yin gbonu tọn blo—yèdọ oda biblá po aṣọ́donu sika tọn lẹ+ kavi avọ̀ dagbedagbe lẹ dido po—
4 ṣigba mì dike e ni yin omẹ whiwhla ahun mẹ tọn to aṣọ́dido he ma nọ gble he yin gbigbọ abọẹninọ po walọmimiọn tọn po mẹ,+ ehe yin nuhọakuẹ taun to nukun Jiwheyẹwhe tọn mẹ.
5 Na mọ wẹ yọnnu wiwe hohowhenu tọn he tindo todido to Jiwheyẹwhe mẹ lẹ nọ doaṣọ́na yedelẹ do ga bo nọ yin mẹmẹglọ na asu yetọn titi lẹ,
6 kẹdẹdile Sala setonuna Ablaham do bo nọ ylọ ẹ dọ oklunọ.+ Podọ mì ko lẹzun ovi etọn lẹ, eyin mì zindonukọn nado nọ wà dagbe bo ma joawuna obu.+
7 Mọdopolọ, mì asu lẹ emi, mì zindonukọn nado nọ yí oyọnẹn do nọhẹ yé.* Mì nọ wleyẹyina yé*+ taidi núzinzan madogánnọ de, yèdọ yọnnu, to whenuena e yindọ mì yin gudutọ nukundagbe majẹhẹ ogbẹ̀ tọn hẹ yé ga,+ na odẹ̀ mìtọn lẹ ma nado yin aliglọnna.
8 To popolẹpo mẹ, mìmẹpo ni nọ tindo linlẹn dopolọ,+ mì nọ do mẹtọnhopọn, owanyi mẹmẹsunnu tọn, awuvẹmẹ sisosiso+ po whiwhẹ po hia.+
9 Mì nọ yí oylan do sú oylan họ́ blo+ kavi ozun do sú ozun họ́ blo.+ Kakatimọ, mì nọ yí dona do suahọ,+ na aliho ehe ji wẹ mì yin yiylọ do, na mì nido sọgan dugu dona tọn.
10 Na “mẹdepope he jlo na yiwanna ogbẹ̀ bo mọ azán dagbe lẹ dona họ́ odẹ́ etọn sọn oylan mẹ+ podọ nùflo etọn lẹ sọn oklọ didọ mẹ.
11 Gbọ e ni gbẹ́ oylan dai+ bo nọ wà dagbe;+ gbọ e ni nọ dín jijọho bosọ nọ doafọna ẹn.+
12 Na nukun Jehovah* tọn tin to dodonọ lẹ ji, otó etọn sọ nọ hùn hlan ovẹ̀ yetọn,+ ṣigba nukunmẹ Jehovah* tọn jẹagọdo mẹhe to nuylankan wà lẹ.”+
13 Na nugbo tọn, mẹnu wẹ na wà danú do mì go eyin mì lẹzun zohunhunnọ na nuhe yin dagbe?+
14 Ṣigba eyin etlẹ biọ dọ mì ni jiya na dodowiwa wutu, ayajẹnọ wẹ mì.+ Etomọṣo, mì dibuna nuhe nọ dobuna yé blo,* podọ mì sọ biọ bẹwlu mẹ blo.+
15 Ṣigba, mì klan Klisti do wiwe taidi Oklunọ to ahun mìtọn lẹ mẹ bo nọ wleawu to whepoponu nado yiavùnlọ to mẹlẹpo nukọn he to nukanbiọ mì gando whẹwhinwhẹ́n todido he mì tindo lọ tọn go, ṣigba mì nọ wàmọ to walọmimiọn+ po sisi sisosiso po mẹ.+
16 Mì hẹn ayihadawhẹnamẹnu dagbe de go,+ na to aliho depope he mẹ yè to hodọ jẹagọdo mì te, winyan nido hù yé he dọho jẹagọdo mì lẹ+ na walọ dagbe mìtọn taidi hodotọ Klisti tọn lẹ wutu.+
17 Na eyin Jiwheyẹwhe jotẹnna, e pọnte dọ mì ni jiya na dagbe wiwà+ hú na ylanwiwa.+
18 Na Klisti kú whladopo podọ kakadoi na ylando lẹ,+ yèdọ omẹ dodonọ de na mawadodonọ lẹ,+ nado sọgan deanana mì yì Jiwheyẹwhe dè.+ Ewọ yin hùhù to agbasalan mẹ,+ ṣigba yin hinhẹnwa ogbẹ̀ to gbigbọ mẹ.+
19 To ninọmẹ ehe mẹ, e sọ yì bo dọyẹwheho na gbigbọ he to gànpamẹ lẹ+
20 he ko vẹtoli dai to whenue Jiwheyẹwhe yí homẹfa do nọte* to azán Noa tọn gbè,+ dile aki lọ to yinyin gbigbá,+ to ehe mẹ omẹ vude, enẹ wẹ alindọn* ṣinatọ̀n, yin hinhẹn luntọ́n awuyẹyẹ-afọyẹyẹ gbọn osin lọ gblamẹ.+
21 Baptẹm, yèdọ nuhe sọzẹn hẹ ehe, sọ to mì whlẹngán todin ga, (e ma yin gbọn dihó agbasalan tọn didesẹ dali gba, ṣigba gbọn obiọ he yin bibasi hlan Jiwheyẹwhe nado tindo ayihadawhẹnamẹnu dagbe de dali),+ gbọn fọnsọnku Jesu Klisti tọn gblamẹ.
22 Ewọ tin to adusilọ Jiwheyẹwhe tọn mẹ,+ na e ko yì olọn mẹ, podọ angẹli lẹ, aṣẹpipa lẹ po huhlọn lẹ po ko yin hinhẹn zun mẹmẹglọ hlan ẹn.+
Nudọnamẹ Odò Tọn
^ Kavi “nado nọ do mẹtọnhopọn hia yé; nado nọ mọnukunnujẹ yé mẹ.”
^ Kavi “nọ na yé gbégbò; wlebòna yé.”
^ Kavi vlavo, “mì dibuna budonamẹ yetọn blo.”
^ To paa mẹ, “homẹfa Jiwheyẹwhe tọn nọte.”
^ Kavi “omẹ.”
