1 Timoti 4:1-16
4 Ṣigba, ohó gbọdo lọ* dọ hezeheze dọ to ojlẹ sọgodo tọn lẹ mẹ, mẹdelẹ na jai sọn yise mẹ, bo na nọ na ayidonugo ohó gbọdo*+ mẹhẹn buali tọn lẹ podọ nuplọnmẹ aovi lẹ tọn lẹ,
2 gbọn yẹnuwiwa mẹhe nọ dolalo+ lẹ tọn dali, mẹhe ayihadawhẹnamẹnu yetọn ko yin miyọ́n sí taidi po gànyuu miyọ́nawu de po.
3 Yé nọ gbẹ́ na gbẹtọ lẹ ma nado nọ wlealọ+ bosọ nọ gbẹnamẹ ma nado nọ dù núdùdù+ he Jiwheyẹwhe ko dá lẹ, ehe mẹhe tindo yise+ bo yọ́n nugbo lọ hezeheze lẹ na nọ gbọn pẹdido dali do dù.+
4 Na nudida Jiwheyẹwhe tọn lẹpo wẹ yọ́n,+ bọ nudepope ma dona yin gbigbẹdai+ eyin e yin alọkẹyi po pẹdido po,
5 na e ko yin hinhẹn zun wiwe gbọn ohó Jiwheyẹwhe tọn po dẹ̀hiho do e ji po dali.
6 Gbọn ayinamẹ ehe nina mẹmẹsunnu lẹ dali, hiẹ na yin lizọnyizọnwatọ Klisti Jesu tọn dagbe de, he nọ yí ohó yise tọn lẹ po oplọn dagbe he hiẹ ko hodo pẹkipẹki po do yìn dewe.+
7 Ṣigba, nọ gbẹ́ otàn lalo he nọ kọnmasin do onú wiwe go+ taidi dehe yọnnu yọnhonọ lẹ nọ dọ lẹ dai. Humọ, nọ to dewe plọn po yanwle lọ po nado tindo mẹdezejo na Jiwheyẹwhe.
8 Na agbasa yiyizan* yin alenu na onú vude, ṣigba mẹdezejo na Jiwheyẹwhe yin alenu na nulẹpo, na e tindo opagbe ogbẹ̀ dintọn podọ ogbẹ̀ he ja lọ tọn.+
9 Nugbo wẹ ohó lọ bosọ jẹna alọkẹyi mlẹnmlẹn.
10 Ehe wẹ zọ́n bọ míwlẹ do to azọ́n sinsinyẹn wà bo to kanván,+ na mí ko ze todido mítọn sinai do Jiwheyẹwhe ogbẹ̀nọ lọ ji wutu, yèdọ mẹhe yin Mẹwhlẹngántọ+ gbẹtọ wunmẹ lẹpo tọn,+ titengbe nugbonọ lẹ tọn.
11 Nọ to gbedide ehelẹ namẹ bosọ nọ to yé plọnmẹ.
12 A dike mẹdepope yí nukunpẹvi do pọ́n jọja-yinyin towe gbede blo. Kakatimọ, lẹzun apajlẹ de na nugbonọ lẹ to hodidọ mẹ, to walọyizan mẹ, to owanyi mẹ, to yise mẹ, to walọ wiwe mẹ.*
13 Kaka yẹn nado wá, zindonukọn nado nọ jo dewe na wehihia gbangba tọn,+ na tudohomẹnamẹ,* na mẹpinplọn.
14 A gbẹkọ nunina he to hiẹ mẹ lọ go blo, ehe yin nina we gbọn dọdai de dali to whenue pipli mẹho lẹ tọn ze alọ yetọn do ji we.+
15 Nọ lẹnnupọndo* onú ehelẹ ji; jo dewe na yé, na nukọnyiyi towe nido họnwun hezeheze na gbẹtọ lẹpo.
16 Nọ payi dewe po mẹpinplọn towe po go to whepoponu.+ Zindonukọn to onú ehelẹ mẹ, na gbọn ehe wiwà dali, hiẹ na whlẹn dewe po mẹhe nọ dotoaina we lẹ po gán.+
Nudọnamẹ Odò Tọn
^ To paa mẹ, “gbigbọ lọ.”
^ To paa mẹ, “gbigbọ.”
^ Hogbe Glẹkigbe tọn he yin yiyizan tofi dlẹnalọdo wunmẹ azọ́npinplọn tọn he taidi aihundatọ lanmẹyiya tọn he nọ lilẹ́ ede gbọn jẹhọn mẹ de tọn nkọ.
^ Kavi “to wiwe-yinyin mẹ.”
^ Kavi “tulinamẹ.”
^ Kavi “lẹnayihamẹpọn do.”
