1 Pita 4:1-19
4 To whenuena e yindọ Klisti jiya to agbasalan mẹ,+ mìlọsu ga ni yí ninọmẹ apọ̀nmẹ tọn* dopolọ do blagbajana mìde; na mẹhe ko jiya to agbasalan mẹ ko dealọ sọn ylando lẹ mẹ,+
2 na ewọ nido sọgan zan gbẹwhenu etọn he pò to agbasalan mẹ, e ma yin na ojlo gbẹtọvi tọn lẹ ba,+ ṣigba na ojlo Jiwheyẹwhe tọn.+
3 Na ojlẹ he juwayi ko pé na mì nado ko wazọ́n ojlo akọta lẹ tọn+ to whenuena mì to zọnlinzin to walọ gblezọn tasinsinyẹn tọn* lẹ, ojlo zogbe lẹ, ahànnu-zẹjlẹgo, agọ́-gànyìn,* ahàn-gbẹdido po boṣiọ-sinsẹ̀n he ylan lẹ po mẹ.+
4 E nọ paṣa yé dọ mì ma pò to wezundo hẹ yé to aliho walọ gblezọn tọn dopolọ ji, enẹwutu wẹ yé nọ to mì zun.+
5 Ṣigba, omẹ ehelẹ na dogbè na mẹlọ he ko wleawu nado dawhẹna mẹhe to ogbẹ̀ po mẹhe ko kú lẹ po.+
6 Na nugbo tọn, ehe wutu wẹ wẹndagbe lọ do yin lilá hlan oṣiọ lẹ ga,+ na yé nido nọgbẹ̀ sọgbe hẹ gbigbọ sọn pọndohlan Jiwheyẹwhe tọn mẹ, dile etlẹ yindọ yé ko yin whẹdana to agbasalan mẹ sọn pọndohlan gbẹtọvi lẹ tọn mẹ.
7 Ṣigba, opodo nulẹpo tọn ko sẹpọ. Enẹwutu, mì yin wunzanọ,+ bo nọ to aṣeji* nado nọ hodẹ̀.+
8 Hú popolẹpo, mì tindo owanyi sisosiso na ode awetọ,+ na owanyi nọ ṣinyọnnudo ylando susugege.+
9 Mì nọ hẹjó ode awetọ matin hùnhlún.+
10 Kẹdẹdile mẹdopodopo ko mọ nunina de yí do, mì nọ yí i zan nado yilizọn na ode awetọ taidi họ̀nkọnsi dagbe nukundagbe majẹhẹ Jiwheyẹwhe tọn he nọ yin didohia to aliho voovo mẹ tọn lẹ.+
11 Eyin mẹde to hodọ, gbọ e ni nọ wàmọ taidi mẹhe to nulila lẹ lá sọn Jiwheyẹwhe dè; eyin mẹde to lizọnyi, gbọ e ni nọ wàmọ sọgbe hẹ huhlọn he Jiwheyẹwhe nọ namẹ;+ na Jiwheyẹwhe nido yin gigopana to nulẹpo mẹ+ gbọn Jesu Klisti gblamẹ. Ewọ tọn wẹ gigo po hlọnhlọn po kakadoi podọ doidoi. Niṣẹ.*
12 Mẹyiwanna lẹ emi, mì dike whlepọn sinsinyẹn he taidi miyọ́n he mì to pipehẹ lẹ paṣa mì+ taidi dọ onú yọyọ de wẹ to jijọ do mì go blo.
13 Kakatimọ, mì nọ jaya to whepoponu+ na mì yin mimátọ to yajiji Klisti tọn lẹ mẹ wutu,+ na mì nido jaya bosọ gọ́ na ayajẹ susu to osọhia gigo etọn tọn whenu.+
14 Eyin yè to mì vlẹko na oyín Klisti tọn wutu, ayajẹnọ wẹ mì,+ na gbigbọ gigo tọn, mọwẹ, yèdọ gbigbọ Jiwheyẹwhe tọn tin to mì ji.
15 Ṣigba, mì dike depope to mì mẹ jiya taidi hlọnhutọ kavi ajotọ kavi ylanwatọ kavi taidi mẹhe nọ dádo whẹho mẹdevo lẹ tọn mẹ blo.+
16 Etomọṣo, eyin mẹdepope jiya taidi Klistiani de, gbọ winyan ni ma hù i blo,+ ṣigba po oyín ehe po to ota, gbọ e ni zindonukọn nado nọ pagigona Jiwheyẹwhe.
17 Na ojlẹ dide lọ die na whẹdida nido bẹjẹeji sọn owhé Jiwheyẹwhe tọn gbè.+ Todin, eyin e bẹjẹeji sọn míwlẹ ji whẹ́,+ etẹwẹ na yin kọdetọn lọ na mẹhe ma setonuna wẹndagbe Jiwheyẹwhe tọn lẹ?+
18 “Podọ eyin po huhlọn po wẹ dodonọ to yinyin whinwhlẹngán, etẹwẹ na jọ do gbẹtọ jijọ-madi-Jiwheyẹwhe tọn po ylandonọ po go?”+
19 Enẹwutu, to whelọnu lo, mì gbọ mẹhe to yaji sọgbe hẹ ojlo Jiwheyẹwhe tọn lẹ ni zindonukọn nado nọ ze yede* do alọmẹ na Mẹdatọ nugbonọ lọ dile yé to dagbe wà.+
Nudọnamẹ Odò Tọn
^ Kavi “gbemima.”
^ Kavi “paṣadudu.”
^ Kavi “nukle.”
^ Kavi “Amẹn” to Glẹkigbe mẹ.
^ Kavi “alindọn yetọn.”
